『生命ê勇氣』

創世記16:7-11; 21:8-21

陳柏壽 牧師

最近人發明Lojack，賊仔偷牽車，咱computer ji̍h–落-去，車佇叨位攏知， 一聲tō知車是佇伊ê 車庫內。

問伊：『這(che)是我ê車，是按怎會走來你ê車庫內面？』

聽講這個技術對查某人管理in尪真有路用。

Kā computer ji̍h—落–去 !

Ah Ha!你閣走去Las Vegas teh poa̍h-kiáu—lah!

Ah Ha! 你tòa叨位一間hotel我攏掠你會著！

Ah Ha!你閣走去溪仔邊teh釣魚仔啊！

Kap 『這隻車是我ê，是按怎會走來你ê garage內底？』仝款，這個尪是按怎會走來Las Vegas poa̍h-kiáu，就是因為關係無好，道理走chāu去–啦！

伊若想講欲愛這隻車，tō出手kā牽–來，家己無欲討趁，用偷ê去解決。

伊若想講世間無比去Las Vegas poa̍h-kiáu khah重要ê代誌ê時，伊tō m̄顧家，無顧尪某情，將財產去kā poa̍h了了，將財產去買鴉片pok了了，道理就走chōa去–啦。

古早以來，尪某關係、男女關係，佇台灣、日本、中國、阿拉伯、印度，甚至歐洲，攏走chōa了了。

一直到近代人teh研究耶穌基督ê福音，才漸漸發現這個問題，漸漸大家起來講，大家作伙來想。

基督教過去hō͘世間人真濟誤解，chím-má漸漸人才開始欲bat基督教，人才開始欲探討真正上帝ê道理ê時代。

上帝創造女性kap老母，是代表一種潛在ê力量。母性是大地之母、生產之母。母性有深沈ê一面。外口風雨、日頭、凍露，伊攏會kā伊吸入去腹肚內。

外口ê日頭風雨，沈落去母性ê土底，看著親像消音去、親像失蹤去。

其實是顛倒反，吸入去以後，伊變作力量。台灣話叫做：『目屎吞落去腹肚內。』

台灣詩人廖莫白ê詩按呢寫：

『佇安靜ê燈仔火下面，

阿母替阮補舊衫，

淒涼ê月光，chhiō佇土腳，

一針一線，

牽出外濟心酸。

Poa̍h輸kiáu ê阿爹，

又閣lim酒轉–來-啦！

飯桌頂ê飯菜猶閣佇hia ，teh等伊轉–來，

阮攏kap等伊轉來ê飯菜仝款，作伙冷冷–去-啦！

阿母真正是一位偉大ê裁縫師，

早起目睭猶含著tîⁿ-tîⁿ ê目屎，

Chím-á我又閣看著伊，

一針一線，

Teh縫(thīⁿ)阮這個散裂ê家庭』。

舊約聖經中女性ê地位真低。

新約聖經中ê耶穌，時時用母性ê面貌出現，親像伊佇最後ê晚餐ê桌頂，teh服事伊十二ê學生，學生攏親像伊ê囝一樣。我想主耶穌一定有hâ一條apron。

伊講伊teh叫耶路撒冷來伊ê身邊，親像雞母teh kho͘雞囝，但是伊這隻雞母愈叫，雞仔囝行愈遠。

雞母m̄-bat jiok雞囝，

伊干單用kho͘–ê nā-tiāⁿ !

一種無條件、無強制、無壓力ê老母ê疼。

舊約中ê上帝是講：你若遵守律法，我tō hō͘你長歲壽，

我tō hō͘你大興旺，

我tō hō͘你囝孫滿堂。

但是新約ê上帝是：上帝落雨佇好人ê田，

嘛落雨佇歹人ê田，

連hiah-ê無欲疼你ê人，

你嘛tio̍h親像上帝按呢，去疼in。

是一種無條件ê疼。

所以咱讀基督教ê聖經，特別是舊約聖經，tio̍h用一種『逆理』ê眼光去讀；

若無，咱讀聖經會讀到腳脊-phiaⁿ–去-啦。

欲用『逆理』ê目睭去讀聖經，tō是去讀字kap字中央ê空縫ê意思，

M̄是gēⁿ-tú-gēⁿ去用字面來解說意思，來瞭解上帝。

甚至有時tio̍h顛倒反去想，

有時tio̍h tùi後壁看過來頭前，

按呢意思khah會準。

今仔日讀ê夏甲ê故事，就是這種逆理。

聖經中將彼位所謂『信仰ê先祖』亞伯拉罕ê一言一行，

伊ê真面目，寫到清清楚楚，tō是欲hō͘咱知聖經中有真濟『逆理』。

亞伯拉罕這位族長，因為饑荒，流浪去埃及，煞佇hia chhōa一位埃及查某kán，叫做夏甲，『來作奴隸』ê意思。

亞伯拉罕有一個大某，照法統來看，伊是除了亞伯拉罕以外，所有權力ê中心。一個是76歲ê老阿婆仔，支配者；另外一位是青春ê少女，是奴隸，受支配者。

夏甲甚麼攏輸大某撒萊（Sat-lâi），大某撒萊逐項攏贏夏甲。只有一項撒萊贏bōe過夏甲：撒萊bōe生囝，子宮已經pó͘-pó͘；夏甲會生。

為著欲傳宗接代，大某答應in尪kap夏甲同床。律法上，夏甲只有變作亞伯拉罕kap撒萊ê生產工具nā-tiāⁿ。用現代話講就是『借胎生子』。

撒萊看查某kán仔有身，煞開始怨妒。愈看伊ê腹肚愈大粒，心內愈bōe爽快。本來明明是伊心甘願、伊答應ê代誌，chím-má煞起生番。本來伊是欲用人ê方法來建立伊ê家世，taⁿ煞越轉來求上帝，kā上帝喝苦。

正旁是伊ê話，

倒旁嘛是伊ê話。

厝內ê代誌，撒萊一手全權主宰，這個大某ê聲，有時比亞伯拉罕khah大聲。亞伯拉罕擋未tiâu，最後kā撒萊講：『這個查某kán仔，交佇你手內。你欲kā伊按怎處理，你tō按怎處理tō好。』che就是這位『信仰ê先祖』所講ê話。

撒萊就開始來苦毒這位對埃及來，『孤鳥藏人群』ê，tòa佇猶太人厝瓦腳（chhù-hiā-kha）ê查某囡仔。

苦毒到無位好去，腹肚mo̍͘h一粒大冬瓜，煞去hō͘人趕出門。

伊tùi厝出去，向著西旁ê故鄉，埃及，ê方向一直行去。向著日頭欲落山ê彼旁，叫做Su-jíⁿ ê曠野，戇戇仔向前行，m̄知欲去叨位。

雖然m̄知欲去叨位，但是佇伊ê心內，有一項代誌，伊真清楚：就是伊來到這個曠野，比tòa佇厝，khah平安。M̄免看大某撒萊ê歹面-chhiuⁿ，曠野ê水泉比厝裡ê水khah甜。

Che是夏甲第一擺離家出走，亦會tàng看出夏甲無teh看人面色ê本性，伊有獨立生活ê生命ê勇氣。

到今仔日，咱猶看會出來猶太人kap亞拉伯人性格ê無仝：猶太人生活佇社會性ê團體，團結佇in ê族群內面；亞拉伯人生活佇獨立，ba-ra-ba-ra，一盤散沙，但是真勇敢、獨立。今仔日猶逐日看著in，一個人，mo̍͘h一粒炸彈，chông入去人群內面ê亞拉伯人。

舊約聖經中，第一擺上帝ê使者對人講話，tō是kā這位埃及ê奴隸講話：『撒萊ê查某kán，你tùi叨位來？欲去叨位？』無叫伊ê名夏甲，是叫伊『撒萊ê查某kán 』。舊約聖經ê律法下ê手筆，就是用撒萊作正統，用撒萊作代表。夏甲m̄是人，是撒萊ê附屬品，是撒萊ê奴隸。

若是提起撒萊ê名，對夏甲來講，有無限ê怨嘆。撒萊就是一個恐怖ê代名詞。

但是佇律法ê法統主義下，只有撒萊會tàng代表一切。佇這時陣ê夏甲，只有會tàng回答ê話是：伊是tùi主人ê某撒萊ê手下逃走出來ê，但是欲去叨位，我m̄知！

有時咱逃出一個魔坑，煞跳入去另外一個魔坑。咱煞無法度脫出人生ê羅網。

佇台灣人ê心中，古早戒嚴時代咱心內有真濟禁忌，taboo，一寡khah敏感ê政治問題，咱攏m̄敢出聲。Chím-má來到美國，政治嘛解嚴–啦，但是嘛猶有真濟人，心中去hō͘這個羅網網tiâu leh ，驚東驚西，一世人未出頭天。

上帝ê使者按怎kā這位佇曠野流浪ê 婦仁人講，你敢知？

伊講：『你tio̍h轉去！轉去你ê主人hia ！』

意思是講：你轉去繼續作奴隸！轉去彼個烏天暗地ê世界！

上帝ê使者無kā伊講半句安慰ê話。上帝無欲肯定伊出走ê動機。上帝無同情伊ê受苦。

夏甲不但佇厝內受主人ê壓迫，走到曠野，亦無得著安慰。若準上帝嘛摻（chham）落去壓迫伊，無欲同情伊。

世間人有人同情好額人，同情有勢頭ê人。但是卻無人同情奴隸。

馬英九講幾句台灣話，台灣人就感動到流目屎。台灣ê阿公阿婆仔，認真teh講hiah-ê不答不七ê台灣國語，無人感覺這是社會文化ê壓迫，無人kā in同情。

聖經中第一擺上帝去hō͘人號名，就是上帝去hō͘夏甲號作：『你豈m̄是看顧人ê上帝呢？』上帝hō͘夏甲叫作『看顧人ê上帝』、『看顧人間苦情ê上帝。』

上帝真正ê名稱，上帝hō͘世間人共同認同ê名稱，就是夏甲所叫ê，上帝ê名：『看顧人間苦情ê上帝。』

上帝是tùi天頂看落來世間人ê上帝，嘛是親自降落來世間，hō͘人看會著、摸會著ê上帝。這個上帝叫做耶穌。

夏甲將人間ê生命kap上帝ê觀念牽作伙來講。

創世記所記載：tùi挪亞以來，第一位生佇猶太人家庭ê第一位ê，竟然是對埃及、亞拉伯人、奴隸ê夏甲所生ê囝，叫做以實瑪利。以實瑪利意思是：『上帝有teh聽！』上帝有teh聽這位作奴隸ê老母ê怨嘆kap喉叫ê聲音。

第二ê故事ê開始是講亞伯拉罕ê某撒萊已經89歲，亞伯拉罕99歲。上帝ê使者來kā in講：『撒萊欲生囝–啦！』撒萊聽–著，匿佇門後teh偷笑。伊僥疑、無信上帝ê話。結果生ê囝，叫做『以撒』，意思是：『伊佇hia teh偷笑』。猶太人ê歷史中，teh記念in ê祖先ê名，是tùi無信心，tùi僥疑開始。

有一個神學家teh講：信仰是99% ê僥疑 + 1% ê信心，teh對立ê過程。猶太人ê聖經真老實，照實在講，照實在寫。

對僥疑欲跳起去信心真無簡單。水若是hiâⁿ到99.9度，猶維持是液體，差就是差佇彼ê最後的0.1度。若無彼個最後的0.1度，水永遠是液體，人永遠佇hia teh僥疑。彼個最後ê 0.1度，才有法度hō͘咱昇華變作氣體，進入信仰ê境界。

猶太人是一個gâu僥疑ê民族，時時teh試探上帝、teh背逆上帝ê民族，時時teh門後kā上帝偷笑。但是就是in一世人攏親像約伯按呢，teh kap上帝khau-chhau，欲kap上帝辯論，所以in大部份ê人最後攏有法度達到100度，昇華進入有信仰ê境界。所以講：僥疑是信心之母。僥疑就是欲達到彼個 99.9度ê境界。

咱台灣人有時時欲充實到100度ê熱度亦無？

以撒出生，斷奶，開始會行。In阿兄以實瑪利已經五、六歲–啦。Gín-á二人作伙thit-thô，sńg kah真歡喜。但是in二人ê老母佇厝內teh sio-tak，內鬥，愈來愈厲害。最後這個撒萊大某擋bē-tiâu，驚以實瑪利大漢了後，kap以撒爭分財產，tō去煽動in尪，欲hō͘伊kā這對母仔囝趕–出-去。伊講佇以色列猶太族內，不准有亞拉伯人共存。今仔日嘛是按呢。

這個『信仰ê老父』，聽大某ê話，過暝日透早，天猶未光，tō kā老母夏甲kap囝以實瑪利tùi眠床叫–起-來，提一包麵包，一袋仔水，講：『恁出去，che已經m̄是恁ê厝–啦！』

我有去Aquaba､紅海、西奈ê沙漠，知影hia攏是荒埔曠野，頂煎下逼，山狗、野獸、毒蛇sô來sô去ê所在。

夏甲這個埃及人ê老母，出來到這個曠野，心內無teh驚。來到曠野，比佇厝內冤家khah好。

頂番出來，mo̍͘h一粒大腹肚出來，這擺出來，手是牽一個細漢gín-á佇身邊。

二個人親像無厝ê野魂，無張無持去hō͘人趕出門，佇別是巴ê曠野，向著日頭欲落山彼旁ê埃及，行佇茫茫眇眇ê沙漠ê內面。

新約聖經內面，khah濟是teh講反悔ê故事，親像放蕩囝無位好去ê時，無愛去死佇外口，越轉身轉來老父ê舊所在；親像大兄kap小弟ê故事，大兄kā老父講伊無欲去園裡作工，但是後來反悔，越轉身，閣去園裡做工。

舊約ê故事內面，khah濟攏是有去無轉來ê故事，出門去戰爭，大部份是決心有去無轉來，約瑟去hō͘人賣去埃及，死佇埃及；摩西tùi埃及出來，目標是迦南地，死佇路中；亞伯拉罕tùi吾珥（gô͘-jíⁿ）出來到迦南地，嘛無閣轉去。

古早台灣人過茫茫大海ê烏水溝來台灣，tō是決心無欲閣轉去。中國話有講：『好馬不食回頭草』ê意思。

夏甲這位外邦人，tú著人生ê絕境ê時，伊心內所想ê m̄是欲轉去，心內所想ê就是『死嘛無欲轉去』，伊tō是欲去死。

外邦人，英文叫做pagan，佇古早猶太人ê觀念中，就是『m̄是人』ê意思。佇律法主義ê手筆中，這位外邦人ê人生，就是出門tō m̄-koh轉來ê人生觀，死嘛是欲死佇外口ê人生觀。

老母只有將剩ê水hō͘囝飲，taⁿ水嘛飲了–啦，糧食嘛空空–啦，老母m̄甘目睭金金看囝餓死，就將gín-á khǹg佇一欉矮樹仔腳，佇hia有樹仔影，伊一人行離差不多一百公尺遠。

這一百公尺，是老母kap囝ê親情kap愛情ê最大界限。這一百公尺，老母看囝目睭看，猶看會著，但是霧霧無明，心肝仔囝若是會餓死，伊看khah bōe hia清楚，老母ê心肝khah bōe斷腸chhak 心。

夏甲面向伊ê心肝囝teh哭。希伯來ê聖經是講老母teh哭，m̄是囝teh哭。同時，夏甲m̄是向甚麼人teh哭，嘛無向上帝teh哭。夏甲只有向著伊家己ê人生ê苦難teh哭。單純ê生命ê啼哭。

21:17講上帝m̄是聽著老母ê哭聲來出現，是寫講：上帝聽著gín-á ê聲音來出現。Gín-á聽著老母teh哭，有作伙teh哭iah無，咱m̄知。可能家己一個，佇hia 憨憨仔teh講話嘛無一定。

奴隸啼哭ê歷史真長，上帝並無出現。二百年前，美國是全世界唯一用黑人作商品，公開佇市場買賣ê國家。美國kap英國發生獨立戰爭，一部分原因嘛是為著買賣黑人ê權利ê問題。美國國父George Washington本人有飼500外位黑人，起草美國獨立宣言，寫講：『上帝面前人人平等』，hiah-ê頭人：Benjamin Franklin, Patrick Henry, Thomas Jefferson kap Alexanda Hamilton攏嘛是奴隸頭。彼陣，長老教會牧師、Quakers､猶太人嘛仝款，攏有飼黑人作奴隸。所以in講上帝面前人人平等，意思是講：『上帝面前，白人，人人平等』。幾千年中間，人間奴隸ê受苦，奴隸ê哭聲，上帝ê耳孔，慢-thun-thun，親像無teh聽。

上帝是按怎慢-thun-thun，我無答案。我m̄是上帝。但是咱時時tio̍h作伙來想，作伙來chhōe答案。咱ê聖經就是將chiah-ê逆理，真坦白，無am-khàm，排佇咱面前，hō͘咱家己去想。

上帝ê聲第二擺出現。這擺，上帝真清楚叫伊ê名：『夏甲，你是按怎佇chia teh艱苦？』

這擺，上帝無閣叫伊作『撒萊ê查某kán 』。上帝已經聽見這位hō͘世間人棄捨ê人ê聲音。上帝kā伊講：M̄免驚，你tio̍h khiā–起-來，將gín-á 抱–起-來。

上帝ê出現，hō͘作奴隸ê老母，閣一擺有氣力，將gín-á抱–起-來，行另外一站新ê人生ê旅程。

以實瑪利佇回教可蘭經內面，是一位真偉大、勇敢ê沙漠中ê族長，是亞伯拉罕ê大囝，絕對m̄是奴隸ê囝孫。但是佇猶太人ê經典內面，伊不過是一位奴隸ê囝孫，猶太人看伊無起。

佇可蘭經內面，以實瑪利無teh哭，是teh kap上帝講話。以實瑪利，意思是『上帝有teh聽！』

有時我teh想咱台灣人，真親像以實瑪利。咱長山過台灣，羅漢腳仔，向著茫茫眇眇ê大海前進ê時，嘛親像夏甲。

Hiàng當時，咱對故鄉出來美國，手kôaⁿ二腳to-ran-ku，落袋仔內只有40箍美金，頭前茫茫眇眇。

有時我去shopping mall，特別是賣俗貨ê所在，看著有作老母ê人，腳脊-phiaⁿ phāiⁿ 一個，胸前閣pak一個，二支手大包小包，為著欲顧三頓。佇彼個老母ê面型，hō͘我想著夏甲ê面。

基督教實在就是teh講這個夏甲ê故事，講hiah-ê hō͘世間ê法統、血統、道統pak死死，hiah-ê無位thang去ê老母、奴隸ê老母ê故事。

咱ê上帝講–起-來，kap這位奴隸ê老母，嘛有仝款ê面型。腓利比人書寫講：耶穌本有上帝ê形狀，但是伊無掠kap上帝平等，反轉降世作人，作人ê奴隸，死，甚至死佇十字架頂。』

我想咱tio̍h去曠野去chhōe咱ê上帝，

M̄是佇hiù芳水穿西米羅ê所在去chhōe上帝，

咱佇無聲無soeh ê中間去chhōe上帝，

佇茫茫眇眇ê曠野去chhōe上帝，

可能咱才會chhōe著真正ê上帝，

伊m̄是活佇經典、活佇法統、血統、道統內面ê上帝。

我想咱ê上帝嘛是佇曠野中，teh chhōe伊所疼ê人，

佇無聲無soeh ê中間，teh chhōe 伊ê人，

佇曠野ê中間，欲去聽teh求叫伊ê聲。

主耶穌嘛有kā猶太人講：恁m̄-thang想講，恁有亞伯拉罕作恁ê祖公，萬事tō會OK，思想生活就會tàng橫霸，tō會tàng 欺負人、食人。

上帝講，伊會tàng tùi chiah-ê石頭中，興起伊家己ê囝孫，

興起伊家己ê百姓，

佇曠野ê所在，

佇風siúⁿ-siúⁿ-叫ê所在，

佇白芒芒ê菅芒花ê所在，

上帝欲家己chhōe著伊ê百姓。

祈禱：

佇曠野ê路中，夏甲牽著伊ê囝以實瑪利teh háu，

上帝你有teh聽。

主啊，有外濟阮ê兄弟姊妹，佇這個異鄉teh討趁生活ê時，in佇曠野內面teh啼哭。

主啊，你是佇世間teh流浪ê百姓ê上帝。

你是受苦ê人ê上帝。

佇你ê內面，

就是死佇十字架頂ê上帝ê內面，

阮欲chhōe著阮人生ê幸福kap平安。

感謝你。靠主基督耶穌聖名來求。A-men