順天及認命

November 8, 2015
kap 朋友分享

「順天及認命」

Nov. 08, 2015

陳柏壽 牧師

祈禱

主啊願你àⁿ耳孔聽阮的祈禱。阮有身軀病痛、心神欠安的所在,請你毋通pàng-sat阮,請你毋通離開阮,只有上帝你是阮佇這世間最後的倚靠,你是主宰阮生命的源頭。主啊,阮佇這世間,無論用頭殼想,用腳行路,用全身軀做人,一切的一切,攏是對你hia來。阮每一日攏著感謝,因為你是阮的上帝,阮的生命。阮的一生無論活佇反抗或是認命,你交代阮著徛起來,徛挺挺行路,親像一個人。願你聽阮祈禱的聲。按呢給你懇求祈禱,是奉靠救主耶穌基督的聖名。阿們。

 

頂禮拜咱聽著崑南牧師用約拿的冊給咱勉勵,我最大心得的一點:伊講約拿的上帝是大海及乾地的上帝。古早的猶太人看大海會驚,大海是魔鬼及海龍王的所在。但是約拿書教咱講,咱的上帝不但管陸地,嘛管大海,海龍王及海翁攏著聽伊的話。約拿逃入大海,去互上帝拖轉來陸地曝干。

約拿佇Joppa想欲偷坐船去他施。我有去Joppa海邊thit-thô,開真濟紅貢貢的hybiscus紅燈仔花。Joppa出產的柿仔真甜。

上帝互咱台灣人生做海洋民族。咱的祖先幾千幾萬年前,kô͘一隻獨木舟,對台灣踅(se̍h)到Polynesia, Micronesia, New Zealand,澳洲,向西,kô͘到Madagasca,踅到越南,福建,向北踅去沖澠,Okinawa,oki就是海邊, nawa就是澠(só͘-a的意思)okinawa就是結連日本及台灣中間的一phāiⁿ só͘-a的意思,古早是咱台灣人活動的所在。

咱台灣人的獨木舟(canoe)嘛吹到Hawaii,吹到Hawaii的海邊,人攏喝Aloha!意思是講歡迎歡迎!Hawaii的人真sêng台灣人,真土公仔性,無二句話toh欲起大聲。Hawaii海邊干焦(kan-taⁿ)掠(liah) 3 種魚仔,第一尾掠著,喝講「啊魚仔!」所以叫做「ahi」,第二尾掠著,講這尾「嘛魚仔!」所以叫伊「mahi」,第三尾掠著,已經毋知欲按怎叫,所以講這尾是「嘛魚仔!嘛魚仔!」所以魚仔名叫「mahi mahi」。

阮厝欲去教會hit條路,是阮女王的名,叫做Kanai-ana-ole,後來我才知影,原來hit條路名就是講「腳nài遐爾烏咧!」

阮上媠(súi)的海邊叫做Waikiki,原來咱台灣人看著海邊的椰子,互風吹到歪閣khi-khi,所以給伊呼名叫Waikiki。

阮有一個真高級的mall,叫做Anaboana,啥物貴som-som的珍珠鑽石攏有,原來才知伊的意思就是:「阿若無beh an-noa!」

咱做台灣人著感謝上帝,因為地球頂面有3/4的海水,咱的祖先就是佇這個廣大的海洋teh生活的海洋民族。

人去互上帝趕出伊甸樂園以後,變做二款人:一款繼續佇伊甸園東邊,繼續佇hia顧門,親像鳥仔毋敢飛出去。顧佇伊甸園的門口,叫做「gate-keeper Christians」。

美國及咱台灣教會有一點無仝,就是美國人親像放出籠仔的鳥,因的信仰及思考的基礎是「自由」;但是咱台灣人,來到北美,雖然嘛是放出籠仔的鳥仔,但是你叫伊飛出籠仔,閣毋敢飛,看著外口的「自由」會驚,最好oan-na顧佇籠仔內卡安全。放驚飛,捏驚死的台灣人的信仰。這是大陸中國文化教育的結果。

美國教會chím-má真少聽人講大聲話。佳哉咱教會有這個機會,重頭開始。做一個毋免講大聲話的教會。世間有遮爾濟十字軍的牧師,佇講台頂濫用因的權威,破害人本性的「良知」,親像廟仔口的王祿仔仙。

這款人漸漸khah少啦。因為咱台灣人的心靈的本質真高。經過大山大海,千辛萬苦,來到美國,品質一定無共款。

我看咱台灣人的心靈卡活。台灣人你若講二句,伊會bat十句。台灣人,尤其是toà佇海外的台灣人,毋敢kha̍p-bē-tio̍h toh欲罵人,講別人「無靈性」。我想世間人每一個人的「智慧」及「靈性」攏差不多啦!

有一擺去Canada講道,會友chhoā我一家去Whistler坐gondora:這chit山poâⁿ過彼山,這條gongdora換過hit條,二支腳吊佇天頂,幌(hàiⁿ)kōng幌,目睭看落去,下腳是山崁深坑,腳尾一直欲浮起來,心臟一直欲跳出來。

細漢時陣的囡仔歌:人插花,你插草;人抱嬰,你抱狗;人坐轎,你坐捙畚斗(chhia-pùn-táu)。捙畚斗坐無好勢,會倒頭栽。這個捙畚斗可能有sêng chím-má的gondora,不管時有倒台的機會。

我想著古早一個電影叫做「I-ki-ru」,彼個老爸坐佇gongdora,中國話叫做tang chhio-chhian, 台灣人阮古早叫做hàiⁿ kong-chhiu,可能及古早日本人講gondora有關係。

Gondora有二個意思:一種是義大利Venice佇港內用人咧撐(theⁿ)的船仔;另外就是Canada Whistler山頂的吊車。

二個老ang-kong-po-仔佇關西廣島庄腳做田。生二個查埔,一個佇戰爭的時互人召去南洋做兵,chhun一罐骨頭灰轉來,娶一個某,無生,chím-má去東京的品川的鐵枝路邊teh共人剃頭;一個查埔的,艱艱苦苦栽培伊大漢,做醫生,chím-má 佇東京開業。

二個老–的攏毋捌去過東京,嘛想欲看孫仔。最後決定欲去東京thit-thô一擺。老歲仔毋甘坐快車,坐上慢的慢車,碇-khiau-khiau的柴椅仔,kho̍k 8 點鐘才對大阪khok到東京,坐到giōng欲khiau-ku去。

彼個做醫生的翁仔某講,因為患者真濟,真無閒,無法度給因招待。生的二個孫仔,看著阿公阿媽親像生份人。欲chhoē孫仔,孫仔走互你jiok,無欲chhap阿公阿媽。因死去的大囝娶的某,彼個外口人的新婦,真有情,一直拜托二個老人去tòa怹兜。厝真狹,6塊tha-tha-mi,新婦將伊的眠床,讓互老歲仔睏,伊家己佇門邊(gen-kang)的頭前,舖一領毯仔,睏佇遐。

過暝日日頭真猛,二位老人毋知欲去佗位,坐佇曝衫的belanta頂面燒燙燙,看外口鐵筋khong-khu-li的東京,頭殼戇戇。噯喲oè,東京原來就是按呢!

最後因囝講咱來送oto-san及okaa-san坐火車去Atami (熱海)洗溫泉。he是富士山下面箱根(Hakone)靠海邊的所在。一下入hotel,人就是人,唱ka-ra-oke,歸群少年人咧啉酒,pok薰、吵到giōng欲死去。

最後老爸共老母講咱來去看海。二個老歲仔坐佇海邊的堤岸頂。黃昏的海邊,海風咧吹,日頭tih-beh落山。老歲仔講伊頭殼teh 起gông,二個手牽手,toh轉來hotel。

過暝日較緊toh閣坐慢車轉來東京品川。老人想著庄腳的所在比tòa佇東京較好,就講欲較緊轉去。閣坐8點鐘無冷氣的慢車,khok轉去家己種田的廣島故鄉。

轉去無二日就收著電報講老爸破病請轉來。出發前彼個做醫生的大囝toh講,咱著chah彼su烏衫的禮服轉去,意思就是講老人已經差不多啦。

導演kurozawa akira互我印象真深的所在,就是演老人的Takashi Shimura 佇日頭tih-beh落山的時,彼個年老的老爸,最後坐佇厝邊幼稚園的gongdora頂,hàiⁿ kông-chhiu,唱hit條gongdora no u-ta。

—–

(人生實在真短,古早初戀的愛情仔故事,giōng 欲boe-kit啦,紅色的胭脂,真緊會退色,少年時代的熱情,漸漸欲冷落去,我leh chhoē 明仔載的年日,明仔載佇叼位?)

人生真正親像咧坐gondora,對這山開始吊到彼邊山,閣對彼邊山,經過山崁山坑,吊來到這邊山。對台灣彼個海角,吊過大海,吊來到美國。來到這個無嘴、無目睭、無腳、無耳孔,路頭生疏毋捌人的所在。咱坐這隻gondora吊車,閣落去,下choā欲吊去佗位?真濟頭前的路,咱家己毋知。

Hiòng當時阮老爸做國民學校老師去互人吊去大湖底、樟湖、草嶺,後來閣互人吊去台北,6個囝tòa佇民生路一間細細的違章建築,87水災一下到,古早的冊、相冊攏淹了了。後來搬去士林石牌仔,做老師45冬退休。6個囝攏大漢,大學畢業。chím-má想起來,這個上帝,7/80年來,嘛是toè佇阮這台gondora內底,毋捌離開阮。

40幾年前娶日本某,佇東京街路流浪,路頭生疏毋捌人,家己一個tiāⁿ tiàⁿ佇東京的街路,oān-nā行,oān-nā流目屎。上帝嘛toà佇阮這台細細的gondora內面。後來囡仔漸漸大漢,上帝講阮著去NewYork讀神學院,就將阮這台gondora吊去美國,kan-na一siū鳥仔巢,hoa̍h講:「Let’s go!」 ,toh飛起來,飛來到美國。Chím-má 4個囡仔嘛攏大漢,攏大學畢業。這台停佇西雅圖的gondora ,只有靠上帝來牽。

Gondora無欲停步,咱的人生嘛無法度停步。gondora不但無互你停步,你的路線嘛定好勢好勢,人生的路線,冥冥之中,上帝共咱set好啦。不但袂當換lane,嘛袂當換車,袂使講阮這台siuⁿ慢,欲跳去頭前hit台。

但是gondora會共咱送到人生的山頂。去到山頂看落來,心涼嗶吐開。人生著對高的所在看落來,看卡會明。

這個gondora的老人,就是一個典型的人生。對做田的故鄉出來,毋捌來到大都市的東京。欲看囝孫仔,無人咧給伊知道。最後二個翁公婆仔,緊咧閣轉來家己的老厝。

這個老人,目睭真金,做一個勇敢的人,徛thêng-thêng去見上帝。做一個順服上帝的勇敢但是平凡的人生。

約伯記仝款記載另外一個勇敢的老人。伊一生干單希望會當平安順事過日。聖經中有真濟真濟所知,毋是猶太人的手寫的,以後有機會及列位討論這個主題。

聖經是猶太人及外邦人的綜合体,主耶穌及聖保羅實在是反猶太教的先鋒及革命者。主耶穌bat警誡猶太人:「恁毋通靠勢亞伯拉罕是恁的祖公,上帝會當對石頭篷逼出亞伯拉罕的子孫」。保羅佇羅馬書11章所主張的要點,毋是在佇野橄欖及好橄欖的分野,是在佇最後的8 節,恁chia-ê野橄欖及好橄欖,攏仝款「惹上帝受氣的族類」,但是攏是受上帝接佇落去人類歷史的大樹。

選民主義歷史以來攏有真大問題,無論是Hitler或是近世紀的亞洲、非洲、歐洲,除了美國這個「法利賽人俱樂部」以外,已經真少人講選民主義。

總講,咱的上帝毋是猶太人「族群的上帝」,是「普世的上帝」。頂禮拜咱這間教會的Tony de la Rosa牧師講,這間教會接納回教徒做禮拜,做伙食飯,因為咱的上帝是世間萬國萬民,各文化、各宗教的上帝。

總講,這個約伯是外口人,這本冊毋是猶太人寫的。這個外邦人欲及上帝khau-chháu,欲求生命的一個公道。

約伯對頭到尾毋捌求上帝閣還伊的囝兒、牛、羊財產。約伯若是為著chia-ê用40章tn̂g-ló-ló的話來及上帝khau-chháu,我想二千年來,這本冊早toh去互人phiaⁿ落去糞埽籠,無路用啦。有人講這個第42章,是干焦對功利主義的人間有路用,對無信仰的人有路用。

這個老人平順的生活中忽然間來一陣大風,將伊所有囝兒查某囝攏teh死了了,無têng-tî所有財產攏互人搶了了,最後伊家己破大病,坐佇gîm-chî口,用hāu-hia phoè khak伊的粒仔。

世間有遮爾濟不可思議的代誌發生,甚至發生佇咱面前:4年以來,真gâu祈禱,講道真大聲的宗教人,竟然去銀行欲去領上帝的錢。不可思議的代誌,就是發生佇咱的身上。世間的公道佇佗位?現實的世界,及人性的惡質,及gâu講宗教語言,及咱的上帝無關係。

約伯的3、4個朋友,講啥物申命記的道理,講甚麼你若做好,你若信這位申命記的上帝,一定會興旺,一定有大財產,一定有濟濟囝孫,一定長歲壽。現實的世界豈有影按呢?

信上帝毋是欲信一個互人興旺的上帝,是信一個拄著災難、逆理、無公道、無位好去的時,會當求叫,會當去哭死賴的上帝。約伯的信仰叫做:「哭死賴」的信仰。「哭死賴」是咱做基督徒應該有的信仰行為。

忽然間拄著破病,忽然間發現著癌、著心臟病、糖尿病、pakinson,毋免驚,毋免著急,毋免求緊好,放互上帝。

Magaret最近bo-teng-ti腦充血,我卡電話時,伊給我講,我chím-má看真開啦,心肝真平安。我chím-má毋免想欲儉錢啦,會當用tò給伊用互了…

我想約伯記教人講的就是這種非常不安,無法度預料的「無常」的世界。這就是咱活的生命的現實。

約伯上艱苦的時,伊雖然無講伊咒詛上帝,但是伊凝佇心內,伊只有咒詛家己,干焦伊對母胎出世彼日,上帝啊,你是按怎互我出世來這世間,怎樣互我走頭無路?

約伯欲直接及上帝講話,伊無欲經過主教、牧師、祭司頭、朋友,無欲經過任何機關、教會、政府,無需要任何中間人,特別無需要經過hia-ê食教的人,咱欲直接及上帝講話。

上帝啊,我真毋甘願,我無欲接受我hiah-ê朋友講的話。我chím-má互你打倒佇土腳,只有求你互我徛起來,「互我親像一個人」, 我欲徛起來。我的人生拄著悲慘,請你互我面對面kap你講話。請你互我有機會互我辯解。

我佇New York Columbia 大學的博士論文嘛是寫著:「反抗行為的哲學基礎」。

我認為咱的人生及咱的上帝仝款,一直及上帝直接講話。無論呵咾、感謝、怨嘆、嚎叫、反抗,攏著直接求叫上帝。上帝是咱的天父,伊毋驚咱的怨嘆及反抗,因為怨嘆及反抗,是出佇人類最純全的靈魂,是最美麗的人性。咱的上帝嘛是為著反抗伊家己,對安適的天堂,道成肉身,降生來世間。

約伯最後的hit句話是講:上帝啊,古早我風聞有你,chím-má我親目看著你。你的創造實在奇妙,我無法度瞭解。請你互我平平安安轉去墓仔內死死咧就好啦,Please leave me alone! 約伯豈真正親目有看著上帝,或是伊是看著一個及人思想無仝款、腳步及人無仝款的上帝?

約伯記講的毋是錢財的問題。你佇42章,加倍互我財產,對我嘛無路用。上帝啊,請你互我一個平凡順天的日子,毋通互我拄著擔當袂起的代誌。上帝啊,請你互我會當真正看著你的面,嘛互阮會當徛起來,做一個真正的人。

咱應該確信,有一日,咱的上帝會互咱看著伊真正的面形,看著伊是一個公道的上帝。

聖經以賽亞講:你出世的時我就抱你、偝(āiⁿ)你、牽你、mó͘你佇我的胸前;一直到你年老,到今仔日,我猶是按呢;你一直到頭毛白siak-siak,我猶久phō͘你佇我的胸前。我欲造你、抱你、拯救你。這就是咱的上帝。咱的上帝的心肝。

頂禮拜佇Renton咱聽著「打狗亂歌團」的嚴詠能兄歌聲,我感動到流真濟目屎。伊講:咱轉來去!對紅嬰仔,我著toh抱你,經過青春,經過滄桑流浪,經過海外的拍拚;當初你欲出門去美國,阿爸交互你hit支鎖匙,攏無換,teh等你轉來!

只要大家攏食台灣米,囝兒孫大家出頭天;

老水牛、白鴒鷥、稻草人、唸歌詩。

土地公伯仔你toh鬥保庇,

烏雲若過,就緊轉青天;

稻仔芳芳,心情就歡喜。

只要大家攏食台灣米,

chhap伊啥物WTO;

老水牛、白鴒鷥、稻草人、唸歌詩。

祈禱:慈悲的上帝耶穌基督,願你互阮的故鄉台灣,早日出頭天。你互阮的人生親像坐佇gongdora的內面,haiⁿ-kong-haiⁿ haiⁿ-kong-haiⁿ,天父上帝你欲給阮hàiⁿ去佗位?阮是m̄是著放伊kà-goán giú 到山頂,閣放阮落崎。無論甚麼情景,上帝啊,懇求你互阮安心。因為倚靠你,佇你內面,阮有平安,阮故鄉台灣嘛有平安。阿們。

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致