岩盤崩裂

February 2, 2013
kap 朋友分享

「岩盤崩裂」

詩篇 #46;馬太3:7-10; 聖詩 189B

西雅圖台灣人教會執事退休會

陳柏壽 牧師

2/2/2013

 

引言

郭教授有拜托我佇kim-chai-khi禮拜起來主持,我真感謝恁互我有這个好的機會及大家做伙分享咱共同的信仰及經驗。及以前仝款,我準備一份資料做一個引言,大家看是欲oān-nah講oān-nah討論,抑是欲全部講了,才做伙討論,攏好。

「祈禱:慈悲的天父,感謝你互阮對各地無共款的所在出世,經過各種不同的環境生長,經過不同人生的經驗,但是今仔日你閣聚集屬佇你的兒女佇仝一間教會來服侍你,為你做工,這是一種的福氣,也是阮人生中服事你的機會。願你開阮的心靈,互阮的討論增加阮的信仰,加強阮人生的氣力。阿們。」

這个主題是我佇Columbia大學13年時間,所產生的khah高的信仰層次,也是一種我對人生的看法,做人的原則,以及做學問及做代誌的方法。

大家毋通當做這篇講稿是真理,這不過是我個人的思考及觀念。所以值得大家公開討論,互相修正,中國話講「拋磚引玉」。Chhàu-tú-khám我一粒磚仔khian出去,煞去拾(khioh)著一粒玉仔轉來。

影響我一生最大的老師叫做Douglas Sloan。十幾年中間,伊一再苦勸阮第一項,毋通講我絕對是著;第二項毋通三句五句toh講:「我這句話是“very important!”」,伊講佇文明最高的境界,特別是學術研究中,佇學問的大海內面,是「消費者」、「買主」的市場,毋是「生產者」、「賣主」的市場,意思是講你這句話是毋是重要,在佇聽眾本身的決定,是聽的人家己的perception,毋免你著特別提醒或是強調的字眼。愈需要強調這句”very important”語言的演講,是一篇愈低級的演講。文化及文明khah低的封建社會、奴隸制度的教育,這句very important用愈濟。最現代文明的教育,時常留空間互聽眾,互聽的人家己決定toh一句話才是重要,甚麼是攏無重要。咱的基督耶穌傳互咱的福音就是按呢,叫做現代人的「自由精神」。平素的自由精神。

閣來,Sloan先生一再苦勸阮毋通親裁講「絕對」這句話。只有上帝有法度講這句話。濛濛人生的大海、無限的學問的大海,甚麼才是「絕對」?伊的講道,真無愛人親裁toh講「永遠」。永遠是上帝講的話。伊真無愛伊的學生講這字 “impact”。伊無愛用這字是因為伊無愛伊的學生誤解伊家己對別人有甚麼特別的影響。咱對別人的影響實在是真有限,是在佇你及我這十外人niâ啦,無影hiah gâu 啦!

總講一句就是Sloan先生愛咱拍破傳統的意識的束縛,互咱看著一個khah高的信仰的境界。拍破頭殼內面的束縛就是用平常心去講話,嘛用平常心去聽話,去討論問題。用“value free”的方法,互聽眾有完全的自由,才有法度達到khah深的境界。

頂頂禮拜聖歌隊吟的詩講著人的飢餓,毋是因為無米糧,會嘴乾毋是因為無水通lim。這是欲引-chhoā會眾拍破既成的value,既成的觀念是講「米糧」及「水」才是真正的value,「上帝的話」一斤值幾銑錢?這本來就是矛盾對立的字眼。

上帝的話毋免咱加講話,是value free,是free value,但是是最高的value,毋免統計的加權指數,毋免強調,毋免講到嘴瀾全波,只要平平仔講,實實仔講,用平素心去唱,聽有的人自然聽有。Chit-má聽無的人,有一日一定聽有。主耶穌就是用這種方法teh傳伊的福音。主耶穌毋捌強迫人信伊,因為伊的道理本來就是value free。我想主耶穌嘛真愛咱的教會變做一個真正有自由精神的教會,最先進的教會,徛(khiā)佇時代最頭前的教會。

Value Free另外一個意思就是萬事的決定,毋是在佇咱,是在佇上帝。頂禮拜蘇格姊互我看著伊的指頭仔生一粒魚鱗soè,心內真煩惱。我的手及面皮嘛生幾仔擺。問皮膚科張醫師,及惠音姊的公子黃醫師,因嘛攏講毋知甚麼原因。只有一個原因:差不多所有身體外口皮膚的問題,攏是對內臟引發出來的。若是心情無順,無睏,內分泌無平衡,皮膚外面的virus就自動會出來反動。無人有法度處理,一切在佇上帝。

彼日蔡先生禮拜的時坐佇我身邊,施牧師佇台仔頂為伊祈禱的時,身軀phī-phī-chhoà,我用手按伊的手,伊的手phī-phī-chùn,一直咳嗽,發作的時吐痰攏kaⁿ血。Olympia的電療化療的醫生宣佈伊已經無醫啦,因為愈電療,肺的烏點愈濟。及頂個月牧師娘的兄哥仝款,身軀好勢好勢,bô-têng-tî,無因無端,著來著癌。真正是去互魔神仔擒著。無人完全知影是甚麼原因。

最近華盛頓州海岸漂來一座幾仔百噸的鐵根khong-khu-lí的小島,詳細看koh有寫日本字。原來就是二年前日本東北發生大地動海嘯的時,港口的岸壁流出去太平洋,sûi著Alaska的海流,流來到咱華盛頓的海邊。

世間的法律chhoē無甚物人著負責處理這項物件,海洋法、萬國公法攏無規定,這叫做“Acts of God”的產物。現在只有靠人手一塊一塊khok,毋知欲khok到tang時。最好是大海流閣來,共伊沖去加州。

日本東北的三縣:岩手(Iwate)、宮城(Miyagi)、福島(Fukushima),佇中央山脈向海彼幾縣,下面的地盤真lám,定定會「岩盤崩裂」,定定發生地動海嘯,這次15分鐘死四萬外人,其中猶有2萬外人,身屍猶埋佇海底。

這次轉去東京為牧師娘的阿兄做告別禮拜的時,二禮拜就有二擺4級地動。地動一下到,人挾佇khong-khu-lí的中間,頭殼頂電火haiⁿ-kong-haiⁿ,我是驚到親像欲去互鬼仔掠去,對腳底一直冷起來。聽講今後30年以內,東京會發生一擺7-8級的地動,濟少有一百萬人會死。日本人不管時攏活佇「岩盤崩裂」的恐怖世界,因為因的腳下,毋是一塊堅固的岩盤。

咱佇心理上不但著時時準備便便來對付地理上的「岩盤崩裂」,同時抑著準備人類的社會結構及組織、系統的「崩盤」。9.11事件(2001)是最好的例。無人想會到十幾位阿拉伯人會用家己的身軀做炸彈,將二隻客機連所有旅客chông落去世界的大都會紐約的大樓。一邊的政治是講遮的人是「恐怖份子」、「宗教的狂信者」;另外彼邊的政治是講遮的人是「英雄」、「殉道者」。這項事件是人類文明深刻危機的開始,是人類社會地殼破裂的開始。這項事件產生的人類良心的覺醒,漸漸會愈湠愈闊。

古早以來人類的社會是有錢、有知識、有權力的權利階級,對抗無錢、無知識、無權的小市民階級的對抗。911事件以後,咱的社會體制的破錠表面化。911以前權利者維持社會制度的方法是頭痛醫頭、腳痛醫腳的治標法,用按呢來延命因建立的體制。911以後人類社會要求建立新个社會秩序,靠小數特權階級及資本家無法度維持社會秩序。人類秩序除了尊重權威的同時,也開始真正挑戰權威。國會的民主制度變做國會的民主專政,美國台灣攏是按呢,這是一個真大問題。

人的精神及肉體及伊四周圍的環境以及及伊的靈界的關係不調和,就會破病。靈界及地上生命,若是久長隔閡,親像一層霧jiâ佇中央,心靈的不調和,產生破病。何時欲清算這種靈性的不調和,袂致使到死亡,著愛靠人心靈的努力及信仰的造就。

國家嘛是仝款,戰爭以前的社會混亂,就是在佇財富的分配不均,國家長期利用權勢,來主宰民族及宗教的對立及怨恨,對外援助不公,收刮別國資源,這個國家及社會就會產生不調和的現象,就是佇靈性上及至尊、至高、公義的上帝的關係斷絕,最後只有產生暴力、反抗及戰爭,親像9.11事件按呢就發生。以色列國家的猶太人對待因所統治的Palestine人的態度就是橫霸,所以大囝用石頭tìm以色列兵,互機關槍拍死以後,Palestine的老母叫厝內的第二囝閣出去。這種暴力的恩怨及惡循環真深,真難解決。

舊的社會地盤及機械式的世界制度對9.11崩盤以後,日本、美國、歐洲各地的人開始改變家己的生活環境、習慣、意識、世界觀,開始感覺全世界攏是我的故鄉,人類的生命完全互相依賴的存在。「草根運動」、「少年人」、「女性」開始受尊重,人類開始發現自然、上帝才是真正民主的起源。人若是離開「自然」及「上帝」,若是只有注重權勢、土地的佔有、錢財的收割,彼个人會開始孤單,開始恐懼,開始興起支配意識,慾求昇高,變做獨裁者。按呢就是真正民主的墮落。歷史中這款例真濟。

「一般人的人生的三個石磐」

(1)健康

我拄才有講,咱的健康是在佇上帝。譬如講我對日本轉來以後濟少2/3禮拜暗時袂睏。暗時袂睏的時實在有夠艱苦,叫天天袂應,叫地地袂應,miⁿ-á-chài起來,頭殼朦sè-sè,攏無精神,giōng-giōng beh死去。連這款小代誌人家己tō無法度主宰,你的生活基礎對下面開始崩盤。

咱教會有人去著flu,有注預防射嘛是著,完全毋是咱家己會當控制。咱中間有人著癌,醫生共伊講極加是一年互伊活,千想萬想嘛想袂著是按怎我會去著癌。醫生共伊講伊已經無醫的時,只有感覺伊腳所踏的石磐已經崩去,頭殼一切攏變空白。身軀外表的肉體真正毋是咱生命的石磐,因為咱完全無法度主宰咱家己的身軀及肉體。

(2)家世、土地及出身

另外咱心內想講是咱的石盤的是咱「出生」的「家世」。阮兜是某某所在的望族,阮阿公時代有偌濟土地,阮阿祖是清朝某某進士、某某秀才。但是講來講去,差不多別人嘛攏講因家族是望族,無人講因祖公毋是gâu人。這粒石頭嘛真容易崩裂。祖公無法度倚靠。

咱心內想講我出生的所在台灣就是我心內的石盤,台灣是我的故鄉,永遠的故鄉。鄭智人醫師主唱,李奎然教授做曲「馬偕的歌」,也是馬偕醫師家己所寫的詩「最後的徛家(khiā-ke)」:

 

『我全心所疼惜的台灣啊,

我的青春攏總獻互你,

我全心所疼惜的台灣啊,

我一生的歡喜攏佇此。

 

我佇雲霧中看見你的山嶺,

對雲霧中的孔縫看見你的大地,

波瀾大海遙遠的對岸,

我喜愛佇此眺望無息。

 

我的心袂得割離的台灣啊,

我一生的快樂佇此,

向望我人生的煞尾站,

佇大湧拍海岸的聲響中,

佇竹林搖動的蔭影中,

揣著我人生最後的住家。』

台灣是140年前來台灣馬偕醫師(偕醫生)所倚靠的地盤。台灣這个「土地的認同」,無法度對馬偕醫師的心內剝奪去,台灣是伊的心靈最大的基礎。咱去到世界逐所在,無論離開外久,台灣應該是咱永遠不變的心靈寄託的所在。馬英久互台灣的少年人chhoē無頭路,一個一個著去中國chhoē頭路才有法度生存,中國閣用人海戰術,大量將中國人移民台灣。真緊台灣就變做及西藏仝款的所在,咱的故鄉真緊會喪失咱所思思念念的土地、語言及文化,台灣真緊會變做毋是台灣人的台灣。台灣人內心的磐石,真緊會破裂。

(3)學歷、智識、錢財、名聲、地位

咱相會當倚靠的就是我的「學歷」、「智識」、「錢財」、「名聲」、「地位」。遮的是我活佇這世間的基礎,是我生活的基磐。咱攏想講若有這三個石磐,心就安啦。豈有影是按呢?咱家己講安啦、安啦的時,其實是不安的時陣(以西結13:10-16)。

中國人最近發現活佇錢財頂面的北京人,干單坐咧喘氣嘛會破病,因為北京是全世界空氣最拉穇(la-sam)的所在,錢豈真正hiah有路用?對中國賣來日本的魚翅有90%攏是用有毒的膠質做的假貨,去日本愈高級的料理店,愈食著khah濟中國的毒品。最近連台灣製的米粉,mā有92%透澱粉的假貨,台灣的生理人嘛是差不多歹。真濟代誌毋是人料想會到。

最近廣東「南方周末」雜誌發生共產政府欲主宰該報的社論的自由的事件。中國的共產政府教人民講:政府互恁經濟好,好生活,恁著毋通要求過頭的自由。但是今仔日的中國人講:「阮chím-má有飯好食,閣落來,就是欲要求政治及言論的自由」。共產制度佇中國各地方建立因的網路,人民欲突破這个封鎖無hiah-nī簡單。

佇台灣,國民黨利用各地草根組織:農會、漁會、水利會、調解所、公所、救國團、聯誼會、公會、律師會、退伍會、基金會、警察、軍人等等無所不致的組織,利用台灣人對組織的單純的忠誠,來主宰因「中華民國」的統治,來延長統治台灣的活命。遮的組織簡單講就是政治及經濟的利益輸送團體。經濟利益豈有法度永遠主宰台灣的生命?

「宗教及政治的地盤」

印度利用達賴喇瑪互全世界認為伊是佛教的保護者。中國利用支援緬甸、Srilandka、Nipal的建設,送佛牙去緬甸互人拜,來擴大因對佛教的地區的影響力。

中國佇各地設立「孔子學院」,將孔子及佛教連做伙,講這是中國文明。無神論的共產政府嘛是teh利用宗教來達成因的政治目的。

最近美國的反回教主義,嘛是一種基督教極端主義者為著控制支配美國社會,利用宗教的政治行為。美國佇中東煽動回教的Shiite及 Sunnis二派的悽慘的對立及鬥爭,是歷史以來毋捌發生的代誌。阮去參觀Istanbul的老教會Hagia Sophia,對這項代誌看到真清楚。

最近收著咱教會的月曆才知猶太人的厲害,因的影響力已經深入台灣教會公報社。這个日曆及施牧師無關係,伊嘛是收著才知。彼个佇碗公帽仔讀聖經的猶太人,若是換咱台灣老人讀聖經,一定會真感動人。彼張用槍子拍死干單有石頭的Palestine的囡仔的猶太兵,佇哭墻祈禱的相片,是對信徒真bái的教育,親像咱古早的日曆是用蔣介石teh閱兵的相片仝款。因將猶太教的政治及文化,佇信徒心目中當做標準(norm),其他民族的文化不過是次等文化(sub-norm)。

宗教市場的霸權,離開耶穌基督的福音真遠。真理無法度用「口號」暗蓋。猶太人的政治地盤是靠美國國會議員的勢力。抵好及台灣的中國人仝款,小數人統治大多數人。美國的小數猶太人主宰整個美國國家。因為按呢,以色列及阿拉伯的土地問題、核子武器問題、移民佇Palestine舊住民的土地的問題,對雷根開始一直到Carter、Bush、Clinton,一直到今仔日的Obama攏無法度解決。選舉前喝真大聲,及馬英久仝款,選舉了後就漸漸kiu尾,無聲無勢。Obama可能是列任美國總統最無骨氣的人,伊放任猶太人侵佔別人的土地。這是84歲的Harvard大學語言學教授Norm Chomsky講的話。Chomsky的老母是猶太人。我家己佇紐約及南加州中會,嘛經過真濟這種猶太人佇長老教會內面的政治運作。

禁止槍(chhèng)的法案,嘛是仝款。幾仔任總統以來,愈喝禁槍,槍愈濟,美國社會愈無安全。這叫做槍的政治,因最高的口號是「阮著保護阮的家庭、囡仔的安全!」The National Rifle Association有四百萬會員,後壁嘛有真強的基督教勢力支持,叫做The Evangelitcal Churches。毋通看有二字「福音」就一切ok,世間的教會干單看看板袂通,這種教會猶維持草芒時代西部開拓時代的心態,因無法度生長做大人,因的福音是扭曲的福音。日本毋是基督教國家,但是對「槍」及「老實」這二點看 ,日本文化比美國更加是基督教文化。

地球溫暖化的問題,企業家為著家己的經濟利益,就無管全球溫暖化的問題,繼續收割地面資源。AIG倒產以後,chím-má煞來告美國政府,企業家用政治來簸扳(poà-péng),來得著利益。日本的安部晉三上台以後,本來日本全國攏決定無愛閣有核子發電,但是受著大企業的壓力,又開始開發核子發電廠。經濟及政治攏利用仝一個地盤。

「日本首相的搬地盤的手段」

歷史以來各國政府上驚通貨膨漲,20年以來日本無通貨膨漲,但是經濟親像池面的死水,袂死嘛袂活,物價翻轉落價,叫deflation。安部首相上台以後,為著欲刺激日本經濟再生,採取一種激烈的手段,就是要求日本銀行加印一倍的銀票,來促成加一倍的通貨膨漲,日本錢貶值。政府為著建設的支出,用發行大量政府公債來應付。這叫做「以毒功毒」的政策。真正會成功袂,咱毋知。

對這項代誌咱所知的,就是安部為著欲刺激經濟,採取激烈的手段,就是親像人的身體:雖然蓑lám,無愛行路,但是強強giú伊起來行路運動。這是真艱苦的代誌,但是有刺激就小可有希望。日本政治家是認為,若是毋驚死,就可能會活,但是若驚死,就一定袂活。這點及基督教的福音有小可仝款:欲對地盤開始,共伊chháiⁿ振動起來,欲死欲活才閣看。基督徒人生豈毋免按呢?

「對教會的認識及態度」

仝款,咱嘛著建立咱一個健康、有活氣、行動的、有毋驚死的精神的教會(馬太10:34-39)。教會及人身仝款,活力的起源就是勇敢、毋驚、行動。主耶穌有講:「出在死人去埋因的死人,活人著向前繼續行路」(路加9:57-60)。咱著使用咱的思想、感情、意志,就是咱的「魂」,建立咱的理念、遠見、希望。咱的「理念」、「遠見」、「希望」,毋是干單一個崇高的「理想」,毋是干單鼓舞人的「語言」;是「使命」及「行動」。

咱著用敏感的心靈來觀察周圍的環境,知影上帝佇這个時刻及這个定點,欲教示咱的啟示。咱著積聚咱心靈中的理想、遠見及希望,親像水管的hose內面,有充滿遮的理想、遠見及希望的壓力,有壓力及力量,水道頭就會噴水。

教會及人身仝款,欲建立積聚咱的思想、感情、意志、理想、眠夢,毋是干單講理論,著經過心靈的絕對安靜,經過深思、默想、祈禱,才會達到的境界。佇絕對安靜之中,咱會對外在的物質世界及人的社會理論得著解放,就會得著宇宙中上帝的啟示。人的心靈及上帝相通,有上帝的「氧氣」,就會產生改革及進步的力量。咱的心肝若清,就會看著上帝(馬太5:8)。

咱脫離舊体,來建立一個新的教會,嘛是因為咱的靈魂內面,佇睡眠及濛濛之中,發現上帝的呼叫,上帝的呼叫親像紅嬰仔佇母胎內面開始形成長大,變做一個新的個体,新的人格。新的教會成立毋是政治運動,嘛毋是社會及文化運動,是人的信仰及良心的運動。

新的人的個体,佇幼年、青年期,需要振動、運動,才會大漢。弱小教會更加需要振動及運動。若無上帝就無咱的教會。教會及人身仝款,是一個獨立的個體及獨立的人格。親像基督教文化內面,爸母的權威無法度無限制來teh支配因的子女的身軀仝款,教會嘛有伊天賦的獨立的人格及尊嚴,受上帝保護。

咱教會不但是一個獨立的人格者,咱教會的人人人攏是真有尊嚴,真獨立的人格者。咱人人若是攏只有一日24 點鐘,就表示咱佇教會內,逐家人攏平等,佇上帝面前咱「人人攏是祭司」,「人人攏是先知」。

佇咱教會人人攏是主人,特別咱遮的做執事的人,咱是主人,無人是人客,逐項代誌攏是我的代誌,毋免人講著家己拾起來做,無論清掃、整理會場、食前祈禱、練詩讚美、司會講道、主持查經、發表主見,應該人人攏有份。我佇紐約的衛鄉教會,經過八年久,差不多人人,無論男女,攏bat佇台頂講道或司會。是一個真自動、真有活氣,真有力的教會。有人講衛鄉教會是訓練紐約、紐澤世、康州三州的人才的搖籃。

欲按怎款待「岩盤崩裂」的問題?

第一,咱著認識「岩盤崩裂」是咱的人生的「正常」,是「常態」,無論是健康、經濟、政治、宗教,外口看來是遐爾堅固,看若準無法度共伊搖動,但是認真給看,所有人的健康、家勢、錢財、地位、國家、軍事勢力的地盤,攏是非常脆弱。咱的「 心眼」著拆互開,才會當看著真正的生命的原點及現實,就是咱的人生不管時不管所在,處處攏有陷阱,處處有可能崩盤。

第二,咱著「看透」「看清」肉體的生命的另外彼邊的生命,另外彼邊的生命是真正的生命的存在。肉體的生命疲勞的時,咱就轉去另外彼邊的「彼岸」。咱肉體真thiám欲轉去的時,就靈魂欲離開彼个無路用的肉體的瞬間,咱的靈的目睭會看著上帝的魂的主體,彼个主體是世間上美的境界,咱一世人毋捌看過的美麗、平安的境界。

佇西雅圖我濟少會當舉二位人物互大家參考:一位是伍長老。十幾年以來,幾乎每禮拜禮拜前,伊攏會佇拜堂門口分週報,一個嘴笑咍咍,笑到嘴liah外長,拄著人不管時攏是欲chhoē空chhoē縫欲講幽默的話互人心輕鬆歡喜。伍長老一世人看過真濟無仝款的人情世事、教會紛爭、經濟問題,但是伊攏用伊的笑面來看透世間,一直到彼日伊講「我的身軀thiám啦,我欲轉去啦!」;閣一個是雪姨姊,每一擺見著伊就是用日本話講互牧師娘歡喜。伊的人生經過種種苦難,戰爭、流浪、喪子、政治的烏暗、中國人的粗魯無禮,但是伊猶久用笑面來過日,用伊受著的日本教育,保持一位的台灣女性的風範、純情及韌命,一直到彼日伊講我佇地面的戰爭結束啦,「我的身軀thiám啦,我欲轉去啦!」。這二位先輩代表的是做人的不倔的靈命,「知其不可而為之」的做人的基本道理,嘛是代表「春蠶至死絲方盡,臘炬成灰淚始乾」的人生,雖然看透但是繼續進前。

第三,雖然咱著「看透」「看清」咱生活所倚靠的健康、家世、故鄉、學位、地位、財產,遮的咱認為是地基的物件,有一日會盤崩裂的事實。但是咱袂使袂記tih咱做人著有做人的「人間條件」,特別咱做執事的人著執守的:就是「顧家、工作、家庭、教會、國家、故鄉、民族、純情、純潔、清氣、樂觀、熱心、開明」(提前3:1-13)。遮的代誌是咱人一生不可逃閃的「條件」,是咱一生的「使命」,嘛會使講是咱人生的「十字架」。對這方面來講,咱無法度超越,嘛無法度逃避。

第四,咱著「看透」「看清」世間人所組成的所有的組織,無論是政府、公司、教會、寺廟有一日攏會「岩盤崩裂」。任何好的理想及理念,包括「教會」,若是共伊組織化、教條化,就有問題。宗教組織是人的組織,人的組織就有人的烏點、弱點及腐敗。雖然是按呢講,教會是一個完全自發得的團體,無人強迫人來,無來教會無人會掠去關,無人會罰錢。但是這个自發得的組織,人人每禮拜來敬拜上帝,就是因為咱共同的意識、人生觀、上帝觀。真濟人平時無信仰、無欲來做禮拜,但是講著教會的消息伊逐項攏知,消息真愛傳,及國民黨的媒體仝款,主要的原因是因為這款人無嚴肅對待家己的生命,毋知教會人的信仰完全是teh牽連著生死的問題。因為這種人真濟,所以我tiàⁿ-tiaⁿ給施牧師講:「上帝飯歹吧(pe)!」因為我嘛吧上帝飯三十外冬,吧到真艱苦。咱著將這个完全是人的組織中,揣(chhoē)上帝神聖的旨意。

咱的得救,是建立佇對耶穌基督的仰望、信賴及敬拜,毋是在佇教會。所以咱teh管理教會的人著真細膩,毋通有一日佇上帝的面前互上帝責罰(路加11:43-52)。意思是講這世間所有的觀念化的基盤,所有組織化的意識型態及宗教組織,有一日攏會破壞,就是主耶穌所講的:「無一粒石頭會留佇另外一粒石頭頂」(馬太24:12))的時刻,一定會到。

對「岩盤崩裂」的理念及確信,是上帝賞賜互咱至大的福氣,叫做「神聖的信念」、「神聖的智慧」、「神聖的不安」、「神聖的懷疑」、「神聖的反抗」、「神聖的不滿」。這是一種對天頂賞賜互咱,看透世間萬事的信仰及智慧。有這種神聖的信仰及智慧,咱才有法度活佇真正的上帝國的內面。

因為咱相信上帝賞賜咱這種非常可貴的「不定」的信念,咱著更加日日勇敢向前,著趁日時猶有日光,著緊緊向前行路,毋通等到暗時臨到,才欲起來行路做工,就袂赴啦!(約翰12:35-36)。就是因為有遮的生命的「不定」、「陷阱」、「瘟疫」、「繩索」、「急流」(詩篇18:5,6),咱才認識真正的生命。基督教時常記住「死」的真實,互咱及中國孔子公所講的「不知生,焉知死」的教條,有絕然的分別。孔子教的教導叫做「麻痹的教條」,「毋捌人生」的教導。

「恁毋通想講恁有亞伯拉罕做恁祖公,就會當有(石磐)通倚靠。我給恁講:上帝會當對遮的石頭縫爆出伊家己的子孫啦!」(馬太3:9)主耶穌給咱世間人講,咱世間所倚靠的大粒、好看頭、有路用、會當當做石磐的石頭,佇上帝的眼光內面無值得甚物,顛倒是彼粒去互師傅頭棄捨的細粒石仔,會變做起厝的厝角石。主耶穌講這款代誌,咱豈攏毋捌想過嘛?甚麼人去sia̍k落去這粒細粒石頭頂,一定會粉身碎骨;這粒細粒石頭若是去khian著甚麼人,這个人一定會互伊khian到稀爛(馬太22:44)。這是基督教最強的逆理。

聖詩189B唱講「替我拍破石盤身,互我bih佇你內面」,意思是講主耶穌的身軀是親像石盤hiah-nī堅固,上帝是萬世不變的石盤。但是上帝是拍破伊的石磐身的上帝,因為伊拍破伊家己,才有法度互咱的靈魂bi̍h入去伊的內面。耶穌基督是道成肉體的上帝,但是伊無lia̍h伊及上帝平等,無執守伊所有的,翻轉拚空家己,成做人的款式,死佇十字架頂(腓立比2:6-8)。這款上帝表示伊毋是東方人、日本人所敬奉的「不動明王」、「不動尊」。咱的上帝不但毋是「不動」,伊隨時tín-tāng(振動),甚至對地基共世間ián顛倒反。

咱做人真愛佇世間有一個「完全不動」的神明互人敬拜,無不動就親像有危機感,人親像漂浮佇世間。但是這世間只有「偶像」才是不動。上帝切切交代的就是不可敬拜偶像。世間所有的不動攏是假的不動,攏是人自己創造的不動,不動的攏是假的神明,是無氣力的假神,是偶像。

人生的風湧真濟真大,但是真正的安心及真正的庇難所,在佇振動中的不動。活佇振動中的上帝才是真正的倚靠,才是真正的人生。咱若是佇上帝的內面,應是安穩自在,攏無驚惶,毋是因為佇上帝內咱毋驚風湧,是因為上帝佇風湧中及咱同行,上帝就是風湧,上帝是「岩盤崩裂」的上帝。

 

祈禱:

「上帝啊,阮的人生真正親像一個夢。你無阮的同意,就chhoā阮來這世間;嘛無阮同意就一個一個叫阮轉去。阮一世人艱苦比快樂khah濟。對紅嬰仔出世,厝邊隔壁歡喜來食麻油酒雞,大家笑哈哈,一直到一日出山的鼓吹連暗teh tân,全莊的人攏來守更,逐个人攏流目屎,親像一群無倚無靠的動物,喝叫天叫地嘛無效。主啊,你互阮對生到死,生命親像你借阮的,時間若到,你toh欲收轉去。主啊,你是按怎對待阮hiah-nī嚴格?攏無互阮及你參詳的所在。主啊,阮佇這世間,逐日攏親像teh奔波走蹤,逐日攏親像teh流浪,teh等彼日。

主啊,願你賞賜阮有智慧的心靈,看透你為阮排設頭前的路站。無論甚麼境遇,主耶穌是阮人生至高的最後的避難所,願你扶持帶領阮經過這个風湧不定的路途,接受人生的風湧,接受人生的不定,因為阮知影這才是最安定、最有倚靠的人生。阮佇你此祈禱,是倚靠阮的救主耶穌基督的聖名。阿們。」

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致