221 世界母語日

kap 朋友分享

221 世界母語日

(發表tī民報16 Feb2015)15

張復聚醫生李江却台語文教基金會董事

逐年 2月21日是世界母語日( International Mother Language Day, IMLD)。這是聯合國對1999年開始ê政策。

1947年kap印度做伙對英國獨立出–來ê巴基斯坦國 (Dominon of Pakistan)，分做東巴基斯坦kap西巴基斯坦。東巴基斯坦就是這馬ê孟加拉國(Bangladesh)、西巴基斯坦就是現今ê巴基斯坦國(Pakistan)。

彼當時，西巴基斯坦主要語言是烏爾都語(Urdu)，東巴基斯坦是孟加拉語(Bengali)。1948年巴基斯坦國宣佈唯一官方語言是烏爾都語(Urdu)，引起東巴基斯坦大部分講孟加拉語人ê不滿，開始積極爭取孟加拉語mā成做為官方語言。

1952年2月21日，今仔日孟加拉首都ê達卡(Dhaka)大學ê學生kap爭取母語權濟濟群眾佇高等法院附近遊行，hō͘警察開槍掃射，有四個學生死亡，引起暴動！這可能是人類歷史中因為爭取語言權造成死亡ê頭一擺。後–來巴基斯坦當局佇 1956年2月29日宣佈孟加拉語成做第二種官方語言。這馬，逐年2月21日是孟加拉國ê國定假日。

聯合國一直到1999年11月17日才制訂每年2月21日做世界母語日，對2000年起實施。後來又koh定2008年為「世界母語年」! 不管是母語日抑是母語年，重點是鼓舞保存母語，使用母語，發展母語，促進多語教育佮多元文化。聯合國教科文組織佇會員大會第12號決議案提倡「多語教育」，意思是佇教育中使用上少3種語言，就是母語、地區或國家ê官方語言kap一個國際性語言。

聯合國對語言人權ê政策是：1945年發表世界人權宣言，確認語言權是普世價值；到1996年koh制定世界語言權宣言，承認所有ê語言lóng有資格成做官方語言(Official language)(註)，2001年 mā發表世界文化多樣性宣言，確認文化多樣性是世界ê財富。

倒轉來看台灣，本土語言hō͘外來政權壓迫超過100年。這100外年是人類文明發展上濟，上緊koh上關鍵ê坎站；咱ê本土語言卻一直被蹧躂kap迫害，特別是經過60年中國國民黨按呢ê文化大屠殺(Culture genocide)了後，咱ê母語已經偆無半條命。

真無簡單，台灣民主化加減hō͘咱希望。到1999年當時ê教育部長楊朝祥才佇chiâⁿ百位學者、立委kap母語運動人士ê面前親嘴答應國民教育1-9年每禮拜beh實施1-2點鐘母語課，害咱歡喜到半小死！結果leh？眼時前實際情形是國小1-6年級逐禮拜干焦有1點鐘！若用聯合國ê標準來看，這根本是否定台灣人基本人權！

2007年扁政府制訂「台灣母語日」，希望學校每週定一日為母語日，鼓勵學生當日盡量使用個人母語，也呼籲主管機關進行「母語日訪視」，鼓勵師生講母語，發現教學相關問題koh協助解決，本意足讚。M̄-kú因為母語成績無列入考核，升學考試mā無納入考試題目，比1996年ê「認識台灣」課程koh-khah無受重視！這款政府koh大聲講是人權立國？好佳哉，母語教育高雄市猶算有認真teh做，會使講是全國做了上讚！咱希望綠色執政13縣市做伙認真來做，陳市長菊姊應該會當做示範。

真不幸，到2008年以後馬政府就無koh再要意母語教育。連母語教育經費mā一直減少！本底規定母語老師上慢佇民國100年ài通過認證才有資格繼續教，mā是hō͘馬政府硬延後到民國105年；M̄-kú，到時會koh拖外久，無人有把握！

本來，蔣偉寧部長舊年有答應beh佇新課綱規定國中「必修」母語，勉強符合當初楊部長承諾，但是卻hō͘新任部長否決！

Taⁿ, 幾日前新課綱hō͘台北高等行政法院判決違法，關心本土教育ê朋友應該繼續爭取台灣囡仔ê基本人權—母語受教權。本土縣市長絕對有責任勇敢來承擔！

上尾後，我用2002年寫ê 228台語詩文來結尾，順續數念228和平紀念日 (Peace Memorial Day)：

1947 ê 228

(28 Feb 2002 張復聚醫師高雄市醫界聯盟)

車聲

掠人ê喝聲

噪耳ê「國語」聲

銃聲

哭聲

驚惶講bē出ê心聲