拆除「火燄劍」的障礙

May 13, 2015
kap 朋友分享

拆除「火燄劍」的障礙

聖經:創世記3:22-24,腓立比人書4:8-9

陳柏壽 牧師

 

2011年3月11日本東北地區發生日本歷史以來最大的地動及海嘯,日本話叫tsunami。只有20幾分鐘喪失20,000人的生命,2,500人的身屍揣無,到今仔日猶有20幾萬人無厝。kisenuma一個中學生,4年以來定定夢著大水淹來的時,看著因爸母的手向伊伸長長,伊的手嘛一直向伊的爸母伸長長,但是三枝手攏摸袂著,逐暗就是按呢流目屎醒起來。

最近我及美國基要派的信者討論這個問題,有人講日本人該死,因為因攏拜邪教,所以無上帝保護。我感覺毋是日本人可憐,是有這款想法的人苦憐,因敢用上帝的名,歸罪受苦難的人。嘛有人講幾年前印尼的Aceh海嘯死幾仔萬人,是因為Aceh人愛獨立,欲對印尼獨立出來,做獨立運動,是因家己造成的災業。這幾日尼泊爾大地動,瞬間死8、9千人。

使徒保羅講:「見若真實的、可敬的、公義的、清氣的、可愛的、有好名聲的、或是有甚麼德行、有甚麼通稱讚的,恁攏著思念。恁對我身上所學習的、所領受的、所聽見的、所看見的,chia-ê代誌,恁攏著去行。賜平安的上帝,就必及恁同在。」及現實世界比起來,保羅講的彼個世界若準是另外一個世界;伊講的彼個上帝若準是另外一個上帝。

若是真正有保羅所講的彼款世界,就親像咱轉去佇伊甸樂園 (Ài-tiān Lo̍k-hn̂g)的世界。人猶未互上帝趕出去伊甸園以前,人毋免煩惱食、煩惱穿,無穿衫嘛佇園仔內lo̍k-lo̍k se̍h,毋驚伊是褪褲卵。反正日日過日,歡歡喜喜,日頭出來目睭thih金,日頭落山就目睭kheh-kheh。毋免起厝,也無風颱落雨,毒蛇及老虎嘛袂咬人,因為樂園內面的動物無動物性,各種動物攏親像天使,因為賜平安的上帝及因同在。

佇這地面,人是動物性及人間性的綜合體。佇樂園內,人間無動物性。樂園內人的社會生活,就是人的良心及良知。人的靈及魂可以及上帝直接交通,直接講話,上帝是咱的朋友(約翰15:15)。所以佇樂園內,毋免社會的倫理規範及律法,上帝活佇人人心中,所以毋免律法。(使徒17:27,28)

上界幸福的代誌,就是佇hia你毋免分別好歹,人毋免煩惱甚麼代誌是好、甚麼代誌是歹。毋免用頭腦,毋免用理性去思考,萬事交代上帝:上帝叫咱行正邊,咱toh行正邊,叫咱行倒邊,咱就行倒邊。

不但按呢無煩無惱,咱會永遠活佇hia,永遠活佇hia,無人趕你會走。

我有一個朋友,是真愛釣魚仔的退休醫生。我問伊太陽花運動的代誌,伊講伊毋捌聽過。伊teh看電腦干單看今仔日海漲是幾點,低潮是幾點。這個月魚仔幾尾入港,tang-sî的魚仔肉卡甜。

我想這款人若準生活佇伊甸樂園,無煩無惱,世間的代誌,尤其是大的社會問題,毋免用頭腦去分別是非。伊講去煩惱hia-ê是是非非,真無意思。

李前總統及史明老先生真會曉唱「愛拚才會贏」彼條歌:「3分天注定,7分靠拍拚,愛拚才會贏!」咱日日teh拚,拚甚麼?人生若是7分天注定,3分靠拍拚,何必拚到hiah艱苦?無緣無故,你是teh拚甚麼?實在真無意思!

但是咱做基督徒猶繼續teh拍拚,來chhoē耶穌基督的福音對咱的生命的根本意義。

真正有影,自從上帝給人趕出樂園以後,一切人生的苦難就按呢開始:食早頓了就開始煩惱今暗欲食甚麼。聖經講人著流汗滿面才有飯通食,無做工的人袂使食飯(帖後3:10),日到暝,一直拚,一直拚。查某人生囝開始會疼、會艱苦,開始有「生出來雞酒香,生未出來四塊枋」,生囝是生命交關的代誌。

這款代誌,佇樂園內面攏無。生囝親像生雞卵,生出來toh 咯咯雞、咯咯雞,歡喜到未顧tih。

上帝最驚的代誌,就是驚人bat傷濟,驚人siuⁿ有智慧,驚人siuⁿ過頭有思考,驚人有永遠的活命 。驚人及伊仝款。所以上帝派天使顧守伊甸園的東門,閣發動會「發火的劍」,顧佇園門口,不准人類閣踏入伊甸園,不准人類接近生命樹。

對彼陣開始,人會短命是無法度tâi-oâ的代誌,親像耶穌問咱的彼句話:「恁甚麼人會當用掛慮互恁的生命加活一刻久呢?」(馬太6:27)「掛慮」意思就是思想、學問、智識、技術,chia-ê代誌攏無法度互人長命。上帝互人有限的生命是上帝管理人唯一的方法。主耶穌知影咱攏是活佇伊甸園外面的人。

智慧及智識雖然是一切人生苦難的源頭,但也是人一切進步的源頭。是按怎有人拖磨一世人,飼母囝飼未飽,是按怎有人二三下se̍h一lèng,就家財萬貫,毋是干單「生死在天、富貴有命」這句話會當解決的。較濟是伊有「趁錢的智識及技術」。這就是逐家攏欲拚大專聯考,大家欲爭入去台大、Harvard的原因。人欲利用國民黨做巨蛋,做歪哥的三創商場。chiah-ē代誌需要「趁錢的的智識及技術」。趁錢不過是生命的「低層次」的部份。家財萬貫無一定是上帝互你的恩典,是只有在佇你有趁錢的智識及技術。這不過是卡「低層次」的生命。

彼尾蛇教咱著有「智識」的層次,但是無「生命」的層次。蛇佇土腳teh趖,但是伊teh趖的時,蛇頭向頂面,蛇頭chhèng佇頂面,叫做「智識的驕傲」,智識就是一切。蛇給人類講:「上帝愈無愛你知的代誌,你著愈愛去知,因為只有chia-ê代誌才是你生活的基本」。蛇可能給人類按呢講:「人啊,你實在有到戇,上帝愛你逐項攏毋知,就是無欲互你及上帝仝款。你若是逐項攏bat,閣袂死,上帝就管你袂tiâu啦!」

但是這種蛇的智慧,叫人著用「理智」、「理性」、「追求智識」、「邏輯」、「科學分析」等等來生活,這是屬佇生命的「低層次」。人人攏活佇這個「低層次」的世界內面。這種蛇的智慧,真感動咱的心,互咱感覺真有道理。但是這個道理,及這個道理所造成的生存的矛盾及悲劇,一直延續到今仔日,世世代代,無法度解決。

生命有一個「卡高的層次」,就是超越理性的生存。理性袂當解決生命的問題。真濟人間的智識及理論,實在是紛爭的起源。卡gâu爭辯,毋是表示伊卡著,只是愈辯愈講愈袂清。人講伊是用科學精神teh爭論,但是真正的科學精神,是在肯定所有科學定理的時,知影有可能發生「錯誤」的事實。這才是真正的科學精神。

真正的科學精神,就是會當倚靠上帝,暗時會當平安安眠。安眠的時,就是人間最大的幸福。人會當安眠,毋是靠思考才會安眠。會當安眠歇睏,正是生活佇生命的「最高層次」。

當初上帝佇混沌的宇宙中安置地球,同時設立互人安住的「樂園」。樂園內最大的特點就是互人安心及信賴。樂園內面的生活毋免驚,生命有上帝眷顧。

宗教改革時代路得馬丁最有名的論說之一,就是「上帝」及「惡魔」二個極端的鬥爭:- 「光明」及「烏暗」的鬥爭。雖然聖經有講:上帝創造光明嘛創造烏暗(以45:7),約伯記內面的魔鬼,嘛是上帝手下一位墮落的天使,但是這個天使勢頭真大,有法度試探上帝。啟示錄內面hit隻大紅龍,就是魔鬼,佇天頂及天使戰鬥,互天使拍到摔落來地面(12:7ff)。但是這個魔鬼佇地面作威作福,苦毒世間,一直到今仔日。人類佇地面,挾佇上帝及魔鬼的中間,實在有夠苦憐代。

用耶穌基督的福音來推想這二邊的極端,咱會當發現有二位上帝:

  • 這個給人趕出伊甸園的上帝,及福音書所講主耶穌的上帝,m̄是同一個上帝;
  • 叫人用靈性及信心過日,及用理性及智識生活的上帝,m̄是同一個上帝;
  • 用律法束縛管轄人的上帝,及用愛的福音賞賜人類的上帝(希伯來7:19),m̄是同一個上帝;
  • 命令大水來淹世界的上帝,及用虹做愛人的記號的上帝,m̄是同一個上帝;
  • 叫人著用割禮做得救的條件的上帝,及叫人毋免割禮,只有信就得救的上 帝,m̄是同一個上帝;
  • 日日求赦罪,互人永遠洗未清原罪的上帝,及應允人得著赦罪,應允人有自由的上帝,m̄是同一個上帝;
  • 互世間有瘟疫、破病、癌細胞的上帝,及互人有健康的身軀的上帝,m̄是同一個上帝;
  • 互世界突然發生津波、地動、風颱的上帝,及維持風調雨順、四季和諧運作的上帝,m̄是同一個上帝;
  • 賞賜人類原智、純真、信賴、信實的上帝,及互人用競爭、欺詐、誘惑、強勢、武力的方法才會當生存的上帝,m̄是同一個上帝;

我想世間這二位上帝,若m̄是互相對立,就是這個上帝poâⁿ過另外彼個上帝來存在,抑無就是這個上帝屈服佇另外彼個上帝之下。這二種性格完全無同的上帝,無法度共存。

自從離開樂園以後,人著靠理性來生活,理性產生制度、律法、教條、意識型態。人世間所有政治獨裁、軍事霸權、社會不平、生理人及財團的惡質,攏是chia-ê律法、教條、意識型態的產物。

但是今仔日咱teh看十字架的福音,才發現十字架是一個真利的武器,就是衝破火燄劍的武器。十字架chhoā咱勇敢進入樂園的世界,十字架拆毀火燄劍的障礙,chhoā咱進入一個新閣平安的所在。

自從主耶穌降生世間以後,人類有限的生命變做人類再生的唯一的一條路:「經過死亡,人類得永生」。只有經過耶穌,人類拍破蛇互人的咒詛。經過耶穌,人類應該會當進入伊甸樂園,有法度接近生命樹,有法度得著生命的權力,人的靈魂有法度去摸著上帝,人會得著「永生」。

理智的世界給人講,人靠理智及智識會互世界安定及秩序,人用理智及智識來控制社會秩序及人間的行為。但是咱看這世界的自然災難及人的社會生活,不但無互人更加安定及秩序,反轉產生真濟意外及矛盾,世間代誌愈無法度預料。人愈有理智及智識,世間的真理愈無明。

離開樂園以後的人,生活佇律法之下,對宗教的教條,到國家社會的法律,甚至到生活的全部:食、住、思想規範,濟到親像牛毛,給人縛死死。社會愈複雜,律法愈濟,人愈gâu犯法,人性愈狡怪。用智識刣人比用武器刣人卡惡毒,刣死的人愈濟。

智識犯的犯罪,比單純的人更加嚴重、更加惡毒,更加不容易發現。譬如講美國是上gâu標傍伊是最愛和平的國家,口口聲聲是愛及仁慈,但是伊是擁有世間最濟核子炸彈,也是世界最大的武器生產的所在。美國的基督徒是生活佇這款矛盾的世界。你是愛揀一個民主、自由、人權的美國,或是一個帝國主義陰險的美國?咱活佇美國親像一隻做繭自縛的毛毛仔虫,一隻盲從、互人牽鼻仔lok-lok-se̍h的動物。

嘛會使按呢講,世間人時常將正反合做一夥,「甘蔗雙頭甜」,因的根本價值觀念就是「二邊通吃」,欲合理化因全部的行為。但是「正」及「反」真正會當合做一夥嘛?

所以今仔日的人類開始追求樂園世界的非理智及非智識的部份,就是開始追求真正的福音。人的「生命」比社會制度、律法、教條、意識型態卡大。人用「心肝」過日比用頭殼過日卡重要。

實在看起來,人用心肝過日是另外一種真正的「理性」,就是卡大的做人的理性,這種無受智識系統及教條束縛,才是真正做人的智慧。這是超越人的政治及社會風湧的智慧,突破世間制度、律法、教條的封鎖及束縛的智慧。這種智慧是及創造主上帝結連的智慧,靠上帝來活的智慧。這是現代文明世界的人,所必須追求的智慧。

耶穌總結律法主義的問題,講人只需要一條律法,就是疼上帝,疼人,疼厝邊親像家己,這是福音的真諦。佛家所講的「法」 及基督教所講的「誡命」,攏佇這句話內面。

咱對火燄劍這邊的世界,看過火燄劍彼邊的世界,會當看著樂園是一個純全、單純、信賴的世界,人攏有親像細囝的純潔的靈魂;佇hia無閣有弱肉強食,生存競爭:佇hia無毒蛇、無野獸、無蒺藜;佇hia有日時有暗時,一年四季和諧運行,無大水、無大風、無地動;佇hia有咱意愛的家,有溫暖、愛及安息;毋免看人的面色生活,無閣有悲哀、流目屎,hia-ê生命就是「豐盛的生命」,攏無掛慮,就是親像保羅的祈禱:「一無掛慮,上帝會賞賜人料想未到的平安」。佇hia永遠有「阮的日食互阮」;佇hia有「無得互阮入佇試」。彼個世界就是耶穌所講的天國樂園。彼個世界就是耶穌所傳的福音的世界。

主耶穌講:「毋免煩惱,恁信上帝,嘛著信我,因為佇我的父的厝有真濟房間;若是無,我已經給恁講,我去就是欲為恁準備所在。」這個「所在」,就是「伊甸樂園」的意思(約翰14:1,2;希伯來11:13-16)。「我聽見有大聲音出,講,看啊!上帝的帳房欲在人間,伊欲及人做伙住,伊欲做因的子民,上帝欲親自及因同在,做因的上帝。上帝欲擦去因一切的目屎,無閣有死亡,也無閣有悲哀、哀哭、疼痛;因為以前的事攏過去了。(啟示錄21:3,4)」彼個「帳房」就是伊甸的樂園。

傳統的教條講主耶穌是當初將人類趕出伊甸樂園的上帝,也是設立火燄劍顧守樂園的上帝。信主耶穌的人著拍破這種教條。

但是我想這個上帝佇二千年前降生來世間,感覺伊所設立的「火燄劍」m̄著,禁止人閣入去伊甸園的代誌m̄著。「矛」及「盾」無法度相克,無法度解決。

最後上帝家己來世間,死佇律法社會的最大刑罰 – 十字架頂。死佇十字架代表上帝家己贖罪的記號,嘛是上帝贖回全人類的靈魂的記號。十字架是世間最不得已的記號。十字架代表一個真不得已的上帝的另外一面真偉大、真實在的本性。這位十字架頂的上帝,是另外一位上帝。

十字架的福音是上帝除去「火燄劍」的記號,除去人類受律法束縛及管轄的記號。耶穌流血的福音,poâⁿ過世間所有律法的束縛及宗教的教條。上帝愛咱大家閣轉去彼個可愛、溫暖、平安的家園 – 伊甸樂園。hia真正是世間每一個人的祖家,是每一個人會當安息的所在。

我寧可有一個愛的上帝,互人有「永生永活」的靈魂的上帝,互人更豐盛生命、會當平安轉去樂園的家的上帝,互人有安息的上帝(希伯來4:9)。

所以咱著勇敢起來,除去「火燄的劍」,除去彼個阻擋咱進入樂園的障礙。咱著勇敢叫出咱的的上帝的名,叫做耶穌。咱著及耶穌做伙,用伊十字架的福音的劍,就是新的劍,新的火,用福音的「烈火」(希伯來12:29),來拍贏短命的人生。

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致