七個鬼仔的世界

October 15, 2008
kap 朋友分享

題目:『七個鬼ê世界』

作者:陳柏壽牧師 西雅圖

基督教聖經內有真濟所在將神、上帝、天使、上帝ê眾子寫作複數名詞;仝款魔鬼ê名詞亦是多數,表示世間內有大鬼、小鬼之分。Tī超人ê靈界內會使講有真濟階級。上帝不但是獨一至高ê神,善ê力量亦是一種全體ê力量;魔鬼尤其是成群結黨活動(馬可福音5:9)。

有一日耶穌將一個去hō͘鬼附身ê人醫好。鬼離開彼人以後,tī路中漫遊,無位thang去。彼人自從鬼離開以後,心內空空空,無物件。鬼看彼人心內空空,親像房間拚掃到清氣溜溜,就koh入去伊ê舊巢;不但如此,伊又去帶另外七個koh khah凶惡ê惡鬼作伙入來tòa。彼人後來ê境遇,就非常悽慘(路加11:26)。七隻鬼表示幾群鬼ê意思。台灣現在是群鬼縱橫ê世界。

終戰ê時台灣人形容彼時ê情勢是『狗去豬來』。日本仔親像軍用狗,但是猶會曉顧門,會kap敵人相殺;但是支那人到後親像豬,只有會食、睏、放。結果228事件發生。日本人離開ê時,將台灣整理到四序四序,戶口制度、農業、交通、法治,做到好勢好勢,但是台灣意識ê房間空空,中國鬼趁勢入來,悽慘就是對hia來。

台灣過去十外冬ê政治嘛是按呢:民進黨可比是狗,但是加減會顧厝;但是中國黨結合一寡台奸tī台灣坐teh食、倒teh睏,不但無顧厝,koh將咱ê大門放開開,hō͘中國人、黑心毒品、肝炎疫病氾濫全台,將台灣錢灌流去中國,台灣人生活艱苦,哀父叫母,天公若像無目睭。

這群鬼群有大鬼小鬼,tī北京佔頭ê是大鬼,tī台灣附聲ê是中鬼。若是彼個台奸tī中國黨中跳來跳去ê,將來ê歷史一定會寫:he不過是一kóa小鬼。

咱m̄-thang想講鬼仔一定是黑面貓牙、歹看面。M̄是,鬼仔一般外表溫順、輕聲溫柔、會哭會笑,有hō͘人看著心爽ê外表。人心tī創世ê時陣本來是善良、中性ê,但是鬼仔ê爽快ê外表ê引誘,就迎鬼入心。

鬼分別tiàm tī純情ê人ê靈魂ê二旁,顯出二種極端(約伯40:15; 41:1):一種是『熱鬼』,會講大聲話、誇口、刺激、興奮、膨風、野性、年輕、健康、煙斗、幻想、傲慢、口號(如633);另外一種鬼屬『冷鬼』,動不動就會流目屎、溫柔、謙卑、陰沉、陰險、安靜無講話、和平、自欺、自虐、僭藏、痲痺,坐tī台仔腳,入莊腳去longstay,真會得人同情。二種鬼攏有一個共通點:講白賊話(以弗所書6:12)。鬼用這二旁ê步數,tī台灣人ê心ê二旁擺動,迷惑台灣人,hō͘台灣人變作謊言ê俘虜。馬英九kap彼群台奸kap中國鬼,攏真會用這二種步數,經過掌握國家機器,將魔術制度化,來控制台灣人。

耶穌叫人逐日tio̍h祈禱講:無得導阮入tī魔鬼ê刺探,tio̍h救阮脫離魔鬼(馬太6:13)。Che是一種真無奈ê祈禱。除非你家己有意志beh將魔鬼趕出去,無人有法度幫忙你啦!Che叫作人ê『自由意志』。自由意志變作魔鬼入侵ê途徑,嘛是人beh趕出魔鬼ê途徑。Beh活beh死,在你家己,在你家己ê選擇,在tī台灣人ê選擇。

德國ê哲人歌德ê作品『浮士德』內面描述一位真有天分、真有野心、真有抱負 ê主角。伊為著beh得著世間所有ê學問、名聲、地位、財產,去kap魔鬼訂契約。魔鬼將一切攏總hō͘伊,只留一個條件:靈魂tio̍h交hō͘魔鬼。這個人最後ê結果:一敗塗地,bē赴反悔。

魔鬼有法度kap人訂契約嗎?有。因為魔鬼是外來ê第三者(上帝、我、魔鬼),kap上帝、台灣人、支那人仝款,有三個無仝定位。人既然有法度kap上帝訂契約,人kap魔鬼當然有法度訂契約(約伯記41:4)。今仔日ê台灣心kap支那人訂契約,就親像浮士德賣身hō͘魔鬼仝款,將台灣『賣身』hō͘中國,就是台灣去hō͘中國鬼拖去啦!

上帝hō͘台灣人有自由意志,m̄是講台灣只有選擇死亡,kap魔鬼簽約結連。是因為上帝相信台灣人ê自由意志,上帝對台灣人有信心,才會放咱面對魔鬼ê挑戰。咱是上帝ê寶貝,上帝未放栜咱。

美國chím-má逐日落雪,氣氛kap七鬼猖行ê台灣社會仝款。台灣人ê個人ê心靈kap台灣社會ê戰場最激烈ê戰鬥tú-beh開始。咱經過這個戰鬥,咱會出頭天,hō͘咱變作一個koh-khah勇敢、koh-khah成熟ê民族。

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致