信仰的二面

April 24, 2011
kap 朋友分享

『信仰的二面』

創世記3:1-5

陳柏壽 牧師

對西雅圖駛車來溫哥華的路,樹仔葉落到欲了啊,但是只有一叢樹仔,葉仔去互風chhai來chhai去,伊的葉仔佇風中反旁,彼旁是銀色的白毛,佇風中親像一葉一葉的銀湯匙,非常美麗。美國人叫伊Silver Spoon樹。互我想著咱食老,年紀大,佇北風sńg-sńg叫的歲月,著愈活愈súi,親像Silver Spoon佇北風中,互世間人看。

頂禮拜我禮拜的教會佇Olympia Penisular的Oceanshore開培靈會,拜託我作主講。但是我想著機會到啦,順續chah我的魚釣仔去,早起時講課,下晝時去海邊釣魚,總共釣差不多30尾perch。會友有theh一張Wall Street Journal 全面的廣告,出一個人給魚釣仔phiaⁿ佇海邊,『Please don’t fish, because fish will die without water!』天下嘛有這種慈善家,開10萬箍登這個廣告。出發點是teh promote慈悲的精神。但是我teh想,對魚仔的慈悲,及上帝賞賜人食魚的義理,實在有對立及矛盾的所在。

我雖然是一位Recycled Pastor,本來欲互人摒落去糞埽桶的,去互人拾轉來用,所以我今仔日嘛欲親像路邊的Silver Spoon的樹葉仔按呢,繼續欲展一屑仔美麗的銀色的葉仔。

台灣人真土直,拄著人第一句話就是問你今年幾歲?有的閣卡粗魯,問你即滿一個月趁外chē?

美國及日本人已經卡無人按呢給人問啦。佇美國反轉是teh比少年,無人teh比老啦。

人生是不斷teh及『老』車拚的過程,teh及『老』sio-jiok的過程,欲將giōng-beh落山的iuu-ia-ke(夕燒,夕陽)的最美麗的色彩活出來的努力;欲將欲衰老的身軀,拚出一個大氣,講出一句大聲,看出一個新的光景,作出一個新的眠夢的過程,m̄甘願老,m̄甘願死的過程。

一般講起來,上帝是互人有空間去發展,但是人的時間是上帝的。時間變作壓迫人生最恐怖的力量。

但是咱活佇上帝內面的人著顛倒頭想。年紀大,bē-tàng家己駛車,有人行路嘛行bē遠,有人嘛已經無法度坐飛龍機。但是時間是咱的,咱著佇時間中,平心來過日,親像雲佇天頂teh飛,無必要去互時間欺負。

路得馬丁講:Toh是明旦再是世界末日,今仔日我嘛欲將這叢細叢的蘋果樹給種落去。

夏目漱石(Natsume Sooseki)有一本冊叫『道草』,叫咱一生m̄-thang一定著做甚物大代誌。伊的一生只有teh拾路邊的草仔,無欲互hiah-ê大代誌來壓迫我家己。

國民小學四年,逐日對古坑鄉的棋盤厝國民小學下課,我攏無欲行直路轉去麻園仔阮厝,攏khau田岸的小路,一路liám草仔,liám田嬰,灌肚猴,偷挽蓮霧,偷at龍眼,偷抽甘蔗。這攏是累積到我今仔日的我的人生的路邊草仔,chiah-ê路邊草仔是teh支持我的人生的力量。

阮厝無人信教。人攏講『基督教,死了無人哭!』。我小學五年去主日學,目的是欲去分美國人用過的Christmas card,卡片內有落雪súi當當的風景。我轉去厝,用拭仔給美國人簽的名lù掉,寫我的名,寄去互朋友。這個主日學的經驗嘛是拾的路邊草的一部分。

到讀高中,我是真bē曉考試的人,大專聯考前一暗我猶teh讀我彼本『約翰克利斯朵夫』。大學畢業以後去美國讀冊,對美國轉來的時經過日本,我給父母講我欲娶一個日本婆仔做某,阮阿母真無贊成,伊講有真濟人等欲看我,若準伊有kah人講好親成的款。

佇日本食頭路13冬,我閣給因講,我欲頭路辭辭掉,去美國讀神學院,阮老父第一個無贊成,閣來換高俊明牧師,伊講你作平信徒來傳福音,影響會卡大,卡有效果。

我這個人有一項歹-tè-lu̍h,就是我若心頭一個定,to無人擋我ē-tiâu。換頭路的代誌,我若決定,無人擋我ē-tiâu 。

即滿去一間多教派的神學院叫做紐約的協和神學院,主修的神學課程以外,著讀馬克斯主義、宗教心理學、宗教社會學、現代哲學、超現代哲學等等。但是愈讀chiah-ê 『課外讀物』,我對主耶穌的信仰愈堅強。

總講一句,佇這個退休的時陣,我回想過去的一切,一生攏是teh拾路邊草仔,收集路邊草仔,歸身攏是雜菜麵,無一項專。

主要的原因在佇我不斷teh反抗世間既成的教條及規矩。世間認為13是歹日,我想作好日,尤其閣拄著拜五,彼日做代誌閣卡順風。

A bitten apple-這個『互人咬一嘴的蘋果』,代表這個公司的記號。

魔鬼給夏娃講:『上帝知影你食了後,目睭會金,知影好歹,所以無愛你食。』

魔鬼愛人對上帝『不信』。伊知影人不能用單純的信心去信上帝,是世間一切災禍的源頭。

魔鬼用蛇作代表,聽講蛇及查某人講卡有話,所以伊經過查某人,說服伊去食『禁果』,然後查某人theh去互查甫人食。

蛇可以講是代表世間奸巧的智慧。但是伊認為智慧就是伊的驕傲,所以雖然去互上帝罰佇土腳趖,但是伊teh趖佇土頂ê時,頭殼猶佇土面teh se̍h。智慧是伊的驕傲。

Steve Jobs選『互人咬一嘴的蘋果』作伊一生的註冊商標,是teh挑戰這世間做人的運命。挑戰『智慧』及『順從』的辯證。

因為人咬這嘴禁果,魔鬼受咒詛,人類受刑罰。Steve Jobs認為人類不應該因為追求智慧、食智識果,就應該受咒詛。伊反轉認為,這就是人類進入新的文明的起點。

所以伊強強設計這個咬一嘴的蘋果,作伊一世人的商標。是伊對傳統的『咒詛』及『祝福』的既成的理念的一種反抗。

希伯來人真愛用這二字『咒詛』及『祝福』,來表現上帝khiā佇叨位一邊。上帝若是khiā佇咱這邊,咱就是受祝福的民族,對方就是受咒詛的民族;老父若祝福這個子,福氣就歸這個子,其他的子就攏無份;上帝祝福Abraham,叫伊的囝孫作上帝的選民,按呢其他民族就是受咒詛的外邦人(創世記12:1ff)。

但是這二字佇古早希伯來文字是屬同一個字根。同一項事,一邊是祝福,另外一邊就是咒詛,是一事的二面,是一個銅銑錢的二面,就是『辯證』的二面。所以約伯記2:9記載伊拄著災難的時陣,in某kā伊喝講:『去“咒詛”你的上帝好啦,你去死死leh好啦!』嘛會使翻譯作譏笑的字眼,寫講:『去“讚美”“祝福”你的上帝啦,你去死死leh好啦!』

咒詛及祝福是標準的宗教語言。該隱獻土地的土產,上帝無愛;亞伯獻羊的油脂,上帝接受。該隱受氣,thâi死亞伯。宗教上將上帝只有顧一邊的教義,解說上帝khiā邊的教義。以撒生二個子,以掃愛拍獵,雅各愛佇厝內作田。為著一碗紅豆湯,以掃出賣長子名份,所以雅各變作正統。宗教人的正統,代表上帝khiā因彼邊。

摩西五經內面記載真濟所謂『清氣的物』及『不潔的物』,就是即滿kosher food的起源。宗教人用按呢來建立伊的正統:咱因為是正統,所以食清氣物;in因為是là-sap人、外邦人,所以食là-sap物。用『清氣』及『不潔』來分別伊的宗教的正統性,這嘛是祝福及咒詛的分野。最近嘛有發現素食主義者,真濟嘛有這種優越感。

上帝佇這本舊約聖經內,留落互咱真濟好的啟示,會開咱的目睭,互咱看著一位真正咱的上帝的辯證,看著真正祝福及咒詛的宗教因素。

咱對Steve Jobs的身上看著祝福及咒詛二項的辯證。伊建立的Apple Computer現在已經變作世界最大的公司,比Microsoft公司、比最大的Exxon石油公司、比Boeing飛機公司卡大。

Steve Jobs佇1955.2.24生,佇2011.10.5 pancreas癌過身。死的時,伊猶teh掛念bē-tàng看著伊三個子入高中去讀冊。

伊一生拄著二次伊全生涯無法度boē記得、無法度接受的大的災難及逆境:

  1. 伊生出來就去互生母送去互別人飼。
  2. 伊請伊的好朋友來主持伊的公司,無想到去互伊家己的好友對公司開除。1985年去互人趕出公司,一直到1996年才捲土重來,轉來家己的公司。總共佇外口流浪11年久。彼年美國總統佇Silicon Valley請企業家食飯無請伊,互伊非常碎心。

一世人二擺大咒詛,二擺大逆境。

1998年伊開發iMac電腦;2001年開發iPod; 2003年開發iTun; 2007年開發iPhone; 2010年開發iPad; 2003伊的iPhone到2010年已經賣92,000,000台,最新型的iPhone 4S這個月(2011/11)出貨的時,3日賣4,000,000台。

2005年伊佇Stanford大學畢業典禮的演講按呢講:

“Your time is limited, so don’t waste it living someone else’s life. Don’t be trapped by dogma, which is living with the results of other people’s thinking. Don’t let the noise of others’ opinions drown out your own inner voice. And most importantly, have the courage to follow your heart and intuition. They somehow already know what you truly want to become. Everything else is secondary…”

“Remember that you are going to die is the best way I know to avoid the trap of thinking you have something to lose.”

有人講自從Thomas Edison以後,改變世界最大的就是Apple的技術革命,伊改變人類全部的生活型態。

但是伊所有的事業的動力是對『偷食禁果』的『gè一嘴』的蘋果開始:對智慧及智識的追求。

伊可以講是一位現代人的先知,因為伊面對既成的所謂『咒詛』的觀念,勇敢承擔這個受咒詛的運命,繼續向這條追求智慧的坎坷的路途進行。

佇Stanford大學的演講,伊按呢講:

『雖然有人講伊真愛去天堂,但是無人愛死。雖然是按呢,死亡是每一人的人生歸宿,無人有法度逃避。死是對生產生,有生就有死,有生才有死,有死才有法度改變生。生互人類對頭開始:舊的消除,新的出現。

恁遮的學生是新世代的生命,但是恁漸漸嘛會變老,然後漸漸對人生的舞台消失。

真失禮,我佇恁的畢業典禮,講這種真無正式的語言。

但是我相信我所講的是真的。

恁的人生有限,所以m̄-thang浪費時間,生活佇別人的陰影之下。

M̄-thang浪費佇世間的教條。世間所有的教條,就是別人創造的思想,強加佇你的身上,強迫你去遵守的物件。所以恁m̄-thang互教條縛死佇hia 。

M̄-thang互你家己心內的聲音、你家己內心的意志,去互世間外口的雜音淹過。著堅固你家己的良知良能(intuition),開發你本有的良知良能,伊會chhoā你去達成更高的境界。』

真正人的構成,佇思想、感情、意志的頂面,佇人及上帝的魂的中間,有一項看bē著、摸bē著、家己嘛感覺bē著的、存在佇每人的靈的內面、及上帝結連的所在的一項天賦的『良知及良能』,叫做『Intruition』。

紅嬰仔看著蛇,自然會起驚,叫做良知。

人看著別人淹佇水中,自然會無顧家己,跳落去救,叫做良能。

世間所有的人應該攏有這種良知良能。

這是做人最高的價值。

良知良能愈開發愈大。

真濟人互人當作無路用人,但是有愛心的老師教育了,煞變作真偉大真有名的天才。

Steve Jobs一世人56歲的人生,就是活佇伊的良知良能的內面,勇敢向著良心良能的最深的境界去追求、去探險。

這個Apple公司的記號,代表一種食智慧果及順從上帝二面的矛盾。

為著人間的幸福,彼粒蘋果著去給咬一嘴。生活佇人間的社會,人需要智識及智慧才有法度生存。所以基督徒比外口人,閣卡需要讀冊。

上帝容允蛇的身軀匿的撒但的存在,是欲互伊所創造的人,每一日目睭thí-kim,著面對撒但的惡勢力,每一日及撒但魔鬼鬥爭。佇每日的鬥爭中間,你欲khiā撒但彼旁?抑是khiā上帝這旁?人的命運就是一定著站一旁,無法度站中央。。

咱知影台大醫學院的李鎮源教授,伊不但領導人民,去廢除刑法第一百條的惡法,伊嘛是咱台灣第一位研究熱帶毒蛇的專家。伊將飯匙槍毒蛇頭殼內的毒汁,提煉作血清。人去互毒蛇咬著,注毒蛇的血清會好。

古早摩西佇曠野,手giâ銅做的蛇枴。人去互毒蛇咬著,看這枝銅蛇就會好。

咱嘛攏知影,現代醫生的記號就是十字架頂擒二尾蛇佇hia,頭對頭 。

上帝知影毒蛇有毒,撒但有毒,但是經過撒但會救人。上帝知影,原來智慧及智識親像毒,人本來無需要智慧及智識to會當活到好勢好勢,但是今仔日咱需要經過智慧及智識來活落去,來管理這個世界。這抑是Apple的Steve Jobs一生所顯明的一個道理及逆理,一個矛盾中的辯證。

自從阮爸爸過身以後,最近我感覺家己愈來愈sêng阮爸爸,連我行路的時二枝手hàiⁿ一下、hàiⁿ一下,親像teh划船仔共款。忽然間我感覺,我thài會hiah sêng爸爸。即滿想倒轉去,才發現我真濟想法,kah古早我teh看無起、teh反抗的爸爸,共款共款。

主耶穌teh講伊來會互父仔子oan-ke ,但是oan-ke m̄是分離,oan-ke是佇矛盾內面的統一。

雖然主耶穌有講,chhut-chāi死人去埋因的死人,活人只有向前行路,但是伊並無講呣免去埋死人、去尊重、敬愛死去的人。咱一日一日變老人,老人一日一日向著最後彼日teh進行,一定咱的囝孫會好好給咱埋。

佇墓仔埔的所在,咱體驗著主耶穌講話的逆理,伊知影咱的人生是短暫,著保惜咱的時間,上帝憐憫人的軟弱,容允咱將十字架給插佇墓仔頭,目的是提醒咱:生及死本來就是牽連作伙。生及死外口看若準是矛盾對立,佇上帝的目睭來是圓滿的統一,無甚物通掛慮。

馬太福音22:15-22內面主耶穌嘛提供一個真現實辯證的例:伊講『該撒的物歸該撒,上帝的物著歸上帝。』原來法利賽人用納稅的問題來欲『坑』耶穌,耶穌提印佇羅馬錢頂面的該撒皇帝的相,所以這個有該撒相的物件,歸該撒。但是後面彼句話是講,有上帝的相的物件歸上帝,這當然包含所有人間的相及該撒本身的相,咱人人攏有上帝的相佇咱的頭額頂。不但按呢,上帝嘛時時將咱人的相『銘刻』佇上帝家己的手掌中央(賽49:16)。甚至二千年前,伊家己來世間『道成肉體』作人。上帝的一切是人,人的一切是上帝。外口看來,若準主耶穌將『該撒』及『上帝』分作二旁,親像水火不容的二旁,其實人每一個人,包括該撒,攏有上帝的DNA,咱攏屬上帝,這二項物件攏是仝一回事,chiah-ê一切攏是上帝的,佇最後的結論就是:上帝內面,一切攏有統一。

咱知影佇上帝國內底,一切攏有矛盾、有對立、有困難boē了解的結,時常心內teh爭扎,無法度解決:有

智慧、智識及順天的矛盾;

生及死的矛盾;

精神及物質的矛盾;

天堂及地面的矛盾;

全能及軟弱的矛盾;

社會及自然的矛盾;

理論及實際的矛盾;

理想及現實的矛盾;

的時陣,請你給想講信仰本來就有伊的二面,上帝佇咱不斷的辯證及爭扎的中間,會現出伊真真實的面貌互咱看著,咱佇上帝內面著安心過日。

『主啊,阮的人生時時拄著真濟艱難、困苦、難解的問題,但是阮欲將遮的一切攏tòa來你的面前,向你懇求,求你憐憫,chhoā阮經過一切的風湧,安心來到阮心靈安息的所在。祈禱懇求靠救主耶穌基督的聖名。阿門。』

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致