啊若無欲按那

December 16, 1999
kap 朋友分享

啊若無欲按那
~Ana  Moana ê 世界~

– 陳柏壽牧師 –

來去Hawaii,人人攏知有一個最有名ê Shopping Center叫作Ala Moana,咱台灣人記地名歹記,攏kā伊唸作「啊若無欲按那!」

我調來Hawaii作人ê牧師已經有年半啦。Tú來ê時,看著四界人攏kā咱請安:「Aloha!」 「Aloha!」;清涼ê海風,椰子葉á tī風裡搖來搖去,親像少女hula舞ê姿態;四季如春,無寒無熱,早起起床mā m̄免驚去寒著,暗時上床mā m̄免煩惱蓋被,一領aloha shirt會使年頭穿到年尾,出門一雙千拖á (chhián thoa) 穿leh,五隻腳指頭á攏露顯顯,穿短褲來作禮拜ê人mā真chē,掛油食粿(領帶)來教會ê人差不多是無。寒著ê人才穿長袖 (ńg) ê衫。Tī  chia無地動,風颱mā真少tī這粒芋仔島(Oahu)上陸。

我這粒蕃薯仔 tòa入來芋仔島,tòa久真驚會變作芋仔蕃薯。總講一句,咱台灣gín-á移民來這粒芋仔ê歷史不過是三十外冬,人口總共差不多六千,包括無身分偷走船ê人在內。大部分攏tòa tī這粒芋仔頂。中國人ê新移民日日增加,緊慢會超過台灣人ê人口。日本人移民大部份是一百三十外冬前明治時代就開始,大部份攏是對沖繩(Okinawa)來ê。日裔人口占全州總人口ê 40%以上。有人講東京都有23區,Hawaii是屬東京都第24區,因為日本人真愛來chia thit-thô。日本ê青年男女beh結婚,無論啥物教,攏會來Hawaii ê基督教會十字架下面,問in有信耶穌無,攏會講「有!」。In踏出教會後猶會記得這句話抑bē,咱m̄知。

日本文化影響Hawaii真大,chia ê厝攏是日本式ê khah chē ,地方ê語言mā摻真chē日語。中國移民雖然有二百外冬ê歷史,但是今á日Hawaii ê政治、文化、教育、大眾傳播、企業經營各方面,日本人攏khah占優先。Tòa tī chia ê白人khah會認同本地文化,in ê人口亦無超過總人口ê半數,所以種族對立ê情形比美國東部khah少。中國來ê移民大部份有中國人ê主觀性:「夏威夷」亦是in原來輕視在地人ê字眼;in叫Honolulu作「檀香山」,全世界ê人無人知in是teh講啥物所在。In對台灣人ê獨立運動亦無啥物同情。多年以來,國民黨tī chia ê勢頭真大,用中華航空公司thàn ê私奇錢,tī市中心買一大區叫作「中華文化中心」。但是in tī chia做代誌,差不多是tī牛椆內相鬥ê步數真gâu,對外口人或是外國人是無半步。

台灣有錢人來chia退休ê人bē少,最近因為台灣地動,koh台灣ê生態環境不良,tùi台灣移民來chia ê人數有增加ê傾向。台灣人社會中,高等ê資產階級人數無chē,退休養老ê人以外就是醫生人。Tī chia有差不多二、三十位台灣醫生,其中有三、四位基督徒醫生tī台灣教會內真熱心;其他醫生若是屬慈濟就是kap教會無關係。中產階級ê部分是教授、工程師、農場主人(以青菜菜農為主,供應全島需要)、小貿易商等,人數mā無chē。絕大部分生活tī chia ê台灣人差不多攏屬tī勞動階級、小工階級、ABC Store(雜貨店)店員、旅社服務生、計程車司機,kap領社會救濟金生活ê人。

這種完全資本主義化、消費主義化、觀光主義化ê世界,真正是一個「啊若無欲按那!」ê世界。資本家主宰一切,所有最koân大樓差不多攏是觀光旅館。Tīchia無啥物工業,無大ê商業,無高科技,甚至連農業也無法度生存。有限ê農地只有生產資本家指定ê經濟作物,供應美國大陸;地方需要ê民生作物,完全無teh照顧。Hawaii ê天氣是出產根蕉kap檨á (soāiⁿ-á)上好ê所在,但是去市á買著ê攏是南美產ê根蕉kap檨á。In ê經濟結構我想一定有問題。Chia ê生活費用kap美國任何都市比起來,最少貴三分之一。Chia ê土地kap不動產可能是美國第一貴ê所在。對人口就業ê分析來看,咱就知絕大部分ê人是生活tī散鄉邊緣,(全國平均國民所得是屬真低ê州之一)。人人攏只好用笑面,用Aloha,用最低ê工資,來維持最有限ê生活。人人無其他ê選擇,亦無發展ê空間。真正是「啊若無欲按那!」

「牧師啊!我早起去Sandwich工場切菜,八點切到下晡二點,khiā六點鐘,一點鐘thàn 5 kho͘ 75sián (US$5.75/hour);下晡二點半到暗時十點去顧店賣gín-á 衫,bē使坐,koh khiā七點鐘,一點鐘6 kho͘,扣稅金剩5.50。一日khiā十三點鐘,我giōng-giōng beh暈去啦!為著顧家飼kiáⁿŽ…。」我聽著阿雪姊ê艱難,心內真艱苦。

你若去到Ala Moana,全世界第一流ê名牌,所有貴森森ê高級品攏tī chia,你若有錢,全世界啥物好khang ê攏tī chia!海風溫溫a吹,親像少女teh跳Hula!

你若有一日真正beh來這個『啊若無欲按那』ê所在,請你tio̍h一定chhōe來這間島上唯一ê台灣基督長老教會heh ! 咱thang作伙來唱hit條「啊若無欲按那?!」

(本文刊載tī「台文通訊」第71期,Dec., 1999,
作者是Hawaii台灣基督長老教會牧師)

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致