Iⁿ-iⁿ-oaiⁿ-oaiⁿ欲駛去佗位？

kap 朋友分享

Iⁿ-iⁿ-oaiⁿ-oaiⁿ欲駛去佗位？

懷念蔣醫師

陳柏壽牧師

Oct 14, 2024

我是甲牛車做伙大漢的gín-á，阮攏行牛車路去學校。

彼日阿公對北港牛墟牽你轉來，你猶是一隻細隻牛kak-a, 規隻烏烏，但是二支牛角尖尖翹蹺，向後壁彎。阿公佇井邊soain-仔腳，起一間牛牢互你帶. 我tiàⁿ出去外口割菅芒甘蔗葉轉來互你食，嘛tiàⁿ牽你去阿公墓仔埔遐食草。我攏共你縛佇彼叢大叢苦楝仔下面互你慢慢仔食，我靠佇墓仔埔邊，甲樹仔頂吱吱ka-ka的白頭khiat仔講話。

漸漸大漢了後，你toh會拖甘蔗，對阮田拖去載五分仔車，欲去虎尾糖廠。

細漢阿姑欲嫁的時你用你彼隻牛車，載tîⁿ-tîⁿ的嫁妝，一直行到半天寮，我嘛攏tòe佇牛車後，去給人分一粒紅包。你嘛拖阮去斗六東市仔口去食碗粿，ùn豆油膏。割稻仔了你會拖規車的稻股，轉來蓋厝頂做棕簑。

一直到我讀斗中欲畢業的時有一日聽講人欲甲你賣去牛墟。你欲peh上車的時，我有khòa-îⁿ 你的鬢邊咧流目屎。

陳明仁的詩寫講：

牛車溝

深閣長

你按呢iⁿ-iⁿ-oaiⁿ-oaiⁿ 會當行外遠

豈會行過阮故鄉的甘蔗園

你一世人佇阮田泥拖磨

今已經老lah

你按呢iⁿ-iⁿ-oaiⁿ-oaiⁿ欲行去佗位？

我所敬愛的蔣中山醫師頂個過身。想著伊我toh真毋甘。自從伊40幾年搬來日本就是看我真像小弟咧照顧我。幾十年的友情予我結果來看這位兄哥：看伊親像一隻老牛，拖伊彼台牛車，牽伊一群母囝，對台灣流浪來到日本，一直無放棄伊一生的理想，對一間牛牢脫thut出一個牛牢，來到另外一個牛牢，但是恬恬過日奮鬥，攏無放棄，毋捌出聲怨嘆喝苦，一直到伊人生的路尾。

台大畢業了後伊佇屏東車頭對面開一間「中山耳鼻嚨喉科」患者真濟。除了看患者以外蔣醫師真愛話漫畫。伊的畫中間有牽連著台獨意識的問題，得失著當局，最後被迫全家移居去日本。

到日本著改名，名改做中山將太郎，佇橫濱金澤八景共款用「中山耳鼻嚨喉科」開業。伊開業閣畫畫。不但按呢，幾予每禮拜攏來東京附近台灣教會講道。每擺伊來講道，阮攏全家出席。

細漢giⁿa無順意的時會起番,會哭、拍人、cheng人，最後規身軀nòaⁿ佇塗腳無愛起來，哭死賴爸母。蔣醫師細漢就失去老爸，伊講伊一世人無法度哭死賴爸母。但是伊講道的時時時定定講一項道理，叫做「哭死賴上帝」的道理。伊講這句話毋知欲按怎翻做英文，但是伊就是靠這句話，履歷過世間真濟講袂了的艱苦，最後伊的人生，就是靠哭死賴上帝來過日。佇伊人生的最後，有一日大囝明州lu伊出來外口phak日頭，我佇電話中甲伊講話，伊嘛kâ講伊欲哭死賴上帝！

蔣醫師講的哭死賴上帝有幾項內涵：

1）人來世間的國籍毋是伊的選擇，國籍對人毋是重要的代誌, 人一生的幸福甲不幸，攏是上帝的代誌，是上帝的安排；

2）咱的先祖代代傳互咱到今仔日，咱不過是億萬中的一粒米粒，亞東甲夏娃算第一代，第二代算生2 位,按呢算，第20代應該生209萬，第30代應該生21億人，應該有中國人2倍，第40代，地球人口應該toh有2 兆 1990億人，閣落去就是天文數字。地球的人口咱攏無法度瞭解，何況咱做一個人，實在是無值得甚物，咱完全無甚物通誇口。雖然是按呢，上帝互我這個人出世來世間，一定有伊的好意，所以我毋甘願死，我死嘛欲哭死賴上帝；

3）人攏認為家己第一重要，家己好相好，考試大家攏考 tiâu無夠好，最好是別人的囝無tiâu，干單阮囝tiâu上好, 這是另外一種哭死賴的心理；

4）人生親像地毯，外口看媠噹噹，但是後壁面真lâ-sâm，拄著困難艱苦攏想辦法去牽拖別人，這是另外一款哭死賴心理；

5）隔壁朋友半暝來挵門欲借3塊麵包，因為伊的朋友臨時到，但是伊已經睏，伊的朋友一直挵門，一直無放伊煞，最後伊只有起床，應伊的要求（路加11：5-9），這種真勉強，真無常識的要求，但是對哭死賴的道理來看，嘛應該去做，因為你若做就一切責任交去互上帝。

6）「因果報應」不但佇印度教甲佛教是按呢主張，佇猶太教嘛是共款。亞當偷食禁果上帝質問伊，伊講是因某叫伊食的，因某講是彼尾蛇叫伊食的，一切對伊不利的代誌，攏推互別人。以色列民族有名的先祖雅各真騙人，伊欺騙伊的兄哥以掃，以掃因為按呢欲刣雅各，雅各緊走路。20年後伊甲某欲轉來故鄉，途中拄著天使，雅各甲天使相ián, 雅各ián輸，但是伊閣共天使giú條條，愛天使共伊祝福才欲放天使去，這是一種哭死賴的戰法，輸閣毋認輸，閣改名做以色列（創世記32章），就是俗語講：「會哭的giⁿa霸佔地頭」的意思。蔣醫師認為這種「敢的提去食」的猶太人精神，毋是對毋對的問題，是世間的現實，美國中國蘇聯攏差不多，咱來世間做人，著接受的現實，所以只有會當親象耶穌，也親像遠藤周作的「沈默」按呢哭死賴上帝「沈默」內面是咧寫暮府時代神父Rodrigo受官長命令，著用腳去tah耶穌的相，若無隨時會受死，伊只有一條路，用腳去tah耶穌的相，彼時陣伊的心情，就是哭死賴上帝。

7）旅人佇日頭赤iaⁿ-iaⁿ腳，尻脊（ka-chiah）猶àiⁿ重iⁿ-iⁿ的包袱，叫伊起來坐車,佇車頂伊猶將包袱āiⁿ條條，人叫伊將包袱囥落來，伊講歹勢lah，你予我去來坐toh真好lah，物件阮家己phaiⁿ就好. 這叫做毋敢放伊去。真濟人繼續擔伊人生的重擔，毋敢哭死賴上帝。

8）有人欲問我，欲將一切擔交代上帝以前，是毋是著先反悔認罪，是毋是著先修行改進才著，但是著修行改進到甚麼程度才是夠額？這是真困難回答的問題。保羅先生是認為只要悔改，隨時toh一切得著赦免，這叫做「因信稱義」的道理，嘛是哭死賴的道理。普通時咱攏想講我才是善人的這邊，但是主耶穌教咱講：天父照顧好人這邊，嘛照顧歹人彼邊，天父落雨互好人，嘛落雨互歹人（馬太5：45）普通人會想講好人應該有好報，歹人應該得著責罰，這叫做律法主義者。律法主義無法度解決問題。路加18章有記載二个人入去聖典祈禱，一位是講：「主啊，你看，我無像彼個抽稅的人，我一禮拜禁食二擺，我全收入十分之一奉獻互你」。但是彼位抽稅的人入來聖殿，毋敢入去內底，只有徛佇遠遠，目睭向天，拍家己的胸坎，kā上帝祈禱講：「上帝啊，請你赦免我這個罪人！」伊拍空一切，一個人來到上帝面前。頭前彼個人心內無上帝，後面彼個人心內無家己，心內只有上帝。健康的人毋免醫生，只有破病人才著。

9）主耶穌曾講好額人欲入天國親像駱駝過針鼻遐爾困難（路加18章），意思是講人若欲經過律法來得救是非常困難的代誌，只有一條路，就是chím-á隨時承認主耶穌是救主就完全，就會得救。

10）蔣醫師聽過一個譬喻，講一個gín-á欲去教會以前，老母互伊二个銀角仔，一個是欲奉獻互教會，一個是欲互伊買含仔糖，伊真歡喜，oân-nā行oân-nā跳，結果其中一個銀角仔去落落去水溝，gín-á就心內想講，落落去水溝的彼個銀角仔是欲奉獻的彼粒，手內彼粒銀角仔，是伊欲買含仔糖彼粒。這嘛是一種哭死賴的表現，好的攏是我的，拍無去的彼粒是上帝的，這就是哭死賴的表現。

11）「倚靠耶和華的人有福氣，伊欲親像樹栽佇水邊，根深入河水，炎熱若到，伊無得驚，葉欲青翠，伊佇亢旱的年攏無煩惱，繼續結果子。」（耶利米17：7-8）咱佇幸福的時著呵咾上帝，佇艱苦的時著祈禱上帝，祈禱的時猶原繼續艱苦的時，著愛會曉哭死賴上帝。

保羅早前是做羅馬帝國的大官，專門咧掠基督徒去關去刣，但是有一日去拄著主耶穌以後，伊的人生有180度轉變，伊變做一位散赤的傳道人，對猷太地過小亞細亞，去到羅馬歐洲，散赤流浪，一直到死。伊就是一位典型的人生，伊知影甚物是富足, 甚物是散赤，伊講伊佇富足甲散赤攏安然自在，人生一盡交代互上帝。

咱的人生嘛應該是共款，咱一定嘛經過酸鹹苦chiáⁿ成功失敗，經過真濟笑容甲流目屎的時陣。阮阿公興旺的時，我會記佇伊駛jeep載我對溪邊厝經過斗六虎尾到西螺，去看阮的田地，收地租，375失敗以後，阿公家己駛牛車去做田。但是經過人生的風湧，我咧看這個阿公，伊毋捌lê頭。無欲認輸。阿公失敗了後，阮老爸phàiⁿ6的囝去台北，開仔店，做密醫，後來佳哉人介紹，去國民學校教冊，教45冬，6的囝攏大漢。我嘛共款，tòe著因行路，行共款人生的cycle。做40外年的牧師。chím-má退休佇西雅圖。做recycle的牧師，人叫阮toh來講道。