上帝的天使

August 5, 2017
kap 朋友分享

上帝的天使

– 陳柏壽 牧師 –

但以理書10:12-21

以弗所6:12-17

一個老人生2個囝,人問你這2個囝toh一個卡好?伊講第三個上好!你干單有2個,太有第三個?伊講,tè入去衫仔內,橐袋仔底的,彼個上好!

人講:爸母疼囝長流水,囝孝爸母樹尾風。人因娶某結婚嫁人,一人一家代,有家己的家庭,基督教所傳落來的小家庭制度,每家有因家己的天使管轄teh保護,毋免咱做爸母的替因煩惱。

以賽亞30:21按呢講:“你若是向倒爿(tó-péng),或是向正爿(chiàⁿ-pêng),佇你的後面有聲共你講,這邊是正路,著向前去,毋免憢疑!” 咱人生的道路中最大的問題,就是毋知向倒爿較好,或是向正爿較好,佇hia bong-bong-se̍h。

咱信上帝的人,著揀一條正路,就是看著上帝愛咱行的彼條,勇敢下決心,行落去。

每日你我攏會拄著真濟分叉路,每項代誌我著做選擇,揀一條你感覺是上帝指示的路。

離開New York已經有30冬。這次閣轉去,體驗New York閣較深。除了教會的會友的熱情招待kah鼓勵,kah古早無變以外,New York kah西雅圖有真大的無仝,熱起來真熱,寒起來真寒;佇車頭等火車親像佇火爐,一下入車煞親像入去冰箱;人人佇街路駛車攏親像咧拚生命,無欲讓人,我欲看路名,小可踏brake ,toh 有人túi 後面給你poⁿ,poⁿ了伊欲給你超車,閣越頭目睭共你kàng一下。逐日駛車攏去予人poⁿ真儕擺,人人互相看樣,人poⁿ我嘛poⁿ,poⁿ來poⁿ去真自然,這是New York的文化,人人接受,變做家己生活的一部分,家己生命的一部分,教會內的人,踏出門外,就嘛變做Newyorker。

回想過去十幾冬佇New York讀冊及牧會的時陣,我的生活態度、性格、思想、講話,可能就是一個完全的Newyorker,我家己毋知nā-tiāⁿ。真正有影,tòa一所在,就產生一款人:台灣tòa久會變做台灣人,日本tòa久會變做日本人,Norway、Denmark tòa久自然帶有海賊的氣質,chím-má是非常開明的海賊。我的細漢查某囝講伊是New York生的,伊是Newyorker,伊欲住在New York。佇New York的大環境、氣候、社會的影響,伊愈來愈成New York的人,伊家己無法度控制,伊家己嘛毋知。

我對雲林莊腳出身,去日本娶某,生四個囝,做牧師退休佇西雅圖,回想過去的一切一切,嘛攏毋是我會當控制的代誌。以前攏想講一切是我家己的決定,家己的奮鬥,家己的才情。chím-má想起來,攏毋是,攏是天公上帝佇後壁teh安排。

但是我想阮細漢查某囝,伊欲揀tòa New York,閣去嫁一個佇New York出世的中國人做尪。佇遮的所有的代誌的後面,我想攏有上帝好的意思。世間萬事的運行,我看毋是干單看表面,毋是看物質,毋是看經濟,毋是看肉體,毋是干單看摸會著、看會著、鼻會著、tam會著的物質,一切攏在後面的精神及大環境做主。嘛會使講:一切的後面有上帝做主宰,上帝造成咱的大環境,用大環境來包圍咱,互咱佇不知不覺中間,變做一個互相無仝款的一個人。

咱的先輩,佇日本時代,變做有日本人的性格的台灣人,這個日本性格是明治時代受德國教育的福澤諭吉、後藤新平等傳落來的「日本台灣」性格。今仔日佇台灣經過60年中國教育以後的台灣人,嘛已經變做無共款的台灣人。佇北京共產教育下面的中國人,及世界各地人有真無共款的所在。有一個牧師來共我講,伊去Mercy Island教會,有中國來的婦人人給伊講,請你改用「國語」講道,我會chhōa 2、30人來互你。伊問我的意見。我給伊講,我mā有仝款經驗,但是我攏給因講,「請恁毋通來!」。中國人著去講中國話的教會,台灣人的教會是台灣人骨肉的關係,有台灣人的天使teh管,中國教會有中國人的天使teh管。

上帝是創造的上帝。伊容允不同環境塑造不同的人間。不同的天使培養不同的體格、思想、性格、運命。人毋是因為伊食甚麼,才變做一個人;嘛m̄-sī因為伊想甚麼、穿甚麼、hiù甚麼芳水,才變做一個人;嘛m̄-sī因為伊的家世血統、祖公家譜,才變做一個人。每人攏因為顧佇伊頭殼盯(tèng)的無共款的天使,產生一生不同的命運。咱台灣人講:「頭頂三吋有神明」,我是想講人人頭殼頂有伊家己的天使。

紀元前五世紀波斯帝國佔領全部西南亞洲及東地中海。但以理受命做波斯帝國的宰相。伊做宰相的第一日,思思念念的只有一項代誌,就是求上帝互波斯王開恩,放伊的猶太人百姓轉去耶路撒冷重建聖殿。聖經講但以理有這一項意念的第一日,上帝已經聽見伊的祈禱。但是聖經嘛寫:伊的祈禱,去互另外一個波斯的靈界的勢力,白話字聖經寫做「波斯的天使」,阻擋21日,袂得通過。

上帝的天使著及別個天使的勢力鬥爭21日。聖經講,上帝毋是無teh聽,但以理的祈禱第一日上帝已經有聽著。但是對第一日,上帝的天使,及對敵的天使就開始戰鬥。上帝的勢力及另外地上的勢力戰鬥21日的時間。21日,但以理艱苦流目屎,袂食袂睏,心情真艱苦,伊想上帝無teh聽。

但以理耐心等21日,上帝才派天使長米迦勒出現,不但按呢,上帝閣講你接落去著應戰希臘的天使的勢力,一關過一關。亞述巴比倫以後就是波斯,波斯去互隔壁的小國希臘吞去,興起橫跨地中海的阿歷山大帝國,接落去就是羅馬帝國的世界,然後產生真大的歐洲文明、文藝復興、宗教改革,產生葡桃牙、西班牙、英國、日本、美國的海上霸權,一國過一國 ,一朝過一朝,每一朝代上帝攏有安排無共款的勢力來支配。會使講:上帝安排的天使teh創造及支配世界,這叫做歷史。

咱今仔日講的但以理的故事就是teh講佇彼個歷史的時點,上帝佇歷史的大輪中間做工。上帝teh做工,世間無共款的勢力,嘛teh做工。咱世間人無真容易了解,彼時陣嘛無容易看出。本來咱想講上帝一定會真緊會答應,但是上帝無hiah簡單應聲。

咱祈禱時時講:上帝啊,你「chím-má」著緊來幫助,你chím-má就互我的病緊好!這是咱做一個有限、脆弱、幼稚的人間會當發出的心聲。但是毋知上帝為著欲完成咱的「chím-má」,著經過真濟艱苦的21日的戰鬥。21日以後上帝出現不過表示上帝及惡勢力戰鬥暫時的結束。

以色列人重建聖城等21日,有真濟時陣咱等210日嘛無聽見上帝的聲,有真濟時陣咱等2000日、20,000 日嘛無聽見上帝的聲。咱台灣人求上帝互台灣獨立出頭天,祈禱200年,我想上帝確實有聽著,但是毋是chím-má。chím-má不過是猶teh戰爭。

咱佇這個地面,是及上帝做伙戰鬥。天使長米迦勒是及另外一個看袂著的靈的勢力戰鬥。地上的權勢及勢力,可以講是各方的天使,主宰各方的個人、機構、組織、團體、政府、學校、教會。各有各的生長的氣質及文化,因為各有各的天使teh主宰。

每一間教會有因的文化氣質及欲進前的方向。譬如講這次轉去New York的「衛鄉教會」,伊原來的自由、開放、條直、純情、善良、公義的特質猶久真清楚,因為因的天使,猶咧chhōa路。啟示錄內面約翰寄批互七間教會,毋是寄互教會本身,第一句是講寫欲寄互管理彼間教會頭殼頂的「天使」。

最近神學家Harvey Cox寫一本真好的冊「The Market as God」。伊講hia-ê大教會,規千幾萬人的教會―Mega Churches ,袂死,因為因的囝攏做牧師,親像Billy Graham按呢,準備好好欲接班。伊講hia-ê大公司袂死,因為雖然創辦人死,公司的制度猶留佇hia,Microsoft、Boeing、大銀行Chase, City Bank,愈大間,愈驚伊倒。所以伊講基督教及Market結做伙,Market變做基督教的上帝。

最近Ford汽車公司,拄拄Trump 就任就講欲將海外工廠搬搬轉來美國,chím-má忽然煞宣布欲將中型汽車工場,全部搬去中國設廠,這個公司有因的政策及因的天使的主導,冥冥之中有因無仝的文化及做法;兆豐銀行及Microsoft行的路無仝。有的公司,為著趁錢,將污染的黑水,放落去歸仁長榮大學邊的後勁溪,黑má–ma,黑到連細菌袂活,叫做台灣的烏龍江,因為有無仝的天使teh管,有惡的天使、惡的頭家teh管。古早的溪邊厝國民學校,及Bellevue的Public Scho͘ol 教出來的giⁿ-a就是無同。台灣的政府及北京的政府,行的路就是無仝款。因攏有因無仝款的天使teh chhōa路。

這款每日戰鬥的行為,用保羅的話,就是每日teh對付「天空中屬靈氣的惡魔」。電腦內面咱才知影彼個有名的飛佇天頂hip看見台灣的齊柏林先生的最後的生涯,直昇機飛去台東池上鄉后里及玉里附近的一間山內的寺廟叫做法林寺,寺內的閉路電視看著齊柏林先生,跪佇遐祈禱十外分,然後伊徛起來,去khǹg佇後面的奉獻箱獻錢,然後飛機起飛,無到一點鐘,就在豐濱鄉長虹橋邊sia̍k落來。咱真o͘h解說其中的因果關係。但是嘛袂使講完全無關係,無夠一點鐘就將一個活跳跳的生命款去。

天空中,意思是講看袂著的惡靈,遮的惡靈其實就是活佇地面上,活佇咱生活四圍的一切,因活佇咱的社會、公司、政府、學校、教會內面。因活佇環境污染、氣候變遷、海水起漲、私慾橫行、獨裁橫霸、壓迫人權、歧視女性、種族優越等等現象。遮的攏是地上惡靈的作為。咱是活佇充滿惡靈的世間內面。甚麼時陣欲破病,甚麼時陣欲互車chông著無人知,只有求上帝的保惠師天使來保護。

咱著會記得咱活佇這世間逐日攏teh相戰,逐日teh為上帝相戰,逐日及天使長米迦勒做伙相戰,及世間執政的、掌權的、管轄幽暗世界的、天空中屬靈氣的惡魔相戰。這我想是上帝互咱做人活佇世間的意義。

馬太13章36開始,主耶穌講一段真深的譬如,講一個主人,意思是講上帝,去園ni掖麥子,但是暗時若到,魔鬼就去田ni掖稗仔,麥仔及稗仔做伙大欉。農夫給主人講,請互阮去田ni給稗仔khau khau起來,主人講:「毋通!放因做伙大欉。等到最後,就是世界末日的時,上帝會給稗仔捆捆做伙,放火燒。」

上帝容允魔鬼去田ni 掖稗仔子,這項代誌實在真o͘h去了解,咱人按怎想嘛想袂通。不但按呢,上帝是日時掖麥仔,但是魔鬼是趁暗時,無人看的時,來偷掖。就是佇咱不知不覺的時,來走入去咱的心田內面。

我讀國民學校的時佇雲林古坑棋盤厝莊bat去田ni khau稗仔,囡仔腳卡細支袂去踏著稻仔,稻仔大到遮高的時,稗仔會比稻仔卡高,閣會親像高梁彼款子。阮若khau一叢會趁5角。阮攏去仔店買含仔糖。

我感覺主耶穌對我的教示有一項真深的所在,就是上帝容允咱活佇這世間,是非不明,烏白不分,麥仔稗仔濫濫參參的世界。上帝叫咱活佇這款世界,講起來實在真無道理。

濟少我teh想有一項道理,就是上帝咱佇這世間,是非不明的中間,真濟勢力,各方山頭,各地勢力,各人有各人的保護的天使的中間,咱欲揀佗位一旁?

使徒約翰佇約翰一書3章給咱講:親愛的兄弟啊,這世間有遮這靈,有遮這勢力,遮濟天使,但是毋通逐項攏信,今仔日信這個,明仔載信彼個,心神不定,飛來飛去!咱著去chhōe甚麼才是出佇上帝,甚麼是上帝的好意,甚麼才真正是上帝的天使的指示。咱著信靠飛佇咱頭殼頂的天使來行天路。

7-30-17

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致