黑面耶穌kap黑面馬利亞

December 12, 2020
kap 朋友分享

黑面耶穌kap黑面馬利亞

陳柏壽牧師

Dec 10, 2020

最近的美國因為發生幾擺警察拍死黑人事件,黑白衝突開始表面化,尤其是有人佇文章中間鼓吹,罵黑人做「黑鬼」,互濟濟台灣人絞入去混亂的旋渦,互人揣無路。

這世間最大不公不平的代誌,就是黑人來世間出世第一日就予人看無起,看做二等人。以前佇台灣猶無感覺,來到美國牧會以後,才知咱台灣人看輕黑人比白人看輕黑人閣較嚴重,因講花園內上帝創造的花有紅有白,但是黑的真少,表示黑的是䆀,無人插黑花佇頂面。

4/50十年前tu̍h來美國讀冊的時,感覺美國學校、報紙、社會稱呼毋是白人的人攏叫做「有色人種」(people of color / colored people),我心內對這種稱呼心內感覺ngaiⁿ-gio̍h ngaiⁿ-gio̍h,感覺因想講「白色」毋是色,別款人的皮膚攏是「有色」。這種稱呼人的方法到今仔日猶無啥改變。雖然按呢講,咱台灣人對黑人的歧視袂輸白人。佳哉咱教會洪長老的查某囝去嫁黑人,閣生2位咖啡色的囝,真得人疼。

幾百年來因為西方的物質文明壯大,軍事力量真強,閣四界去佔別人的土地,所以認為別人的文明kap人種攏卡下等。對人的審美觀念,真濟咱台灣人、日本人在內,攏受著西方文化的瞞騙,自然而然攏感覺白的較媠,黑的卡䆀。這點佇文化的霸權kap競爭上,咱對開始已經輸人。

前年去參加歐洲台灣人同鄉會,去到希臘,才發現真濟庄腳的東方正教的小教會內面拜的馬利亞kap嬰孩耶穌,攏是黑面的。去到埃及嘛是仝款。這個情境對我是一個真大的刺激kap啟發。

17世紀中旬日本德川幕府開始迫害基督徒,尤其是西部長崎的五島列島地區,總共處死37,000位日本基督徒。但是對彼時陣開始,佇日本有信上帝的人,將因的信仰進化、內化,變做隱身的基督徒(kakure krishitan),因佇心內將馬利亞的面形藏落去土底,互伊變做「馬利亞觀音」:外口看是成日本觀音,內底是馬利亞。彼個地區到今猶維持這種真特殊的信仰型式。

我想著中國的白面媽祖出海來到台灣,煞變做黑面媽,因為伊一日到暗為著擔水飼家顧囝,舞到歸面黑黑黑。台灣的宗教演變就是咱台灣人的心路歷程,所以咱的出海媽變做一個黑面媽是有原因的。咱台灣的民間雖然有真強的媽祖信仰,雖然受著中國文化的影響真大,信仰的形態kap內容變質真濟。但是咱若是對正面方向去思考,將來嘛有可能演變做台灣人的「馬利亞媽祖」,因為無論是教義、理念、精神、面形各方面看,這二位神明真會當互相回應kap交通,咱台灣人應該真容易去塑造台灣人的馬利亞kap台灣人的媽祖婆,將因連做伙。這並毋是非常困難的代誌,嘛自然有伊正面的意義。

我想這世間任何宗教攏繼續teh本土化、在地化,歷史以來最嚴格控制教條的天主教,到今仔日嘛已經演變到天下多元的教義。基督教閣較免講。

我想上帝欲愛的世界毋是「世界大同」,伊是愛「世界大不同」,親像伊佇創世記交代世間人的命令按呢(創9:1)。不但按呢上帝降生來到地面,毋是繼續飛佇天頂,是互咱知上帝是kap咱的土地結連做伙,上帝認定咱人是土粉,伊嘛是來世間做土粉,上帝認定黑土是咱的基礎kap基地。

歷史以來無人會當證明耶穌的是甚麼色人,嘛無人知伊爸母約瑟kap馬利亞是甚麼款色人,因為加利利是四面八方各種人出出入入的交通中心點,是東西貿易的中心,是人種文化貨物交流的所在。上帝安排耶穌出世佇遐,實在是最高的攝理。因為對耶穌出世佇加利利,世間人無甚麼好相爭,因為按呢表示世間人種一切平等,所有人攏是上帝的囝,無法度用膚色互相比評。

我佇紐約協和神學院讀冊的時教我的一位黑人老師名叫做James Cone,伊寫一本冊叫做「黑人的解放神學」(A Black Theology of Liberation),這本冊影響真濟學生,特別是黑人學生,漸漸發展一種黑面耶穌的神學,這是現代的宗教產物。

我將信仰的中心對白人耶穌,轉換做黑面耶穌,是我將上帝內化入去我心靈的過程。我雖然毋是黑面,但是面對白人文化的高壓的勢力,我心靈中最大的掙扎kap最後的發現,就是發現這位受苦的黑面耶穌,發現一位來世間無位好來出世,最後生佇寒冷孤單的伯利恆的馬槽內面。伊來世間面對宗教kap政治的惡勢力,予人欺侮、窘逐、壓迫,最後予人釘死佇十字架頂,伊最清楚的象徵就是一位黑面耶穌。

上帝來世間是來做咱的土壤,是予人踳踏的土腳,是予人看無起的人物。伊所傳的福音的真諦kap逆理,是叫咱世間人著疼世間至微細的人、散赤人、艱苦人,親像咱著疼惜咱身軀愈下跤的部分仝款,咱看咱下面彼二支腳:咱的二支腳規日kap o͘-mà-mà的土粉lo̍k-ko͘-moâiⁿ黏黏做伙,伊偝著咱重ìⁿ-ìⁿ歸身軀,chhōa咱行去世界咱愛去的所在。實在想起來,咱經過一世人,下面的二支腳比頂面的頭殼閣卡重要,咱著閣卡保護疼惜伊才著(歌前12:22-23)。

咱的祖先無論起頭是對叼位來,因生活佇台灣是對耕作拖磨做田開始,咱會使講攏是農奴的囝孫,咱攏是黑腳出身的民族,咱攏是為著生存出外開拓拚天下的人,kap咱敬拜的黑面耶穌的出身完全仝款。咱是流浪天涯的無位通去的出外人。真濟佇世界各地的台灣人攏是偝著這款流浪精神的黑面台灣人。

我對一個毋是基督教世家的散赤家庭出身,會使講是經過千山萬水,經過叢林惡勢力的壓迫,才來到今仔日。我回想我信仰的根本,目睭開看著較濟是黑土,不得不迫我去chhōe咱的主耶穌的根,去chhōe一位對我有同情、同心、同苦、同命的上帝。咱kap主耶穌的結合不但是佇咱的外貌的結合,是在佇咱kap所有受苦的同胞的運命的結合,這個結合的意思就是迎接上帝入咱內心的結合。最後咱來去chhōe著的上帝,會就是這位黑面耶穌以及黑面馬利亞,因實在活佇咱的靈魂內面。

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致