新千年代門口ê變數

January 16, 2000
kap 朋友分享

新千年代門口ê變數
<聰美紀念基金會>

– 陳柏壽牧師 –

有人期待來到千禧年ê門口,in向政府kap銀行貸款ê債務,因為電腦忽然故障,一筆勾銷,天下太平。但是這個物資世界ê運作無hiah好空,無論天公上帝按怎交代,一仙一分都bē hō͘你走閃去。Che若準是一種不變ê幻想。

過去半千年代ê台灣,是風風雨雨ê歷史。咱ê查某祖已經tī hia tòa五、六千甚至萬外冬,查甫祖mā來這個美麗島過半ê千冬,後來koh有日本仔海賊,有紅毛仔(就是荷蘭仔),亦有西班牙、葡萄牙人,來chia定居做生理,佔土地,開農場,種甘蔗。咱ê查甫祖kap查某祖ê運命,就是kap台灣ê土地結作一伙,kap台灣ê命運剝bē開,叫做『台灣人』,mā叫做『台灣民族』。五十冬前,koh 有一批隨獨裁政權蔣家來ê移民,in mā tī chia kātòa 落去。台灣變做人種血統文化交纏ê綜合ê所在。

中國獨裁政權統治五十年以來,台灣人去hō͘人拍、趕、分散到全世界去流浪、去討thàn;日本、歐洲、南美四界攏有台灣人。台灣人變作世界觀真闊ê民族。Che是新時代ê台灣人ê質變。

因為現代資訊ê發達,島內ê台灣人kap外口ê世界整體,結連作伙,台灣問題變作世界問題,代誌無法度hō͘中國人一手包辦,台灣人獨立出頭天ê國家意識,台灣人對家己語言文化ê珍惜,che攏是這個新時代新ê『變數』。

台灣人ê生命中有真chē『常數』。幾千萬年以來,台灣人tio̍h作工、飼家、教育子女,為著顧三頓,m̄驚田水冷sng-sng!Chia ê代誌攏是咱生命ê『常數』。為著食飯來拖磨過日,無閒一世人。Che kap古早台灣人歷史中受支配,無發言權ê運命,攏是台灣人建國運動中難克服ê『常數』,是一種宿命ê部份。

Chit-má咱攏行來到新ê千年代ê門口,咱雖然仝款面對著thàn食、飼家、養老、衰退ê過程,但是咱ê目睭已經看kah清清楚楚,看著新千年代ê chē chē變數,展現tī咱ê面前:

第三千年ê第一大變數是:「所有獨一ê權威,漸漸消失」。耶穌若是真正ê上帝降世,伊一定是降臨tī無仝ê民族、文化、語言、社會ê內面。古早猶太人ê選民主義,以及今日世界ê文化、政治、軍事、宗教ê霸權主義,會漸漸退色。一個新ê分立自主ê世界產生啦!新ê世界是互相尊重,互相學習,互相敬愛ê普世觀念,所有ê草根tī各所在攏teh puh芽,台灣語言變作也是世間真súi ê 語言ê一種,台灣ê文化政治ê獨立運動,是世界整體潮流ê一部份。人類ê生存價值,「無」意識 kap「潛」意識ê部份,猶teh主宰一切,古籍古典文獻資料,tī人類ê生存中,猶不過占真有限ê部份。人beh活落去,人beh食飯ê本能,人ê良心等等無意識kap潛意識ê行為,猶是人存在ê基本。上帝經過人間這部份ê動物性kap有限性來時時提醒作人應該有ê基本態度,來發現人間ê共性 (common humanness / humanity),以及自然率ê攝理。

第三千年世紀ê第二大變數,是「男女ê地位kap定點ê改變」。新時代ê男人應該是更加勇敢、進取、清楚、誠實ê男人;新時代ê女人應該是更加美麗、疼心、忍耐、韌命ê女人。男女平等kap分權ê觀念,男女角色ê分別發展kap調和,是新koh進步ê民族象徵。台灣民族經過幾世紀ê文化融合,代表一種kap中國民族絕然無仝ê文化形態。台灣男女絕對bē使陷入熱鬼、風神鬼ê魔術;亦bē使陷入冷鬼、陰險鬼ê陷坑。新年代ê台灣青年,應該是大方、開放、平衡生長ê人格。

新時代第三大ê變數在tī「人間性ê完全自由」。上帝將整個ê受作物完全交待人ê手中:人beh將這個地球煎或煮、破害或保存,攏tī人ê手內。地球因為環境ê惡化,溫度已經對華氏3度升到8度,自然生態破害,海水漲高,沙漠擴張,上帝khiā tī hia遠遠teh看,無beh出手。新時代ê上帝是「連線」ê存在;伊是「時」「點」ê存在,是「touch」ê存在。上帝是一句話、一蕾花、一首詩ê存在。上帝m̄免霸佔人間所有ê時間,來證明伊ê存在。二千年前ê hit三年已經真有到額啦!天公上帝是一位啟示、啟發、良心、苦勸ê上帝。新世代ê台灣人mā應該khiā tī人間文明ê最尖端,叫做「自由精神ê文明」,來作一位有責任、有承擔ê台灣人。這個自由精神ê文明,比中國人ê封建教條ê文明koh khah無簡單,koh khah須要真大ê磨煉、切磋、淨化ê工夫。上帝將美麗島khui khui khui !交tī台灣大眾ê手內去hoa̍t-lo̍h,咱tio̍h好好疼惜保護伊ê環境;iā啥物種,一定收啥物果;一分ê努力,一分ê收成;一滴ê目屎,一分ê喜樂。

新世界ê內面ê第四個變數是「宗教一定會消滅」。上帝並無活tī各「宗教」ê內面。因為上帝是世間精神最高ê本質 (Logos/Essence)。所以所有世間ê事物,外口ê物質不過是形式 (form);內面ê精神才是本質 (substance)。用另外一句話來講就是:人是用「錢」來作人,是用「精神意識」來teh作人,人tio̍h進入事物ê本質內面teh活。Tī新時代ê世界,上帝入去人ê世界,人ê心mā入去上帝ê精神世界內面;人ê價值提升,向「人子」看齊;人間所有ê社會行為無論是藝術、科學、哲學、公德、學位、才情、勢頭、公司、愛情、最後攏beh歸入hit個精神ê本源叫做「上帝」,hit個真、善、美、智慧、知識、天資、心靈ê明燈、良心ê本源,就是創作天地ê「天公」「上帝」ê所在。咱台灣人ê宗教意識,將來絕對bē消無,但是beh進入第三千年ê時代,須要淨化、提煉、昇華到khah koân khah深ê境界。

第五個變數:Tī新世界ê所在,咱台灣人tio̍h學習「用笑容來款待這個世間」。台灣人是苦難ê民族,歷史以來咱攏學到目屎吞落去腹肚底ê工夫,學著韌命勇敢ê精神。但是咱真少學著用笑容、用唱歌(台南音「笑歌」)去看世間。有一句話講:

When you work hard, God smiles to you.
When you start singing, God loves you!

會曉唱歌ê人生,才是勝利ê人生。Kan-taⁿ受苦bē解決問題。只有tī受苦中或受苦後、會曉用唱歌、用笑面,來看透咱ê苦難,看透人生ê全部,才是解決問題ê高段。新世代ê台灣人一定tio̍h把握這個變數,將「雨夜花」、「山伯英台」、「望春風」、「補破網」攏kā in請請去歷史博物館去歇睏。

「千禧年」(Millennium) 是一個「祝福」,一個「免債」,一個「再出發」ê時點; 伊是一個時間ê觀念。伊是一個事物進化過程中ê一個khám-chām (階段)。一千年有一千年ê「休止符」,二千年有二千年ê「休止符」,進入三千年ê時mā有第三千年ê試練kap考驗。休止是為著再出發。未來ê世界應該是「天人合一」,「天地合一」,「時間」kap「空間」合一,無天亦無地ê世界。人間有限ê生涯,瞬間中有永恒,脆弱中有力量,平凡中有偉大,有限中有無限。Chia ê攏是咱未來ê變數,咱ê寶貝,咱ê動力。咱tio̍h 靠這個變數提起咱戰鬥ê信心,起來起造咱ê國家,hō͘ 台灣變作一個新koh獨立ê國家。

(本文是「台文通訊」第72期 ê 社論,Jan.,2000)

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致