『啟示錄』
成人主日學第一次講義 (9/19/04)

陳柏壽 牧師

耶穌ê受苦、死、復活是人類歷史中最神祕最深沈ê事件，叫做各各他事件，因為chiah-ê攏發生tī各各他這個所在。這個事件嘛會tàng看做整個宇宙、人類、歷史進化ê頂點。歷史ê開始是上帝，唯一ê造物主，伊講：『Tio̍h有光！』就有光。第二項歷史ê進化是基督耶穌為人類ê自由來世間作人，就是所謂ê『道成肉體』ê道理。上帝知影作人ê意義kap運命，同時來世間體驗koh實踐這個意義kap運命。這個意義kap運命ê結局就是各各他。人類因為上帝ê聖ê旨意，發生佇這世間，經過各各他事件，就是上帝ê死kap復活ê事件，來產生新ê靈魂ê光。上帝繼續佇世間運行，創造新ê世界。

講各各他事件是一種神祕ê事件，意思是講這項代誌若m̄是用靈ê眼光去看，是無法度瞭解ê代誌。『靈』ê認識。基督教是一種純然靈界ê認識。一種超越一般肉體ê感官ê體驗。人平時安然歇睏（hioh-khùn）佇肉體ê自然，精神界kap靈界欲奮起是違反伊肉體ê本性。我真愛經過啟示錄這本冊來叫醒咱愛睏ê靈魂，來拍開咱靈魂ê目睭，來看著一個卡高、卡清ê世界。

＜認識家己＞

一般對啟示錄ê瞭解，傾向一個悲慘世界ê遠境。但是西洋神學古早以來亦有一派真堅強韌性ê神學，對聖經，特別是對啟示錄ê解說，不但用人性ê觀點去分析，最後ê結論是上帝對人類有無限ê信心，認為將來ê世界是一種樂觀、希望、漸漸形成完美ê世界。這種ê末世論就是一般稱作人智學(anthropological philosophy, or anthroposophy) ê終末論，一種完美ê終末論。

西歐基督教神學古早以來就有真強ê人智學ê傾向，保羅時代希臘ê司多阿學派( stoicism)，初期kap 中古教會以來一直到今日有深根ê唯智神密主義(gnocisim)、文藝復興、人文主義、民主主義、自由思想、近代ê法治社會，以及今仔日ê超現代主義ê思想，攏一直堅持人對智慧ê價值ê認識，人ê個人、文化、意識ê尊嚴及平等。

欲看著這個卡高卡清ê世界，代先tio̍h先學習來看著『家己』。先瞭解家己是進入瞭解各各他事件ê第一步。

＜構成人ê四大部分＞

人智學家認為咱人是上帝創造物中ê萬物之靈，因為上帝創造人ê時特別將伊ê氣pûn入去人ê身體，所以咱人帶有上帝ê氣、上帝互人ê『魂體』、上帝互人ê『智體』( 包括人ê思想、感情、意志)。

除了人有頂面講ê kap一般動物無仝ê性質以外，人所剩(chhun) ê另外二種性質就是動物性ê部分：『生命體』(就是人佇自己身體內ê，無法度家己控制kap支配ê部分，譬如心臟ê跳動、神經ê敏感等)；『礦物質』ê成分(碳水化合物、磷、鈣、鐵等) 。

人ê人性中愈下面ê，愈近動物性，愈向頂面愈óa近人性kap上帝性。普通醫生醫治ê範圍大概只限定tī人ê動物性ê部分，人性kap靈魂ê部分只有靠上帝來醫治。
魂體
智體
思想
感情
意志
生命體
礦物體

所以人最高ê特質就是人ê靈魂、思想、感情、意志。人ê一生teh培養伊ê靈魂、思想、感情kap意志，同時亦受伊ê靈魂、思想、感情、意志ê支配。人欲活kap動物無仝款，或人欲活到一個比別人閣卡高ê人，只有一個方法，就是努力培養家己ê靈魂、思想、感情kap意志ê成長。

＜認識事物ê三個層次＞

咱人欲認識代誌一般會使分作三個層次：
第一：經過目睭以及頭腦個圖相kap印象(image, imagination)：che是最初步、最直接、簡單ê方法，叫做『圖感』。人細漢ê時真愛讀漫畫，到大人mā真愛看電影及電視，因為hiah-ê圖相會直接射入去意識ê內面。今仔日人用手提電話機mā欲加電視佇頂面，就是這個原因。但是因為圖相簡單閣直接，無必要經過複雜ê思考，所以無法度有深ê境界。真濟囡仔及大人，一日到暗攏坐佇電視機ê頭前，往往變做無深度ê人。人只有生活佇視覺ê感官內面，伊ê智感及靈感就會頓化。

第二：經過耳孔、目睭及頭腦ê思考，去體會、去推理、去計算事物ê真相。這叫做『智感』( inspiration)。親像人teh 聽音樂、看繪畫、欣賞詩、讀冊、寫作等等，除了伊需要用耳仔、目睭以外，更加需要用頭腦才有法度進行。所以聽la-ji-oh，看繪畫，比看電視有進一步ê深度。但是la-ji-oh ê聲聽siuⁿ濟，人愈愛大聲，駛車ê時，車內ê音樂外口攏有聽–著。音樂變作m̄是美感ê一部分，是人ê動物性ê一部分。現代人漸漸bōe-tàng 欣賞聲音ê美感。智感ê訓練及追求，mā伊ê陷阱(hām-chéⁿ)，就是理論ê物件讀siuⁿ濟、寫siuⁿ濟，互人一直生活佇智感內面，人變作思想及邏輯ê機器，亦會阻擋人ê進一步ê靈感ê發展。

第三：世間事物ê最高ê境界是形而上、看bōe著、摸bōe著ê靈魂及心靈ê境界。欲認識這個境界，必須有『靈感』(intuition)。這個境界m̄是用推論、辯解、實驗、邏輯會tàng瞭解，是用心靈ê感覺(feeling)，以及心靈ê智慧(wisdom)。譬如講真濟人真gâu講愛ê道理，但是別人攏無感覺著伊講ê愛，這個愛及上帝仝款，只有用感覺來認識。人ê一生不斷佇希望及失望中輪迴，佇追求愛及互人愛ê中間輪迴，佇錯誤及正確ê選擇中間輪迴，佇現實及理想ê夢中輪迴，最後真chē人佇chiah-ê輪迴中尋(chhōe)無路，bōe出頭天，因為in ê靈感ê追求中無去接觸著上帝，無去摸著上帝。連結佇生命源頭ê上帝ê靈感，才會出頭天。

圖感
智感
靈感

咱人時時tio̍h追求新ê圖感、新ê智感以及新ê靈感，來充實家己ê生命，認識世間ê事物。

＜啟示錄ê地位＞

啟示錄是聖經中最高ê靈感ê地位 ，聖經逐本冊大概抑會tàng用頂面所講三種層次來分類：
舊約聖經
圖感
摩西五經
士師記
列王記
等等
智感
詩篇
箴言
約伯記
靈感
以賽亞書
耶利米書
以西結書
阿摩司書
等等

新約聖經
圖感
馬太福音
馬可福音
路加福音
約翰福音
使徒行傳
智感
羅馬人書
歌林多前、後書
加拉太書
以弗所書
腓立比書
歌羅西書
帖撒羅尼加前、後書
提摩太前、後書
提多書
腓利門書
希伯來書
雅各書
彼得前、後書
約翰一、二、三書
猶大書
靈感
啟示錄：啟示上帝及人間ê同在、人性ê分析及價值、未來世界ê遠景、亞西亞七間教會、天堂ê形狀、打開七印、天使ê號角、勝利ê教會、 審判ê情景、最後ê榮耀。伊是人間卡高(kôan) ê智慧及知識ê水泉。