「南台巡禮，bē死心」
＜聰美姊紀念基金會＞

-陳柏壽 牧師-

近日聰美基金會ê人有轉去台灣，飛機衝破一層厚厚ê烏雲才看著小港機場ê跑道。全高雄tùi透早到暗24點鐘攏是罩tī污染ê雲傘內面。Tùi小港機場出發，一路是唐á榮鐵工廠ê大煙筒，各種製肥、製鋁ê工廠，大量ê烏煙噴按一片無辜ê平民ê住宅區去。可憐ê人民，只有tī烏煙內喘khùi，連講話ê聲音to去hō͘飛龍機聲遮過。大資本家、大頭家一個一個攏tī高級別墅teh逍遙，抑無tō是tī外國ê樂園地方teh遊山玩水。

往台南ê路中經過最近開設ê東西高速公路，運掌講這12條東西橫向ê攏是宋省長手下作ê，hō͘阮想起莫怪古早以來，無論去到tóž位，pōng空、大橋、大樓、公家工廠，攏有大官刻名留牌ê現象。伊本來是人民ê公僕，台灣人勤儉ê血汗錢，伊亂開亂貪，到時完成ê建築，講攏是伊hō͘百姓ê恩典。這種現象表示台灣社會ê民主意識，猶停留tī幼稚園ê階級。

到台南市ê騎樓腳，任何空位攏是一家大小賣小食ê所在。故都ê台南留有真純粹ê美食：蚵á煎、桃 thô-thoh魚庚、擔á麵、碗糕kap蝦卷。一府二鹿三艋胛ê古語，hō͘人看著古都台南人ê勤儉拍拚kap純粹ê氣質。但是橫霸全地ê台南ê lap-sap空氣，mā無比高雄加好jōa-chē。

向台南去恒春鵝鑾鼻ê方向，滿田滿路攏是tú teh大出ê芭á kap黑珍珠ê蓮霧。農民一年透天顧水果，koh èng肥除草包果袋，等到現在作伙大出，八斤一百kho͘，賣無夠採果工錢。台灣農民無種心會死，種mā心會死，無生路，外勞佔工作，前程會使講是一片灰色ê天空。

向西去，白河、關仔嶺、仙公廟，經過烏山頭水壩，看著建築嘉南大圳ê日本技師八田與一先生ê銅像，tī初夏微風中kap樹ńg下安靜ê面型，hō͘人深深懷念。仙公廟腳勤勞ê農民排列chē-chē無仝樣ê熱帶水果kap農產，尤其是關廟ê旺梨，加添真chē南台灣ê趣味。一路山坡ê荔枝kap龍眼，花開到滿滿是，今年一定大收成。無啥物灌溉kap照顧就自然生長，tī一年四季污染ê大地，mā beh繼續生長。

上帝tī台南留真大ê腳跡，台南是長老教會ê大本營。長榮中學、長榮女中、長榮大學、新樓病院、台南神學院、教會公報社、看西街教會、太平境教會，攏是真珍貴ê歷史遺跡。設tī長中ê長老教會歷史館是台灣教會歷史ê總庫，亦有有關台灣文化ê物品、古寶以及博物館收藏。阮chit-má才知影「長榮人」對台灣教會ê愛會hiah-nih深，實在是因為有這個「歷史館」，伊時時提醒學生子弟前人ê流汗kap血淚。
台南是世界唯一最大ê黑面比落á鳥渡季ê所在。今年聽講有408隻飛轉來台南。咱台灣人漸漸知影保護特殊動物ê重要，所以，黑面比落á鳥若飛來魚塭á食sat-bak魚、台灣鯽á、蚵á，無人敢去kā趕，只有hō͘伊親像hāu-hia ê大嘴巴食到滿足為止。
台南有一位真成功ê企業家叫許文龍。是目前全世界出產第一大塑膠粒á ê生產者，伊thàn大錢了後，有收集全世界各地ê藝術品，開設一個奇美博物館，hō͘人免費去參觀，內面介紹展覽品ê人員，講台灣話。聽講許先生tī歇假日，攏戴一頂破koe-le-á去七股ê魚池¡邊，一個人teh釣魚。

台南安平ê天后宮內奉侍傳統ê黑面馬祖，但是為著beh吸收遊客，加奉侍鄭成功。事實上，台南全城已經散佈鄭成功遺跡：延平郡王祠、億戴金城、赤崁樓、安平城堡。鄭成功已經是神化ê人物，伊過身ê時只有39歲，真正佔領台灣不過一年二個月，對實在ê台灣移民世界ê影響，無像國民黨五十年來所推廣ê歷史所講ê按呢大ê，普羅眾生羅漢腳仔ê每一粒汗kap血才是建造美麗島ê基礎。

國民黨神化鄭成功ê政治，就是beh神化伊「反攻大陸」ê政策。雖然近年政黨交替，但是神化政策ê殘毒，包括南台灣在內，最普遍ê現象是人人bē講台語，尤其是青少年kap婦仁人加真可憐！人人變作神祕化中ê中國人，bē記得tī四、五百年以來咱ê祖先原住民所留血汗ê遺產。

日本名古屋有人專門飼一種pū鴨卵ê雞母叫作[可秦]。這種雞母只有知影專心pū卵，bē曉選擇。日本人beh繁殖鴨á ê時，就將鴨卵khǹg入去伊ê翼下，等到雞á鴨á攏pū出來ê時，看著伊ê鴨á跳落去水底，soah kok-kok叫，驚伊會去淹死。今á日真chē單純ê台灣人攏是[可秦]，台灣雞pū中國鴨，gín-á攏講中國話lah，但是家己猶無感覺。

這群美國轉去台灣ê聰美基金會成員，再次體驗著國民黨語言政策ê可惡，一直到今á日台灣政府教育部對母語教育猶採取放生、無關心ê政策。有人講天堂就是講母語ê所在，相對ê地獄就是講母語無人聽有ê所在。台灣受這百年ê外來政權ê摧殘，漸漸變作一個地獄。

今年是「台文通訊」設立十週年，亦是「聰美姊紀念基金會」設立九週年ê紀念，咱ê心bē死，咱亦bē使死心，一定beh將地獄化作天堂。

（本文是「台文通訊」第89期ê社論，July 2001）