生命的坎站

September 4, 2019
kap 朋友分享

生命的坎站

– 陳柏壽 牧師 –

阮阿母80外猶會記佇細漢的時佇教會主日學學著的彼條囡仔歌:

「來信耶穌,來信耶穌, 來信耶穌,現在!

現在來信耶穌,來信耶穌,現在!」

真簡單的歌,但是佇伊80幾歲老人的心懷中,是一條永遠新新的故事,永遠的懷念彼條幼年時代主日學的歌,永遠袂袂記佇,永遠記佇伊心肝,這條歌陪伊行到人生的落尾。

這個老母今佇上帝遐,我想繼續咧唱這條主日學的歌互上帝聽。

我想咱的人生無論按怎輝煌燦爛,成就真大的事業,但是及阮這位平凡的老母比去來,因攏及伊袂比。人講圓仔花毋知bái,大紅花bái毋知。但是阮彼位平凡的老母,一世人toh親像一蕊路邊細細蕊的圓仔花,也親像厝角頭的hibiscus,雖然無人關照,無人看有到目,但是因家己開開開,無人請家己來,伊一世人恬恬照顧這個家,無出聲,佇我心中伊就是世間上偉大的人。

蔣中山醫師是我真敬愛的先輩,我一世人差不多攏是tòe佇伊尻川後咧行:伊對福音的堅持,對台語的疼惜,特別是對台灣故鄉的獻心及貢獻,攏是我的心目中的典型。伊差不多每禮拜攏佇橫濱台灣教會講道。伊嘛勉勵我著繼續這個台語文的工程。但是二個月前因先生娘過身去以後,伊煞變做一個真安靜、無愛講話的人。伊的大囝Meishiu san給我講,欲及伊講話著愛親像囡仔,著講真簡單的話,伊才聽有。

蔣醫師的人生已經進入一個新的坎站,就是變做及古早伊做囡仔仝款,變做真單純的人。咱一世人大概可以用7年做坎站:0-7歲是天使期,7-14歲半天使期;14-21歲青年期;21-56歲壯年期;56-63半老年期;63-77–老年但是煞漸漸退入青少年、幼年期,閣一擺進入天使的境界。進入天使期就毋免閣再煩惱智識、學問、競爭、趁錢、鬥爭、怨嘆、不平種種的代誌。生命會閣回復平靜。

我bat去以色列地中海海邊的Haifa(古早的約舶),聽講是先知約拿去互大魚吞去的所在。海邊歸片攏是咱台灣的大紅花、吊燈仔花,風吹來的時hàiⁿ–來hàiⁿ–去,風景實在真súi。無想到約拿愛坐船去西邊西班牙(古早的他施),但是上帝不准,派一隻海翁給吞落去肚腹內。約拿去互海翁吞去的時表示伊的人生的進路有站節,上帝叫伊行無仝路。

三日三暝約拿佇魚仔肚腹內祈禱上帝,上帝憐憫伊就命令大魚給伊吐出來陸地。第二擺,上帝叫伊去往東的尼尼微(大概是敘利亞的大馬色周圍)做工傳福音,但是福音真歹傳。約拿坐佇樹仔腳,拜托上帝互伊死,但是上帝叫伊毋通死,因為世間真濟人需要伊做工,大馬色就有12萬散赤人,毋捌字,連正手倒手toh分袂清的人。按呢約拿接受新的使命,就歡喜閣活落來啦。

我真喜愛這個童話故事。咱一生就是想愛逃閃上帝的命令,一直欲走路,一直愛脫離上帝的管轄,欲行家己的路。但是一擺閣一擺,咱攏閣互上帝掠倒轉來。約拿的人生就是親像一粒球,上帝sa̍k伊往西,就往西,往東,就往東,結果來看,伊無選擇的自由。咱的人生就是按呢經過一個坎站去到另外新的坎站,由在上帝安排。

我一直感覺基督教影響咱的生活最大的所在,就是規定「安歇日」。一禮拜的安歇日,一年的安歇月,作物的安歇年,千年的安歇喜年,攏是要求咱知影人生有坎站,咱生活著有站節,毋是日日過了接別日,年年過了接別年,親像河水長流,無時停。

守安歇日、守安歇年變做咱人生必要的坎站。不但每禮拜著愛有Stop,每年愛Stop,年紀若到,咱著Stop,歇睏變做咱做人的「過程」及「定律」。除了永遠不變的輪迴宗教以外,世間其他大部份的宗教攏有尊重安息的規矩。安歇意思是講咱的人生,雖然有永遠做嘛做袂了的代誌,但是上帝愛咱會曉Stop。時間若到,咱著看破世間,超越世間,將世間一切攏放後面,向頭前行,超越世間的紛擾。佇安歇日的中間,咱toh會小可看著上帝的面,咱teh安歇的時陣toh會小可看著永生的存在。

最近幾禮拜有幾擺去為著臨終及過身的人做告別,時時會迫我去看著另外彼邊,同時嘛強迫我注目咱這邊。時時佇這種場合我煞毋知欲按怎講道理,因為我本身嘛真毋知「死」的道理。我只有用平常的心,用平常的語言,坐佇喪家的邊仔,甲因做伙流目屎。講真濟技術性宗教的語言,豈真正有法度添滿因的空虛?我只有講:咱著手牽手,做伙來pôaⁿ過這個坎站,這是咱人人生的站節,咱著勇敢給伊pôaⁿ過,向前行,去另外彼邊。

主耶穌有勸人:「出在死人去tâi因的死人,活人只有繼續向前行(馬太8:22)。」「向前行」,毋是停佇人生的某一個坎站停步,輪迴不前。主耶穌的意思是愛咱pôaⁿ過人生逐段的站節,跳過一gám閣一gám的階段,行向閣較súi的將來。人生的頭前實在真súi,有真充實的境界,有真濟新的生命的意義,咱著去充實彼個世界,咱著繼續行落去。.

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致