逐日行新街路

March 23, 2006
kap 朋友分享

『逐日行新街路』

加拉太人書2:1-21

陳柏壽 牧師

咱台灣人普通時無真愛旅行。有人驚飛龍機會摔–落-來,有人驚藥包仔chah bōe去,有人驚常常欲去便所無方便。古早60年代,有人來到美國坐–leh放bōe–出-來,規氣khû tiàm馬桶頂。最近我有看中國ê觀光手冊,內底嘛有叫中國人,tio̍h用坐–leh ,m̄通規身軀khû佇馬桶頂(看相片)。嘛有人驚厝內ê黃金鑽石,賊仔會旋(soan)–入-來。總講一句就是:「在家千日好,出門一時難」。咱永遠生活佇「放驚死,放驚飛」ê心理狀態,m̄敢出門,心內閣怨妒別人去旅行。

這次去Houston, 5點tùi Seattle出發是60F,到位下晝2點98F。飛機門一下開,tō鼻著溼溼tâm-tâm ê空氣,kap咱台灣味仝款仝款。莫怪Houston tòa hiah濟台灣人。台灣教會ê許長老來接我。

許長老昨昏開始tō走機場載人客,早起閣去教會通便所,載糞埽。Toraku頂除了我kap伊坐ê位以外,車頂猶是一包一包ê糞埽。有人講咱教會叫做:『台灣基督長、老教會』但是我看chiah-ê老長老,為著歡迎世界各地來ê人客,無暝無日,比少年人閣khah少年。

咱教會ê名叫做『第一台灣基督長老教會』。地主教會ê美國牧師定定唸作『台灣第一長老教會』,因為伊ê心目中,若想著咱教會,第一印象就是想著『台灣』。後來伊tō kā我講:『台灣第一』kap『第一台灣』嘛是差不多–啦!

閣有人講咱教會是『台灣基督』m̄是『美國基督』,嘛m̄是『日本基督』。我想這嘛bē-bái。因為我想咱ê主耶穌不但會曉講台灣話,嘛食ám糜仔配菜脯,包肉粽閣炒米粉,伊ê鼻嘛是親像一粒蓮霧,kap咱阿公阿媽差不多。主耶穌是咱ê骨肉。

彼日我去訪問雪姨姊,伊講咱教會叫做『長老教』,in古早佇台南讀ê學校叫做『長榮長老教女學校』(Chhio-Ei Chhiolo-Kio Jio-Gakko)。佇伊ê心目中,咱ê教會是長老教。88歲ê老信徒,伊teh講in學校是叫做Chhiolo-Kio Jio-Gakko ê時,面貌充滿著信心、光明、希望kap驕傲。

500外冬ê長老教信徒,400冬前移民來美國,hit時叫做清教徒。In創設世界第一個民主制度ê國家。In teh寫咱教會ê規章,叫做『Book of Order』ê時陣,同時嘛teh寫美國ê憲法。莫怪這二本冊,內容攏仝款仝款。攏是規定民主制度,攏是用自由、平等、博愛作in最高ê精神。

咱教會最近才欲開始學習長老教會規章。但是這本規章,親像一桌真phang-phài  chheⁿ-chhau ê料理,咱一時無法度規桌攏食了了,一時欲攏食,胃會拍歹–去。咱tio̍h沓沓仔(tāu-tāu-á)食,沓沓仔學,今仔日食一粒包仔,明á再食彼尾魚仔,後日飲肉湯。慢慢咱ê身軀就會勇健。

Chiah-ê長老教會ê信徒坐篷船仔(phâng-chûn-á),經過幾個月,有真濟佇船頂餓死,有人破病,最後來到in心目中ê自由ê天地,佇chia討趁、生囝、生活、定根。咱台灣人嘛是差不多仝時陣,對真歹過日ê故鄉,冒險坐篷船,過黑水溝,來到in ê新ê天地。

400年後ê今仔日,咱這群台灣人又閣kā咱故鄉講Sayonara,一個羅漢腳仔,經過千山萬水,過太平洋,來到海ê這旁,為著欲尋咱家己心目中ê自由、安心ê世界。

永遠不變ê環球旅行、永遠不變ê信心、永遠不變ê夢,叫做長老教會。

長老教會ê信徒,就是親像蒲公英ê籽,日本話叫做tanpopo, 熟以後逐人攏giâ伊家己ê雨傘,飛–出-去,飛過咱故鄉ê田園,飛過熟悉(se̍k-sāi)ê老厝,飛過行過千萬擺ê老街路,飛過農村都市,飛過平原山嶺,飛過天涯海角,飛到石頭lok-khok無人去過ê所在。雖然是按呢,咱嘛欲puh芽、生根、開花、結籽。

我有去猶太以色列tòa一個月久。佇hia,我bat聽著我ê猶太人朋友tō我講:耶穌是一位無位好去ê羅漢腳仔,伊不過是四界teh廣告賣膏藥,大庄小巷,海邊山嶺,四界傳道理。猶太人keng-thé主耶穌是一位『流浪ê小先知』,最後去互人掠(lia̍h)去宗教ê首都耶路撒冷,作犯人,釘死佇十字架頂。

猶太人用甚麼觀點teh看咱道成肉體ê上帝,m̄是咱tio̍h關心ê代誌,咱今仔日嘛tio̍h確實ài知一項事實:就是主耶穌在世ê時,伊真正是一位連khòa枕頭ê所在to無ê人。無某無囝(kiáⁿ),無依無倚(óa),無財無產ê人。伊講天頂ê鳥仔有巢,野地ê狐狸有洞(tōng),但是伊去到叨位,攏m̄是伊ê所在。

主耶穌無靠祖公ê致蔭(tì-ìm),無宗教ê庇護,無政治的ê靠山。甚麼攏無。

上可怕ê,咱若認真去想起來,咱ê上帝互咱看著ê,抵好(tú-hó)親像teh 看著咱家己ê面。咱台灣人無論佇台灣,亦是移民去世界逐所在,攏有這種孤單ê面形 ¾ 無祖公ê致蔭、無宗教ê庇護、無政治ê靠山。

咱真尊敬ê基督教ê牧師保羅,伊嘛是一位人生ê渡鳥。一世人攏是靠聖靈ê引導(chhōa)。聖靈本文ê意思,就是『風』。風今仔日吹這旁,伊就向這旁行;明á再風吹向彼旁,伊就向彼旁行,坐船過海過去。保羅一世人,kah主耶穌仝款,m̄-bat定一定ê時間表,m̄-bat講一定欲去叨位,若是聖神有指示,伊就勇敢向前,無一擺推辭。

有人講一粒石頭liàn來liàn去,khîⁿ無青苔。有人講:腳倉位tō坐bōe燒,欲按怎會生雞蛋!三日搬一擺厝,四日換一擺頭路,欲按怎儉有錢–leh !

東方農業社會ê人,一年四季時間訂好好,甚麼時陣種甚麼,甚麼時陣收甚麼,攏有一定。一間厝tòa落去tō是幾nā代,叫伊坐飛機去旅行親像欲愛伊ê命。這代祖產傳in囝(kiáⁿ),連傳孫嘛計劃到好勢好勢。

這種人生觀kap保羅kap咱ê主耶穌ê人生觀,有真大無仝款ê所在。

保羅一世人四擺傳道旅行,四擺攏行無仝款ê路。伊第一擺旅行是chah錢去Jerusalem去振濟教會內散赤ê兄弟。佇耶路撒冷,因為巴拿巴ê介紹,伊才有法度見著教會ê大使徒彼得、雅各。

巴拿巴佇教會內比保羅khah老資格,性格kap保羅嘛真無仝款。保羅性格真強,想定欲做甚麼tō去做,無人擋伊會tiâu,khah危險ê所在伊嘛敢去,伊會受氣,會kap人冤家。

巴拿巴老神在在,性地溫柔閣和平。保羅第一次ê傳道旅行雖然是成功,但是伊tō看出伊無法度kap巴拿巴作伙傳道。保羅是一位開山闢地ê托荒(thok-hng)者,伊是一台開山機,一直lu去。巴拿巴不過是一位耕作者,佇hia沃水(ak-chúi)搓田(so-chhân)種作。

保羅ê性格,tō是逐日攏愛佇m̄-bat行過ê街仔路行,伊才會甘願。巴拿巴若m̄是伊熟悉ê街路,伊tō無欲去。

所以對耶路撒冷出來,來到居比路,就是今仔日ê Cyprus, 就是chím-á Turkey  kap Greece teh相爭ê小島,亦就是巴拿巴ê故鄉,巴拿巴就留佇hia ,無欲閣tín動。

巴拿巴tō保羅講:你tio̍h去古早傳道理過ê所在傳道理,去有熟悉ê土地傳道理,去猶太人ê所在傳道理。

對彼日開始二人行二條路:巴拿巴行向陸地去,對hia開始,巴拿巴佇聖經中ê傳道舞台就完全無消息,伊ê名無再出現。保羅pôaⁿ過Bosporus海峽,基督教第一次進入歐洲,進入愛琴海,進入地中海ê世界,進入廣闊ê海洋傳道ê世界。

保羅心內有一個真強ê意志:就是伊干單(ka-taⁿ)去到無人去過ê所在,去無猶太人ê所在傳道理,伊心內才會甘願,才會滿足。

保羅內心第一大ê傳道原則,就是佇基督耶穌內面ê自由。基督耶穌就是自由。真理就是自由。佇耶穌基督內面有真理,所以有自由。這點m̄是干單嘴teh講,是只有親像保羅這種真有遠見、有氣魄、有意志ê人,每一日teh行路,每一日teh戰爭ê時,才會tàng體驗著ê道理。

佇第五節寫講佇保羅ê四周圍,有真濟好人、好ê基督徒,保羅叫in作『假ê兄弟』。Chiah-ê假兄弟加入佇in中間,處處teh講這點bōe使、彼點bōe使,猶太律法有講這點、有講彼點,處處設真濟圍牆來kā保羅pa̍k腳pa̍k手,想欲限制保羅ê行動ê空間。保羅講:Che是欲迫伊作『傳道ê奴隸』。

一方面保羅teh傳自由ê福音,另外一方面閣欲叫伊受律法ê制限。Che是真大ê矛盾。保羅講:『No!』『Hiah-ê有頭有面ê人,in按怎講,kap我攏無關係!』佇11-15節中,保羅真無客氣tī hiah-ê有頭有面ê巴拿巴、彼得、雅各kap其他使徒ê面前講,in teh傳ê m̄是主耶穌ê福音。

保羅teh講主耶穌基督ê福音,tō是講:恁猶太人,照猶太人ê律法去行,OK! 但是恁無資格叫m̄是猶太人ê人,去照猶太人ê律法去行。

M̄是猶太人ê世間各民族,上帝有設立in各種無仝ê文化、語言、習慣、律法、思想去管理。恁是恁,in是in,河水bōe犯井水,海是海。山是山,魚是魚,蝦是蝦,m̄通青龜濫(lām)田螺。

保羅ê自由福音tō是講:Chiah-ê文化、語言、習慣、律法、思想,攏m̄是得救ê條件。世間人欲得救,只有簡單ê一條路:信耶穌,信耶穌是救主,信伊不但是世間人ê救主,亦是世間自由精神ê救主。

保羅身邊ê人,因為保羅這種堅決ê信仰,漸漸就受伊ê影響。第一次傳道旅行了ê時,寫馬可福音ê馬可,伊就是巴拿巴ê孫仔,亦就是巴拿巴ê阿姊馬利亞ê囝(kiáⁿ),當初無欲聽保羅ê話,坐船轉去耶路撒冷,去tòe彼得。彼時彼得是行中間路線,一時靠這旁,一時靠彼旁,kap陳水扁仝款,chím-á二人煞(soah)反悔,相招去羅馬開拓新教會,甚至死佇羅馬。

保守頑固ê心靈,佇主耶穌ê自由ê福音ê感化以後,伊嘛會改變,會變到比甚麼人攏閣khah勇敢。自由ê福音真無簡單,伊tio̍h行ê路,比甚麼攏khah坎坷(khám-khiat)歹行。所有自由神學ê牧師,攏是基要派ê牧師,因為kap保羅仝款:只有主耶穌是in ê倚靠;但是所有基要派ê牧師,無法度成作自由心靈ê牧師。

宋泉盛牧師頂禮拜佇Houston講一句話:伊講若主耶穌今仔日佇台灣出現,第一個出來反對伊ê,可能就是咱chiah-ê台灣ê長老教會ê牧師。因為主耶穌威脅著in ê飯碗。牧師人m̄通干單想伊ê飯碗,佇chia作標準廟公;咱作信徒嘛m̄通全時全日去互飯碗pa̍k死死。

基督教會會發展出二種形態:一種是變作真保守ê勢力,親像teh分配政治權勢ê運作,用教條作中心,只有照顧家己;另外一種,就是人人攏是成熟ê蒲公英,人人攏giâ伊家己ê雨傘,飛–出-去,日日面對靈魂、感情、智識、信仰ê風湧,去冒險,日日去行新ê街仔路。佇生分ê所在,恐驚時時tú-tio̍h真大風湧,時時風颱真大,kiám-chhái tio̍h去流浪。

有一日,咱若佇這個流浪ê街路sio tú ,『啊!你thài 佇chia !?』真歡喜,真感謝主!

 

祈禱:

主啊,一日過一日,一禮拜過一禮拜,佇你ê聖會敬拜你,感謝讚美你。

但是你嘛有叫阮出去。阮m̄是干單佇教會見面,tio̍h去街仔路,去普天下傳福音。主啊!求你加添阮ê信心,chhōa阮行一條真有信心、真勇敢、真健康ê天路。

你有應允,凡若流目屎出去iā種ê人,有一日欲歡歡喜喜收成。

祈禱靠主耶穌基督ê聖名。阿門。

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致