平凡ê偉大

07/04/04台語教會

經節：路加24:13-23

聖詩：452上帝愛疼怎會許大

陳柏壽 牧師

台灣一個立法委員teh抗議教育部長用無仝角度來看台灣ê地圖。

看台灣地圖ê方法有三種：第一種是用通常ê方法去看，就是南下北上，東右西左。Che會tàng譬如是平常ê一度空間去認識代誌；第二種是用顛倒反ê角度去看，南khǹg佇頂面，北khǹg下面，東左西右。日本人將日本khǹg佇世界ê中心，歐洲人將歐洲khǹg佇世界ê中心，美國人將美國khǹg入去世界ê中心。這個角度會使講是用二度空間去認識代誌；第三種方法是用三度空間ê方法去看咱ê台灣，就是用文化ê角度，經濟力，思想形態，人生觀等等來畫台灣ê地圖。譬如講用台灣人ê文化及思想意識來畫台灣ê地圖，台灣可能會離開中國真遠，有可能來靠佇咱Seattle ê身邊，嘛會使畫佇英國及歐洲ê邊仔。

平常人卡習慣用一度空間來思考。一方面是因為教育及習慣，另外一方面是因為人ê惰性(tōaⁿ-sèng)。人若是用二度空間去看代誌，就須要時時使用頭腦，時時ài用另外一面去看代誌。但是真正ê人，有伊最高ê品質，tio̍h-ài學習超脫既成ê公式，無受現實世界ê轄制，有法度感覺著上帝及聖靈ê存在，用理想、愛、及希望來做人。Che就是用三度空間ê深度ê人格來做人。

主耶穌嘛有教示咱：及純情ê人作伙tio̍h用純情ê態度，親像鴿仔按呢；若是拄著(tú-tio̍h)詭詐(kúi-chà)人，tio̍h靈巧親像蛇。保羅先生嘛有講：對希伯來人，講希伯來話，對希臘人講希臘話，去啥物所在tio̍h用in當地ê方法，去及人交通。Tio̍h-ài變通、tio̍h靈巧。

最近人才發現咱久長以來使用ê紅皮白話字聖經內面有差不多20%是chím-má台灣人無teh講ê古典廈門話，mài講教會外ê人聽無，教會內卡年輕ê人嘛聽無。咱來教會聽真濟教條、理論、命令，久來咱已經習慣，但是初來教會ê人，攏聽無。我神學院畢業以後，初作牧師ê前幾偌（jōa）年，講道ê內容攏講真濟家己真滿意ê神學，親像teh kā博士班上課按呢。牧師作愈久，愈知影人生ê道理m̄是hiah-nih簡單，所以用教主日學ê心情khiā講臺，人聽卡有。

主耶穌嘛真少講大道理、大理論，主耶穌真少講系統神學。主耶穌ê福音真無系統，真無理論，真濟是小道理。

但是就是chiah-ê小道理內面才真正接觸著真正ê人生。尤其是hiah-ê tam著生活ê酸鹹苦chiáⁿ，佇職場奔波，來到頭家ê門口，講我有二支腳二支手好好，一日欲算外濟？真正ê人生除了有歡喜快樂ê時以外，更加充滿著孤單、悲傷及目屎。啥物人有法度來touch著真正ê我ê內心–呢？咱來教會ê人，及人交陪，攏著touch著真正ê人生，抑就是講欲會曉作基督徒以前，tio̍h先會曉作一個『人』。佇教會外會曉作人，佇教會內更加tio̍h會曉作人。因為咱ê上帝是touch咱真正ê人生ê上帝，伊及咱佇每一日ê生涯中作伙行路、作伙歡喜，抑作伙陪咱teh孤單、悲傷、流目屎。

有一日主耶穌及學生過麥仔園，學生腹肚枵（iau），就giú麥仔來食。法利賽人，就是hiah-ê干單會曉講教條ê宗教人，就罵主耶穌講：安息日bē使giú麥仔。主耶穌隨時就問in講：『食飯卡重要抑是安息日卡重要？』（馬太12）法利賽人teh講ê安息日是離開現實世界、離開現實人生ê安息日。

有一日安息日，主耶穌佇會堂，看著一人互鬼附身，就命令鬼對彼人身上出來。佇安息日，主耶穌嘛醫病，互人免受病魔纏身。主耶穌認為佇安息日救人，及佇平素日救人仝款，佇會堂內救人及佇會堂外救人嘛是仝款。卡重要ê代誌是救人。伊講人比安息日卡重要，m̄是安息日比人卡重要。安息日是為人設立ê，人m̄是為著安息日來設立（馬可2:27）。所以上帝是安息日ê主，咱ê上帝掌管安息日、會堂、宗教、教條。咱ê上帝佇主耶穌所表現出來ê，m̄是教條、法規、誡命ê上帝，是顧人、疼人、用人ê生命及幸福做一切ê中心ê上帝。

所以上帝所teh疼ê人間，究竟是啥物款ê人間？啥物款ê人間才是人間ê典型？Che是一個真現實真切身ê問題，咱逐日目睭金，就會拄著（tú-tio̍h）這個問題，問我家己今仔日活落去欲用啥物態度去活。

今仔日ê聖經中間講著一個故事，就是主耶穌復活以後，有二位學生頭殼lê–lê，靜靜佇耶路撒冷往以馬忤(í-má-ngē)ê山路行路。春天ê郊外天氣真好，日頭真清，草花青翠，鳥仔佇樹仔頂唱歌。但是這二位學生ê心情真黑暗閣絕望，因為in所唯一寄待ê老師已經互人掠去釘死佇十字架頂。一切攏無了了–啦。

耶穌來及in作伙行路。但是人ê心情若是絕望，in ê目睭就親像去互魚鱗（hî-lân）蓋(khàm)–teh，啥物to看無，明明是主耶穌，就是看未出來。這位生分人ê耶穌問in講：『恁二人–啊！目頭kat-kat，頭殼lê-lê，teh講啥物–啊？』

二位學生中有一位叫做革流巴(Cleopas)，是真愛講話ê人，隨時就應伊講，你這個人–啊，你豈無聽講最近佇耶路撒冷發生ê代誌嘛？耶穌問伊是啥物代誌，伊就一路對頭到尾，佇耶穌ê面前，講耶穌ê故事，講到嘴瀾全波。伊講愈濟，講愈大聲，聽ê人愈知伊是憨。

但是另外一位無出名ê學生，一路差不多攏無講話，靜靜仔tòe佇主耶穌ê身邊，作伙行路。伊無講話，因為伊知影，這世間ê代誌無hiah-nih簡單，伊嘛知影，及in作伙佇這條山路teh行路ê這位先生，嘛m̄是簡單ê人。所以這位無出名ê學生是一位真正ê人，有深度ê平凡ê人。但是伊恬恬無出聲。

今仔日你若去以馬忤，會看著一間天主教ê教會，叫做革流巴教會，不過是一間閣tēng閣冷ê建築物。人若講著革流巴，就想著伊所講hiah-ê無智識ê話，toh會想著主耶穌bat kā伊講，你是無知ê戇人這句話。

但是二千年ê教會史中，互世間人卡懷念ê，實在是另外彼位無出名、無講話，一路靜靜陪伴主耶穌teh行山路ê彼位學生。世間真濟在生無出名，但是死後更加互人懷念：比喻講寫約翰福音ê約翰，音樂家的Beethoven,Schubert,畫家Van Gough,Piccaso等等。In互人更加懷念ê原因，因為in在世ê時是有智慧ê真正ê人。In雖然外表看著平凡，但是in這種人是人間最高ê典型。烏

世間有真濟人真驚人m̄知，真驚bōe出名，真愛爭作啥物長，啥物議員，啥物代表，但是連hiah-ê卡有名ê總統、主席，漸漸互人bōe記得，更加無互人去懷念in。

作一個人有伊動物性ê宿命，親像食飯、睏、悲傷流目屎、死亡等等；但是一個人ê另外一面是伊ê真高貴ê人間性ê彼面：有理想、會作夢、會笑、會唱歌、有智慧及智識、會去尋上帝。Che就是有三度空間ê思想，靈性真高，會看著天使。

人有現實及理想ê二面ê世界。佇禮拜中講道理嘛有理想及現實ê對立、福音及教條ê對立、笑面及嚴肅ê對立、歡喜及目屎ê對立、外面ê世界及內面ê世界ê對立。

真正有深度ê人知影外口ê世界雖然有笑面，但是是假笑，是褂面殼ê笑面；外口ê世界有理論，但是是無血無目屎ê理論；外口ê世界有教條，但是無人性、無溫暖。大家攏浮佇外口，穿到真婿（súi），講大聲話，祈禱嘛真大聲，親像驚人無聽著。

咱愈來作禮拜，toh是欲學習祈禱愈來愈小聲，作人愈來愈謙卑，親像彼位無出名ê佇以馬忤行路ê耶穌ê學生。因為彼種人m̄是簡單ê人，伊知影世間ê代誌m̄是簡單，伊知影咱ê上帝ê十字架m̄是簡單，咱ê上帝m̄免咱為著伊去辯解，咱嘛m̄免時時尋理由為家己辯解，為家己講話；咱寧可將所有ê目屎吞落去腹肚內。咱若將家己ê目屎吞落去腹肚內，上帝ê日頭就會佇咱ê心內昇起，佇咱內心發出心靈ê光，chhōa咱對以馬忤轉去耶路撒冷，勇敢行頭前ê路，啥物攏m̄驚，因為上帝及咱同在。