對破碎開始講起

February 8, 2017
kap 朋友分享

對破碎開始講起

-陳柏壽 牧師-

頂個月欲轉去以前,心內祈禱,希望阿母會當等阮轉去。結果伊無法度等,到位的時,伊已經先轉去,一支腳瘦到chhun一支骨。

我做告別式的時,有kā阿母kap大家講,阮遮的tòa美國的真不孝,佇伊晚年,攏袂當陪伴伊。雖然40 幾年以來,每個月攏有寄錢去互阿母,但是我知伊的心內完全無teh愛錢。我無佇伊身邊,伊的心肝頭親像khì一角。Chím-má叫阿母嘛已經bē hù lah!阿母的死留互我這個天涯浪子一粒破碎的心肝。

看伊的thang-su下面猶藏幾仔斤的1 cent  5 cent的銀角仔,才知hit年來美國看阮的時,雖然重ìⁿ–ìⁿ,但是伊想這是錢,m̄知這是無值錢的物件,較重嘛欲mo̍͘h轉去,mo̍͘h轉去互囝孫仔,pó͘-珍-珍,藏佇衫仔廚下面。

自從嫁阮阿爸以後,m̄捌過著好的日子,hoat-lô͘ 6 個囝以外,著服侍大家大官,iⁿ草iⁿ,煮豬菜、飼豬、擔水、phak粟、路邊挽豬母乳,偝囡仔peh山路看醫生。一世人嫁雞隨雞,m̄捌怨嘆一句話。伊就按呢恬恬轉去lah。

文夏的「黃昏的故鄉」唱講「白雲啊,你若欲去,請你帶著我心情,送去互伊,我的阿母。喂!m̄通來忘記佇的!」Chím-má阿母已經去lah,真久以來心內思思念念的對象,嘛已經消失lah,台灣這個故鄉,嘛親像阿母teh kā我ia̍t手,“囝啊!再會lah!” 伊一直行一直遠去,giōng-giōng欲無khoàiⁿ lah!「台灣人」這種「物種」漸漸嘛欲變做絕種(endangered species),giōng-giōng欲無khoàiⁿ lah!因為無真濟人會曉親像咱按呢,用台灣話敬拜上帝lah!

咱的生命對出世開始,學爬學行路,用二枝腳徛起來,真無簡單,後來讀冊,結婚,進入社會,kah人拍拚,就是真無自然的代誌。咱的一生攏是佇無自然、反自然的環境內面奮發拍拚、抵抗自然中長大。一直到最後欲過身,轉去大自然的懷抱,轉去天父上帝的所在,轉去人的生命最後的歸宿,這叫做「自然」。咱人一生最後的歸宿,一生追求的最後目標,就是回歸自然。回歸自然就是圓滿,就是幸福,就是慶祝。

人生十項有8項9項是悲傷kap流目屎。最近台灣teh鬧homosexual的問題,反對彼邊主要理由是講單性戀「違反基本的家庭倫理」的規矩。但是對基督傳教第一日開始,主耶穌就傳違反當時猶太社會最根本的道德kap社會倫理:譬如講去疼敵人。猶太人到今仔日的孔子教仝款,強調以直攻直,以眼還眼,以牙還牙,欠一斤著還16兩,人siàn正邊喙䫌(chhùi-phé),咱著給伊sián倒邊。這種倫理是到今仔日猶太人kap中國人所執守的倫理kap生活的原則。

但是主耶穌講的完全倒反。譬如講施捨、祈禱、禁食、咒誓、寬容、論斷,攏m̄是正當的猶太人的生活準則。伊閣講,伊來是欲tòa火來世間,查某囝欲反抗大家,人甚至著反抗爸母,老爸死m̄免急去埋等等。真濟所在咱m̄是用字面就會當了解主耶穌,因為伊有卡深的意義。咱干單一項咱tio̍h知,就是耶穌違反傳統的價值的教示。

耶穌基督誕生的故事是對一個破碎的心肝kah giōng欲破碎的家庭開始。馬太福音1:18-21講著約瑟拄才(tù-chiá)送定互馬利亞,換手指,準備欲結婚。二人猶未上房,就忽然發現馬利亞有身。

這項代誌對查埔人來講是一個真大的打擊。第一項代誌佇伊心內想會著的,就是給伊離婚。若是離婚,馬利亞可能今後就是流浪街頭,做乞食分錢,猶無就是去做妓女。對馬利亞來講,這一定是一個真可憐的結局。

但是若是無kā伊離婚,約瑟一世人就tio̍h mo̍͘h這個m̄是伊家己的囝,飼這個別人囝一世人。這嘛是一世人的悲劇。

聖經的故事講來到遮,真清楚是teh暗示一個悲劇giōng-giōng beh開始。

曾經有一個做牧師的好朋友來阮tau訪問,kā我講一個故事:自從伊出世以來,in老爸攏一直認為伊m̄是伊的囝。一世人in老爸心內攏對伊無好,無欲照顧伊,對伊一直有真強的偏見。伊家己心內真艱苦,in老爸一世人嘛擔著這個包袱,心內嘛真痛苦。這項代誌,in二人攏無法度解決,一直到in老爸入棺柴,嘛無人會解決。kap 主耶穌仝款,無人知影伊的身世,互人講伊(或是老母)違反傳統的社會倫常。

馬太福音是針對猶太人所寫的冊。除了拄才講的馬利亞懷孕,破壞傳統的倫理以外,馬太寫的耶穌基督的族譜來看,耶穌的祖先真濟是對破碎無倫理的家庭出身,譬喻講:雅各的丈人拉班騙雅各,互伊的大查某囝利亞先kah雅各同房,所以生耶穌的先祖猶大,真濟是用騙來的;主耶穌的先祖中有拉合,伊是迦南人妓女,因為救約書亞的探仔,互以色列軍隊入迦南地,伊後來煞變做主耶穌的先祖;路得m̄是猶太人,因ta-ke 拿俄米教伊講,今暗去bi̍h佇因翁的親成波阿斯的麥仔園的麥仔堆遐,看伊啉酒飲到masemase的時,去kā伊同房,按呢這個外邦查某後來就是耶穌基督的先祖。這種違反傳統家庭價值的代誌,佇猶太聖經中隨時可見,處處可見。

嬰孩耶穌一下出世,就互附近所有的老母老爸哭聲上天,因為伯利恆所有二歲以下的查埔囝,攏去互惡魔暴君希律王刣死lah!至高上帝的誕生,產生hiah-nī濟破碎的家庭。互人真袂了解;是按怎萬王的王、萬主的主,放in厝邊親成苦難,家己一家逃走去埃及?若m̄是耶穌一家人的自私,抑無就是這個嬰孩的耶穌上帝,佇彼個時陣,無法度對付惡魔暴君的勢力?這是基督教互現實世間產生破碎的現實。

東方社會古典的記載,所有聖人君主攏是完人。總是基督教的聖經記載的歷史真坦白,真實在,無暗蓋,伊將歷史的真實,人性的犯罪、惡性、欺騙、不實,真清楚表明,互信徒家己去瞭解kap判斷。

約瑟是一個真好家庭的出身,咱台灣人講就是「望族」出身。及一千年前去互兄弟賣去埃及的約瑟仝款,因二人的老爸的名攏叫做雅各。這二位約瑟,拄著絕景的時陣,上帝的天使出現,佇夢中指示in頭前tio̍h行的路。上帝就是佇人的社會中的破碎kap完全失望內面,佇完全無解的中間,天使出現,kā約瑟講:“m̄免驚!”(Fear Not!)。真濟 “m̄免驚!”的啟示,是對夢中來的。

約瑟是一個義人,伊相信上帝佇夢中啟示伊的話,接受馬利亞做某。

古早時代無親像現代的美國人,khioh別人的囝來飼。這個約瑟完全靠上帝的話過日,而且號囝的名叫耶穌。上帝互約瑟破碎的心,彌補起來。真濟天主教St. Joseph教會內面有約瑟抱著嬰孩耶穌的相,咱會當看著老爸疼囝的親情。

上帝揀猶太地最烏暗的時代降生。政治上猶太人分二派:一派是符合權勢派,就是體制內的勢力,叫做撒都該人及文士階級;另外一派叫做法利賽人及奮銳黨,就是反體制,反羅馬的勢力。耶穌的學生這二派的人攏有,有靠羅馬勢力來抽稅人的馬大;嘛有反對黨的西門彼得。這款情形真抵好及咱今仔日的台灣仝款仝款。雖然民進黨有leh執政,但是倚中國的勢力猶是真強。

社會上有錢有勢的人真橫霸,對散赤人真歹,社會真無公義。

主耶穌為著欲彌補這個破碎的社會,降生佇這款的世界,真歹做人,嘛真歹做上帝。有人欲掠伊的孔縫,欲陷害伊,問伊講:納稅互該撒羅馬皇帝,tio̍h抑m̄ tio̍h?伊只有應講:提一個銀仔出來,恁看,這個相是甚麼人的相?In講是該撒的相,耶穌就講,該撒的歸該撒,上帝的歸上帝。這款應話,有應等於無應。因為耶穌應佗位一旁攏m̄好,若m̄是互人講伊是咧反羅馬,就是互人講伊是體制派。二邊攏m̄是人。

上帝真知影,伊欲來世間進前,對in老爸約瑟的破碎的心肝開始,一直到伊面對的破碎的猶太社會,伊的使命就是欲彌補社會的破空。

上帝道成肉体降生,就是欲完成伊的創造。第一擺的創世記,因為人的惡性,世間變做真烏暗;上帝這擺著親自來世間,叫做第二擺的創世記。這擺上帝親自來世間,目的是希望世間人人人攏會得救,希望世間每一個家庭,攏會當圓滿,希望老爸約瑟的失望kap破碎的心肝,會當得著彌補。

日本有一款職人是專門補破碗及修理破瓷仔。這是tio̍h愛用真深的技術及真大的耐心。但是經過伊修補以後,這個瓷仔變造真媠閣真貴氣,變造一個寶貝。

過去的歹看面,過去家己所拄著、過去所做過的代誌、過去的見笑、過去欠人的不住、過去欠人的債,一切一切攏因為主耶穌上帝親自來,一紋一紋kā咱補起來,互咱的破碎,變做圓滿。

上帝的降生,最大的心意就是來世間補破網補破瓷仔。我想上帝心肝來世間,本來就無準備做甚麼大代誌。若無伊m̄免去死佇十字架。十字架本來是犧牲的記號,是犯罪的記號。咱chím-má才知影,上帝無叫天兵天馬出現,一方面表示上帝腳手慢鈍,真袂liú-liah;另外表示佇不公不義的社會,犯罪並m̄是歹代誌,犯罪變做正義的記號。

咱來看上帝做代誌是一絲一絲thīⁿ,一紋一紋補,無搶工,無急好。人講:「緊紡無好紗,緊做無好大家」。

我有時感覺上帝為著欲達到修補的目的,會將無路用的磁器kā拍互破,才重頭修補。咱人生拄著真濟想袂到的打擊,真悽慘的情境,彼時陣就是上帝用伊的聖手,重頭塑造咱的人生的時陣。Chím-má回想過去,才知有上帝的好意,才知按怎感謝。

幾十年以來,中國人kā全世界洗腦「一中政策」。「一中政策」變做寶貝,無人敢摸這個瓷仔,chím-má去互Donald Trump一聲kā摃互破,伊chím-má開始慢慢補,m̄知可能會是上帝的好意?

咱年紀愈大,欲修補破碎的生命,最好是對咱的身邊開始,對咱家己的性格、偏見、固執、私心開始,然後對咱的爸母、妻子、翁婿、兄弟姊妹開始,最後才對咱的親成、朋友,慢慢修補,慢慢改進。破碎m̄是見笑,咱人人攏有破碎的過去,但是咱tio̍h相信,上帝會給咱嘛會教咱彌補。

第一項就是除去咱的驕傲。咱開始關心、注重比咱卡少年的人講的話。

第二項就是除去怨妒的心。別人比咱身軀卡健康;別人的家庭卡圓滿;別人卡有錢。這款怨妒的心情,攏tio̍h除去。

第三項就是m̄通想氣。m̄通對別人講粗魯或侮辱的話。

第四m̄通互家己感覺真無聊、怨嘆、無代誌做,感覺年老的痛苦。這種心病會互咱的生命減短。

第五m̄通自私。有人愈老愈愛錢,愈貪心,逐項攏欲愛。這是一種老人病。

第六m̄通食尚濟。年紀愈大,失去社會生活的重心,只有khǹg佇食飯,用食飯來消透家己心理上的負擔。結果心理的負擔並無減少,肉體上的負擔增加真濟。

第七項因為年老,卡無人欲kap你做伙,世間人看著老人面貌無表情,看著紅嬰仔媠tang-tang,大家攏真歡喜,chhùi-chhio ba̍k-chhio。老人朋友卡少,若是有人對你卡親切,你tio̍h欲全身軀、全心情,欲倚賴彼個人,結果互二邊負擔增加,互對方m̄敢kah你來往。

老人tio̍h愛忍受孤單。老來以後,孤單就是每一個老人的天命,m̄免強求。何況世間真濟知己的好朋友,m̄免定定做伙才是好友,一年一擺、二擺通電話,寫一張賀年片,就夠額。咱嘛m̄通靠囝來kā咱有孝,in若是因來有孝,咱是真感謝,若無,是應當的。因為美國人講:「生囝就是欲生來反對咱的人」(To rebel against the parents is what children are born for)。

咱孤單的時就是咱老人欲生長的時,老人孤單的時就是欲互老人看著上帝是世間唯一會當倚靠的人,愈孤單就是愈看著咱的上帝愈清楚、看上帝愈美麗的時。當你發現你的身邊有kap你仝款遐爾濟孤單的心靈,你會自然發現身邊有遐爾濟你的朋友,你並無孤單。

上帝叫咱來世間補破網,意思是講咱來世間m̄免做甚物大代誌,m̄免講甚物大道理,上帝是叫咱來世間,kā咱家己四周圍補互好,kā咱家己的破碎角補互tīⁿ,kā咱厝邊隔壁親人朋友叫叫轉來,kā咱欠親人朋友的債,欠台灣故鄉的債,趁這個最後機會彌補過來。

保羅佇加拉太人書5:19-24總結來講,就是叫咱轉來基督教的原本:tio̍h愛有仁愛、喜樂、和平、忍耐、恩慈、良善、信實、溫柔、節制。遮的就是咱信仰kap生活的根本。

「所以咱m̄通喪膽。外口看,咱的肉體雖然漸漸毀壞,但是咱的內心卻一日比一日更新。」(哥林多後書4:16)

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致