踏話頭 陳雷
我希望讀者讀這本冊以前，會tàng先瞭解作者陳柏壽牧師，特別是陳牧師kap近代台語文運動ê關係。Che tio̍h ài ùi 成（chiâⁿ）10冬前講–起。
差不多10冬前niā-niā，大部份ê台灣人若是聽著「台語文」這個物件，tō會有真特別，真龜怪ê反應。Bē輸是聽著人teh講外星ê飛碟或者天方夜譚按呢，無人beh相信有這個物件，想講你若是teh起痟（siáu）就是teh講hàm古。
11冬前niā-niā，有一陣tòa tī美國ê台灣人，in為著beh搶救台灣人母語死亡ê危機，tī Los Angeles出版一份用台語文寫ê月刊。In家己出人工、出時間、出錢來編這份刊物，來印這份刊物，來分發這份刊物。In ta̍k項攏無，連出版刊物ê經驗mā無。In無要求啥物，in有–ê是kan-na一個理想kap一粒熱情、活跳、m̄願失敗ê心。這份月刊就是chit-má已經繼續發行11冬，tī全世界有台灣人ê所在攏看會–著-ê「台文通訊」。
「台文通訊」會tàng繼續到今á日，完全是靠chē-chē讀者透過 [聰美姊基金會] hō͘伊經濟上kap精神上ê支持，（聰美姊基金會ùi 1993年起到chit-má為止tō是「台文通訊」ê發行人。）這個聰美姊基金會ê總幹事一直tō是作者陳柏壽牧師。Hit當時1993年，陳牧師有一個真少人有ê視觀（vision）：伊認為beh繼續紀念伊藤聰美女士上高尚ê台灣精神kap疼世ê精神，上蓋適合ê khang-khòe就是全力支持這份tú-chiah 2歲大ê台灣孤兒台文月刊「台文通訊」。一方面因為「台文通訊」kap伊藤聰美女士仝款，堅持疼世，疼台灣ê理想，無計較名利ê草根精神。另外一方面，陳牧師認為，台灣人ê未來ài靠台灣人靈魂ê建造。Beh建造台灣人尊嚴kap自信，一個真重要ê khang-khòe tō 是搶救台灣人ê母語。
這本冊內面收集ê文章，除了小部份是陳牧師個人私情ê紀錄kap表達以外，大部份kap過去chiâⁿ 10冬以來ê台灣語文運動有關係。讀者若知影頂面hit節聰美姊基金會kap「台文通訊」ê背景，tō會tàng進一步深入瞭解陳牧師寫「台語文ê筆跡」ê動機kap心情。Chia ê文章kap近代ê台語文運動是黏作伙分bē開–ê。陳牧師kap近代台灣語文運動mā是黏作伙分bē開–ê。
關於伊藤聰美女士ê代誌，作者tī這本冊內面有一段hō͘人真感心ê說明。請大家讀【伊藤聰美紀念基金】。
陳雷，2002年12月，加拿大
No Comments