基督教ê逆理
Oct 24, 2013
陳柏壽
提摩太後書3：14 – 4：5

進前，我用路加福音16章ê不義ê管家講道，講著這個管家按怎經營世間ê財務，最後soah hō͘主人謳咾，講伊是「今世之主」，不止聰明。對「正統」ê基督教倫理來講，這個譬如應該是一種基督教ê逆理。

今仔日，我想欲繼續用這個觀點來看咱基督徒tī這世間，應該用超越通常ê觀念，用不同ê角度，來觀察基督教倫理ê另外ê一面。希望會當引起大家來討論kap思考。

咱通常對聖經ê教示，是用一面ê角度去吸收、去了解。若是用別款ê角度去了解去解說，會感覺冒犯著傳統ê教示，心情會不安。主要是因為保羅tī提摩太後書內面所寫ê話講：「聖經攏是上帝所默示ê，tī教訓、督責、予人歸正、教導人學義，攏有利益，hō͘見若屬上帝ê人，得著完全，預備咱行各樣ê善事。」咱欲用甚麼態度去解說這句聖經？

代先咱來觀察基督教內面2位hō͘人敬佩，代代謳咾ê英雄：雅各kap大衛。

照創世記ê記載（27：1- 35：15），雅各是一位詭計多端ê人物：
– kap伊ê阿兄以掃比起來，以掃是一位真單純、老實、有親情ê人；
– 雅各用欺騙ê手段，對目睭無khoaiⁿê老爸以撒，騙著大囝ê名分，騙著大囝ê祝福；
– 雅各用21年ê時間對伊ê丈人拉班騙著伊所有財產（用咒誓ê方法），然後離開出走；
– 雅各管理伊ê4個某kap伊生ê12ê囝kap無數ê查某囝ê方法就是hō͘伊tī家庭內內鬥，hō͘伊一個人掌握管理權；
– 面對伊老實ê阿兄以掃，伊用o͘-se ê方法，用假情假義ê言語，（阿兄啊，我看著你ê面就親像看著上帝ê面！）等到脫離危機以後，伊就將所有財產、權勢kap榮耀，擴展到附近四方族群（示劍族等），用殘忍欺騙ê方法，征服四方。

聖經中ê上帝並無因為雅各ê詭詐來譴責伊ê做人，上帝若準同意一個欲做民族英雄ê人，著愛錢、愛名、愛愛情、愛權勢，愛世間所有ê一切，hō͘一切攏tī伊手內。為著達成目ê，甚麼手段攏無要緊：白賊、欺騙、操縱、作弄、謀殺、反恩仇報。用按呢上帝培養訓練出伊ê英雄。上帝可以講是原諒伊ê行為。

上帝反轉顯現hō͘雅各看，tī雅博河渡口kap雅各角力（sio-ián），ián歸暗，ián袂贏雅各，最後上帝賜伊一個名叫伊做「以色列」，意思是講雅各kap人kap上帝sio-ián，攏m̄捌輸過。猶太人今仔日叫做以色列，就是因為雅各ê關係。因ê民族ê特質就是認為因是上帝ê選民，因有法度面對面見著上帝，甚至有法度kap上帝sio-ián，而且袂輸。

另外一位聖經中ê英雄叫做大衛，伊也是主耶穌地上族譜ê先祖（馬太福音1章）。咱ê心內尊重伊是英雄，所以若是對伊講無仝款ê話，咱ê心內感覺真不安。其實咱肉體ê存在，就是世間造神運動ê犧牲者。

真濟聖經學者，包括最近Yale神學院Joel Baden所寫ê The Historical David，經過文字用法kap文字結構，以kap時代背景ê分析，認定大部分ê詩篇攏m̄是大衛所寫ê。

大衛偷看烏利亞ê某leh洗身軀，就決定欲娶伊做某，將伊ê丈夫派去戰線戰死。掃羅kap押沙龍死ê時，根據Baden ê分析，大衛並無真正為著in 2人ê死悲哀痛悔，但是大衛時時tī眾人面前「放聲啼哭」，若像所有殺人犯罪ê事攏是別人ê罪過，kap伊無關係。大衛是一位感情中人，性格時常改變，伊對待人無一致ê信賴，無忠實，心理非常複雜。

這位大衛kap頂面講ê雅各ê一生仝款，充滿陰謀、性慾、奸詐、不信、野心、無憐憫。但是，咱通常只意識著一位會唱歌、跳舞、天真ê、溫良恭儉讓ê大衛。學者認為，大衛真正是一位tī宮廷政治kap宗教結構ê旋渦內面，真有技術真會絞滾真會簸懶ê政客，因為按呢四周圍ê人漸漸會來歸順伊服事伊。其實咱若無按呢將大衛神化，咱kap猶太人仝款，會感覺咱ê信仰kap道德結構會崩盤。

其實「聖經」是一本真老實ê經，伊將人間所有ê惡毒、私心、慾望、貪戀一盡曝露tī咱ê目前。聖經說明人生kap人性ê真實ê部份。是按怎這種無所不記ê「聖經」ê記載會當「教導咱學義」呢？我想咱ê上帝是真偉大ê上帝，伊將chiah-ê代誌寫tī聖經內面，來「教導咱學義」。

我想最大ê阻擋就是咱家己對聖經ê一個「既成」ê觀念，kap咱家己設立ê聖經ê界限以kap標準。這是咱家己ê盲點。上帝無愛咱用這種態度來讀伊ê話。咱leh讀聖經m̄通用「單線」kap「直進」ê方法讀。上帝是愛咱用人生ê全面ê幅度去讀、去了解上帝ê話。用縱橫、橫直ê眼光，kap咱tú著實際ê人生配合去思考，才會當親像保羅所講：「才會當得著完全，才會當備辦咱去行各樣ê善」。我想這是咱做基督徒一定愛做ê訓練。

譬如講政治。政治就是掌握統治機器ê意思。埃kapê Morsi因為無法度完全掌握國家ê政治機器，結果是去hō͘政客軍人，用國家ê政治機器將伊chàm tī腳下。台灣閣較是按呢，阿扁無法度完全掌握國家ê統治機器，最後掌權者用國家統治機器，將伊ê生命絞入去統治機器下面。

歷史以來台灣ê政治文化自然會陷落入造神運動及偶像崇拜ê路，抵好親像猶太人崇拜雅各及大衛仝款，咱嘛有過去ê蔣戒石及今仔日ê馬英久。這是上帝第一厭惡ê代誌。上帝佇歷史上欲按怎對待馬英久咱毋知，咱所知ê就是看頂面所講ê聖經：所有人間ê神明及偶像，內面攏是蛀蟲。

照咱教會龔文凱博士tī今年FAPA年歲發表ê觀點是按呢講：今仔日國家機器tī馬一人手中掌握以上，甚麼遊行、議會、公投、罷免、演說、轉型正義、入聯合國，攏總無效。chia-ê努力攏是馬英久造神運動之下ê餘波，袂當發生甚麼作用。龔先生認為馬ê講ê不獨、不統、不武就是完全放棄做一個國家總統ê地位，所以伊有寫批hō͘ Obama總統，Obama總統嘛有寫批hō͘伊，講伊將來政策決定的時一定會記著chia-ê話。

照LAê吳禮涪先生ê講法：今後台派tī任何選舉攏無法度贏，軍公教警濟少有4/500萬票鐵票；大陸新娘4年甚至2 年會得台灣身分證，新娘家族包括已經離婚ê丈夫攏會當申請，這嘛是幾十萬票；100萬台商kap家族tī中國，國民黨有權開放不在籍投票；服貿協定以後台灣所有失業青年以後攏tī中國人做頭家ê企業、公司食頭路，選舉ê時完全受著頭家ê命令，若無聽話就無飯碗；司法完全無獨立；黨產繼續為非作怪，用錢買票。

政治是非常現實kap悽慘ê企業，m̄是我死就是你活，台灣目前ê政治kap基督教倫理kap道德理念無甚麼關係。台灣今日ê政治是人民同士間，hō͘相ê權力鬥爭，嘛會使講是台灣人kap中國人中間ê權力鬥爭，無甚麼理性可言。獅欲開嘴吞食你ê時，kap伊講甚麼理性已經攏無效啦。龔先生kap吳先生ê結論是：咱需要體制外ê運動，喚起全台人民；m̄通hō͘馬一人，玩弄咱整個國家。

這就是咱leh講ê基督教ê逆理：咱知四圍非常悲觀，我想上帝本身嘛非常悲觀。上帝啊！甚麼時陣咱才欲出頭天呢？但是咱著面對現實，面對上帝設tī咱面前ê逆理。上帝ê十字架本身就是上帝逆理ê代表：tī烏暗ê人間社會，上帝犧牲tī十字架頂。

但是我相信咱ê上帝ê十字架是一枝「火leh to̍h ê十字架」。一枝leh火ê十字架， 是一個逆理，是二面ê利刀：刣別人也刣家己；刣屬靈ê敵人，也用這枝刀進入現實世界來征戰，是咱ê力量。上帝ê逆理就是咱ê倚靠，咱tio̍h giâ著這枝火把，繼續tī現實世界進前。