『忽然間ê人生』
路加福音5:1-11; 約翰福音21:4-11
陳柏壽 牧師   01/09/05

阮查某囝細漢ê時，我kā伊講：『Kyoka, 你nái按呢一直teh看電視，頭殼會變gōng-gōng oh !』伊tō佇伊ê讀冊桌頂用紙條仔，寫講：『No more TV !』貼佇hia。手若teh癢，想欲開TV ê時，就看著伊家己寫ê『No more TV !』手tō kiú–轉-去。

最近我tiāⁿ去釣魚仔，牧師娘tō kā我講：『你釣魚仔釣siuⁿ久，頭殼會gōng-gōng oh !』我tō佇我ê讀冊桌頂寫一個字條仔：『No more fishing !』讀冊讀到真倦，手癢癢，想欲去giâ 魚釣仔ê時，tō看著家己寫ê『No more fishing !』彼幾字佇我ê目前，手tō kiú–轉-去，乖乖仔閣入去冊房讀冊。牧師娘雖然干單會曉講幾句仔台灣話，但是伊會曉用『你ê頭殼gōng-gōng』抑是講『你ê A-ta-ma khong-khong—lah !』來罵我，hō͘我驚一tiô。我若掠魚轉來，伊攏嘴tù–tù，目睭會kā我gîn，我tō乖乖仔家己去灶腳，匿teh thâi魚仔。

俗語講：『仁者樂山、智者樂水』。愛接近水ê釣魚人，應該是khah有智慧才tio̍h、thài會使講伊gōng-gōng?

我ê人生是釣魚大漢–ê，對雲林ê莊腳，阿公ê魚池仔釣鯽仔、tâi仔、草魚、thô͘-sat開始，一直釣到東京灣ê橫濱、三崎、千葉、橫須賀，一直釣到Chesapeake Bay, Long Island, Massachussett, Hiwaii,一直釣到Seattle。見若有水ê所在，攏bat看過我giâ一支魚釣仔，gōng-gōngg á khiā佇hia ê 形影。

我佇台南教冊ê時知影奇美ê大頭家許文龍一禮拜有二、三日，一個人giâ一支魚釣仔gōng-gōng á佇海邊釣魚仔。聽講哲學家Rousseau､Socrates､Karl Barth,甚至Bush總統mā來Seattle釣salmon。｡

釣魚仔人一般講老實人khah濟，你若問伊叨一角釣khah有，伊一定bōe àng-tō͘，bōe驚你知，一定會kā你講彼叢樹仔腳hia，魚仔上濟。你問伊用甚麼餌，伊會教你講今仔日tō͘-kún-a (nightcrawler)上愛咬。別人若giú著大尾ê，人人攏kā伊<拍拍手＞，大家攏kap伊作伙歡喜。釣魚仔人ê話，干單有一點你bōe使完全相信，就是講伊若講伊giú無–起-來彼尾是gôa á大尾，你一定m̄-thang kā伊完全<信道>。

釣魚仔人若看著水，tō想m̄知有魚仔–無？！若看著魚仔，tō一直欲chông–落-去。黃武東牧師來去Hawaii thit-thô ê時，去到Hanauma Bay teh hō͘人看真濟魚仔ê所在，武東牧師看著魚仔，伊tō chông–落-去-啦，帽仔脫起來tō欲ko͘魚仔，人kā擋mā擋bōe-tiâu，因為伊臭耳人，人teh喝伊聽無。阮爸爸去日本、美國逐所在看阮，阮若出門，伊攏bē愛去看甚麼歷史博物館、甚麼觀光勝地。阮坐佇車底，駛仔駛，到尾阮爸爸攏會問講海是叨位一邊？

來到海邊，天連水，水連天，廣闊無限ê世界。看著海ê爸爸，目睭規ê金–起-來，面色規ê súi–起-來，充滿著喜樂、期待kap幻想，親像五、六十年前romantic時代teh jiok阮媽媽ê 時ê面形。

基督教是水連天、天連水ê海洋ê產物。咱ê主耶穌是佇加利利海大漢ê人物。伊ê學生攏是討海人、掠魚人kap釣魚人。偉大ê保羅先生是去海外，浸鹹水轉來ê牧師。基督教經過希臘、羅馬去到英國、西歐，來到美國、加拿大，傳來到日本、韓國、台灣、菲律賓，攏是海路文化ê產物，kap內陸沙漠ê猶太教、回教、印度教、儒教，有完全無仝款ê體質。

釣魚人所親近ê水有真濟人所bōe瞭解ê神祕。人類對內太空ê一切，可以講是矇矇眇眇，比對外太空ê瞭解加真少，尤其最近發生ê tsunami ê大災難，咱佇頂禮拜ê查經班中，引起大家真深ê討論。基督親像大海，但是大海無情。究竟上帝佇叨位？大家ê疑問，總結在佇：上帝你有應允挪亞，今後無欲用大水淹死人，閣用虹作證明（創9:11-13)，閣上帝回答約伯ê話mā講，伊kā海水定界限，閣安門kap鎖，kā伊講：『到chia為止，bōe使pôaⁿ過，你狂傲ê湧，tio̍h到chia停！』（伯38:10-11)

Tú過Christmas ê透早，藍色ê天，平靜ê海，忽然間，bô-têng-bô-tî海湧親像烏sìm-sìm ê水壁按呢khàm過來。15萬人淹死佇海內面。上帝豈活佇烏sìm-sìm ê海湧內面？

咱無必要因為咱來教會，tō講chiah-ê代誌攏有答案。尤其是作牧師人，m̄-thang chhìn-chhái為上帝講話，m̄-thang chhìn-chhái tō甚麼上帝ê意思。咱信主ê人，應該知影，『無答案』本來就是咱ê信仰ê一部分。

彼日有王教授講伊ê意見。伊講上帝是真、善、美ê源頭，上帝kap惡無關係，上帝絕對無活佇tsunami ê內面。這種確信，hō͘真濟兄姊得著khah濟 ê安慰。按呢講起來，上帝若無活佇烏sìm-sìm ê tsunami內面，上帝就是teh kap hiah-ê hō͘ tsunami食去、喪失生命ê人，作伙流目屎，上帝就是teh抵抗tsunami ê力量，上帝teh kap tsunami相戰。上帝kap惡魔絕對分到清清楚楚，上帝惡魔絕對無kô-kô纏作一伙，上帝m̄是『善惡一體』『水火同源』ê上帝。

按呢講–起-來，咱teh講主耶穌ê大海，就是teh講猶有另外彼邊一個上帝ê大海，可以信賴ê大海，善良、溫柔閣美麗ê大海，平安載人載貨ê大海， 靈魂khiā起ê大海，生命ê開始kap 結束ê大海。

我想我若有閒，魚釣仔giâ–leh ，mā欲閣去彼款ê大海ê身邊。主耶穌就是親像大海，咱tio̍h時時親近聖子ê大海，因為伊深沈、安定，深ê海溝比最高ê Himalaya山閣加幾千公尺深，佇伊ê內面，溫度、氣候、光線、潮流攏真安定，海kap水是陸上一切生命ê源頭kap歸宿。咱ê 心tio̍h期待這個大海，意愛這個大海，有一日攏kap彼15萬人仝款，轉去彼ê真深ê靈魂世界。

閣來，咱讀著聖經ê釣魚ê故事，知影主耶穌有時叫咱去釣魚，作一位釣魚人；但是有時叫咱作一尾魚，去食餌，去hông釣。

主耶穌是真好ê釣魚師父，有蝦仔、蟳仔、perch､flunder､salmon,甚至有kujira kap沙魚，所以咱信主ê人有總統、有教授、有醫生、律師、老師、牧師、掃土腳ê、擔糞埽ê，有千萬富翁，mā有sàn到強欲hō͘鬼仔拖去ê人， 逐款人攏有，大細尾攏有。

伊叫咱出去『釣人親像釣魚仔按呢』，是欲按怎釣？

釣魚第一要件就是愛有信心，心內想講『一定釣有』chiah一定釣有。心內若想，有啊好無啊好–啦，一定釣無。

第二，tio̍h親像主耶穌hiah呢親切、sè-jī，m̄-thang粗魯。魚線放hō͘ iù，Jimmy ê mama bat用7磅ê線釣著20磅ê魚仔。線最好mai有色彩，透明ê 、看無ê線上好。M̄免開嘴tō講甚麼基督教。盡量mài用大支鉤仔，細鉤mā有可能釣著大魚。M̄免講大道理，講小道理mā bē-bái。Khǹg khah新鮮ê餌，魚khah愛食；講khah實際人生khah有關係ê代誌，人khah愛聽。M̄-thang 拍生驚伊，m̄免叫伊強食；tio̍h耐心等伊來食，等伊家己欲來食，咱才來giú。Giú ê時，m̄-thang強chhoa̍h，m̄-thnag siuⁿ大力，無魚仔會liòng開，鉤仔會斷去。

咱欲傳耶穌ê福音tio̍h學主耶穌對人ê態度，就是學釣魚ê態度，先瞭解對方ê思想、感情、意志，等到對方對咱有同感同心、有共鳴、有感動ê時才有法度chhōa伊來信耶穌。

信耶穌m̄是叫人加入扶輪社：簽名、納會費就是會員。Tio̍h用supersensitive ê敏感，去款待人，親像咱teh款待魚仔一樣。

有人kap人作伙，一年、二年、10年、 20年攏無變，思想無變、面形mā無變，人看著伊就親像半鹹chiáⁿ ê動物，bē鹹亦bē chiáⁿ，無滋無味，無新ê見解。英文講這種人是brackist water。有人欲kap人講話，代先tio̍h想甚麼khah新鮮ê代誌，khah hō͘人有笑面ê代誌，khah無仝款ê意見，khah想bōe到ê主題，人tú著這種人，tō會親像魚仔tú著新鮮ê tō͘-kún-á，隨時會óa 來身邊。

信上帝是一種感覺，一種bô-têng-bô-tî ê感覺。看著葉仔對樹頂飛–落-來，想著人生ê孤單kap有限，soah感覺著上帝。這種feeling是超物質、超五官、超肉體ê supersensitive feeling。咱每禮拜來作禮拜，我想就是欲培養這種靈性上ê supersensitive feeling.

信上帝是個人ê代誌，時常是孤單ê代誌，kap釣魚仝款，kap海風講話，看海水ê sit-sit-na親像鏡ê水波，有藍色、綠色、烏色ê變化，有海鳥ê叫聲，無人kap你講話，一日安靜經過，日頭強欲落山…。欲chhōe人來歸óa上帝，只有伊一人，伊tio̍h行伊家己ê路，父母、翁某、親人、朋友，攏無關係。信上帝是人家己kap上帝ê代誌，所以是真孤單ê代誌。

海湧大、落雨天ê時釣khah有魚。藍色ê天，平靜ê海面，釣khah無魚。彼ê釣竿頂掛一個鈴仔，坐佇海邊飲bi-luh，食好作輕可，一定釣無。人tú著人生ê風湧ê時，khah容易去hō͘上帝釣–著。釣魚仔絕對m̄是佇溫和ê藍天、tiàm海邊曝日頭彼呢爽快。釣ê人tio̍h有風湧，hông釣ê人，mā tio̍h有人生ê風湧，才是釣魚。

閣來，咱用咱家己是上帝ê魚仔來去想。咱去hō͘上帝釣–著，實在是一個『忽然間』ê代誌，日本話講：『Ah ! to iu ma ni !』『Ah ! ê一瞬間！』去hō͘上帝釣–去-啦！忽然間，看著真愛食ê物件佇目睭前，Ah ! to iu ma ni，soah去hō͘上帝ê鉤仔鉤–著-啦！

我這尾salmon,佇chia出世，泅過Alaska, Aleutian群島，甚至去到日本ê北海道，經過六、七冬，chím-má泅轉來人生ê原點，soah去hō͘魚鉤仔鉤–著。你我tùi台灣，泅過春夏秋冬，經過日本、美國、Hawaii､歐洲，chím-má 流浪來到Seattle, soah去hō͘上帝ê鉤仔鉤–著，來佇chia teh作禮拜。

現代computer叫做『網路』，有人叫做『website』，有時叫做『network』。咱攏親像渡鳥（migrating birds）,mā親像渡魚（migrating fish）。上帝佇各所在設天邏地網，m̄知tâng時咱會去hō͘上帝網–去、鉤–去。

我想大部份人ê人生，明á再欲去叨位，攏親像渡鳥渡魚按呢，家己無一定知，無一定是因為天氣，無一定為著討食。時間若，伊心靈內面ê基因就kā伊講：『Let’s go!！』按呢全家伙仔tō飛–起-來，飛過千里萬里，飛過大山大海，來到太平洋ê這岸。

咱khah親像salmon，對淡水生，去海水mā會活，佇海裡過日了，閣欲轉來淡水生囝，淡水ê tō͘-kún-á欲食，海水ê墨賊仔mā會食。咱台灣人實在真利害。

渡鳥kap渡魚欲泅轉來ê時，無論是風颱、落雨、好天、歹天攏向前行；無護照，無chhéng visa，無分國籍、男女、種族、階級，咱攏是流浪天涯ê兄弟，咱攏是地面ê過客，佇咱ê路頂，無甚麼綠燈紅燈；紅燈若光，規群作伙過紅燈，tō m̄驚：『Aka singo, min-na it-sio-ni wataru-to, ko-wa-ku-nai ! !』這是史明老先生講ê話。

有一日咱攏欲轉去，轉去叨位？Tō是欲轉去天父上帝in厝。有一日，咱會食著天父上帝ê餌，去hō͘天父上帝鉤–去。

咱一禮拜過一禮拜來教會，實在就是欲訓練這種渡鳥kap渡魚ê精神：wataridori watariuwo seisin。

最後我想欲講咱若去hō͘上帝釣–著，是欲去叨位？

雖然舊約時代ê人有講：作活狗比作死獅khah有值！（傳道書9:4) 但是我是teh想：咱去hō͘上帝釣去，比無去hō͘上帝釣去閣khah幸福。

講起來mā是有影，魚仔就是青瞑才會去食餌，咱mā是青瞑，才會去hō͘上帝釣–著。信上帝時常是『忽然間變青瞑』才去信上帝–啦！咱若hiah gâu，hiah有思想，hiah有才情，實在m̄免上帝–啦！

有人真gâu計畫，今仔日欲做啥,明á再欲做啥，後日、明年、十年後、甚至五十年以後、我欲作甚麼款人，攏計畫好好。有人真早tō計畫好好，一定欲作總統。

但是chiah濟計畫，m̄值得彼ê『忽然間』。我想人生中真濟大代誌，攏是彼ê『忽然間』產生ê。這禮拜，辜振甫先生過身，mā是忽然間ê 代誌。

橫濱山手町有一個外國人墓地，我kap牧師娘bat去參觀，看著內底有一種墓牌，是親像一支真大支ê紅毛土柱仔，對半中央切斷去，斷作一半ê墓牌。人講這個就是伊猶壯年、猶青春少年有力、猶充滿希望kap計畫ê生命，tō去hō͘上帝召轉去ê人。

真濟這種壯年人，猶是身軀勇健、事業發達、可以四海為家、chông東閣chông西ê 人，有無限ê希望kap計畫，但是忽然間去hō͘上帝召–去。棺材是té死人，m̄是té老人。

『忽然間』這句話m̄是虛無主義，m̄是悲觀主義，m̄是理論說教，m̄是人生ê宿命。『忽然間』是人生ê現實，是真正ê人生ê一部分。

有人講：Mài講彼款代誌–啦！Khah按怎講，活落去總比死khah好–啦！

哲學家羅素(Russeau)有講：”Man is born free but is everywhere in chains.”。人生來自由，但是去hō͘死縛死死！

我mā深知，上帝mā無愛咱去死，上帝mā會為著拉撒路流目屎，上帝為著hiah-ê因為tsunami ê死去ê人流目屎。上帝欲死以前mā有問講：豈會使將這個死ê苦杯移開？佇十字架頂，上帝mā bat 大聲號(âu)叫。死，實在是人生ê悲慘，mā是上帝ê悲慘ê一部分。

但是上帝將人生第一悲慘ê部份，亦是伊家己經過ê第一悲慘ê經驗，留hō͘咱大家作咱最後ê福氣，kap最後ê希望。因為上帝hō͘咱有死，才有新ê生命ê開始，世間才有新ê世間。

咱既然知影，死時時tòe著咱ê kha-chhng後，彼ê『忽然間』若到，咱攏欲kā親人朋友講再見。按呢咱作魚仔去hō͘上帝釣著ê時，m̄免閣liòng，m̄免驚，m̄免流目屎，將上帝ê餌kap鉤仔勇敢kā吞–落-去。上帝ê鉤仔是清氣，上帝ê餌是好食。

咱有一日欲死ê時，咱tio̍h死hō͘真美、真清氣、真有禮貌、真溫柔、真甘願、真有愛情、真寬容。

有一個會友kā我建議：牧師–啊！你m̄-thang kā人講你欲去釣魚–啦！人會講你是釣魚仔牧師。你tio̍h kā人講：『我欲佇海邊想代誌！』

下chōa你若欲問我今仔日有去釣魚仔–無？你tio̍h講：『你今仔日有去海邊想代誌抑無？』

祈禱:
主啊，阮每次聚集來敬拜你，tō是欲學習一個釣魚仔ê人生，一個看著大海ê人生，一個會曉體貼別人ê思想、感情、意志ê敏感，作一個有supersensitive feeling ê人，閣知影阮一生不過是渡鳥kap渡魚ê人生，佇『忽然間』你欲叫阮轉去ê時，阮攏會tàng坦然無驚。願你hō͘阮有死ê意志，用死ê意志，來克服這世間ê苦難，來充實阮活ê力量。靠主耶穌基督ê聖名祈禱。A-men.