囝啊，毋通閣哮！

陳柏壽 牧師

阿樹

阿爸抱著五個月的你

天一直暗落去爭佇閣狹閣小經濟艙的一位

天篷的電火嘛熄去

對台灣飛去西雅圖12 點鐘的機程

每五分鐘你toh醒起來哮

哮甲真大聲真悽慘

你是想著你一出世toh過身的媽媽？

你的紅嬰仔目睭豈看有伊？

我將你khǹg佇媽媽冰冷的手懷

你toh佇hia大聲teh哮

你豈已經知老母過身的現實？

或是已經知影媽媽心懷中

對你深深的不安及掛念？

你的目屎滴佇我的胸前

爸爸的se-bi-lo攏tâm去啦！

我嘛毋知欲按怎安慰你

爸爸的目屎及你的目屎攏lām-lām做伙

囝啊！

爸爸抱你轉來西雅圖

是因為我有決心

這世人欲chhiâⁿ你大漢

無論路按怎艱難

爸爸一定欲抱你大漢

佇chia

有無限曠闊的自由天地

有單純的美麗的人性

無封建詭詐陰險的中國人的文化

你佇chia

一定會生長做一個健康快樂平衡純潔的人間

飛機互氣流chháiⁿ真厲害

親像一隻小船佇狂風的大海teh駛

囝啊！Che豈毋是咱爸仔囝

頭前的運命？

每一擺你著驚的哭聲

爸爸toh是驚去吵著隔壁teh歇睏的旅客

但是你的哭聲親像運命的悲歌

向著濛濛的大海

毋受安慰

爸爸的一生就是欲拭去痛苦人的目屎

做牧師

卡困難嘛欲安慰人

但是chit-má爸爸才知影

爸爸毋是真有氣力的牧師

你的目屎及爸爸的目屎攏總滴佇

爸爸的se-bi-lo的頂面

爸爸只有希望你大漢以後

毋通拄著這款大風湧的旅程

希望你永遠用天使的笑容

有法度去安慰別人

親像你離別台灣的時

給阿媽的彼个笑容

爸爸希望有一日

無論你是外大漢

會閣chhoā你轉去台灣看阿媽

也去看阿母的墓仔

彼擺

可能嘛是坐經濟艙

希望彼擺13點鐘的回程

你毋是用啼哭來看世間

會用安靜及笑容來觀察人生