促成正規化ê台灣語文教育

May 16, 1996
kap 朋友分享

促成正規化ê台灣語文教育
–請來參加第二屆北美台語文夏令會–

– 陳柏壽牧師 –

經過外來統治者「國語政策」年久月深ê洗腦,會曉講母語ê台灣gín-á愈來愈少。咱ê子弟若繼續koh失栽培,無機會接受台灣本土語文教育,免koh外久,咱祖先ê話就會tī咱這代來失落。

這個現象若對台灣社會加減有瞭解ê人大部份攏會同意,m̄-koh可能大家對這種代誌有無仝ê反應:

減採有人會講:「語言是溝通ê工具niâ啦,講會通就好,講啥物話攏無要緊!」。

減採有人會講:「台語beh消滅去這種ê代誌,等民進黨執政就解決–ah-lah!」

台語滅種ê症頭就tī這款錯誤ê觀念下面,病症愈 來愈重!

舊年「m̄願做母語文盲ê博士」前台獨聯盟美國本部主席蔡正隆先生,體會著台灣建國運動上大ê工程就是tī台灣主體文化ê建設,伊m̄-nā家己開始骨力學寫台文,也發起「第一屆北美台語文夏令會」,taⁿŽ雖然伊已經無tī咱ê中間,咱beh繼續先覺者ê腳步,hō͘咱ê母語、咱ê命根繼續湠出去。今年八月初一到初四「台文通訊」kap「北美洲台灣人教授協會」beh tī南加州共同主辦「第二屆北美台語文夏令會」,邀請海內外所有關心台語文化存亡ê人,做伙來分析目前ê局勢,思考按怎突破當前台灣語文運動ê限制。

Kap世界各地ê殖民政權仝款,過去中國人國民黨政權tī台灣國民教育制度是為著少數殖民者統治ê政治目的來設計ê,伊上大ê特色就是「反台灣」,用「國語政策」來消滅台灣本土語言,消滅台灣意識,tī這種ê教育制度下面,真chē台灣青年所認同ê是teh kā咱射飛彈恐嚇ê中國。最近國內ê先覺者,已經有覺醒著台灣教育改革ê迫切性,但是對khah敏感koh kap教育本土化上有直接關係ê台灣語文教育問題,tī這波要求教育改革ê呼聲中間,卻猶未成做議題來teh討論。迴避本土語言教育問題ê教育改革,是為著延續「中國文化在台灣」teh服務,m̄是khiā tī台灣主體ê立場ê教育改革。忽略台灣本土語文教育ê教育體制絕對無法度培養出有「台灣國民意識」ê現代公民。用社會運動ê觀點來講,本土語文教育運動就是一個「脫中入台」ê新文化運動,是一種台灣人ê自覺運動,一種培養台灣意識ê運動,一種台灣人新ê精神kap靈魂重建ê運動。這個工程若無緊緊開始落去做,台灣國民教育ê內涵攏不過是起造tī無根ê水面,訓練出來ê是一陣無根無祖國意識ê孤兒。

針對以上ê情勢,咱kā今年「北美台語文夏令會」ê主題定做「促成正規化ê台灣語文教育」,一方面是beh配合教授協會今年ê主題「台灣教育改革kap海內外文化交流」,一方面會tàng突顯目前台灣教育体制內一禮拜一點鐘tī「聯課活動」內所謂ê「母語教育」,只不過是一粒騙gín-á ê糖含[kām]á。台灣人ê「失語症」是tio̍h-ài食學制化ê正規教育ê救命仙丹才救會活ê重病。

阮kā報名單kap大會ê節目表印tī本期「台文通訊」上尾á兩頁,請所有ê讀者m̄-nā家己報名來參加,也鬥宣傳,招有志人士來參加。通過這遍ê台語文夏令會,咱來交朋友,來交換對台灣語文教育ê看法,mā進一步來採取會tàng促成台灣語文教育ê正規化ê具體行動。咱有設計社團報告、交流ê時間,有分組討論ê時間,也有學習ê時間。每一個分組討論ê時間,咱有邀請四個引言人來做十五分鐘ê專題報告,報告了後有回應kap討論ê時間。另外咱有邀請著李遠哲博士來做台灣教育改革方面ê專題演講。所有報名參加第二屆台語文夏令會ê人會tàng免費參加北美教授協會ê年會,教授協會年會ê參加者mā會tàng照各人ê興趣來選擇in愛參加ê台語文座談會。大會結束了後,教授協會有安排三工ê大峽谷、Las Vegas遊覽節目,有趣味ê人會tàng自由報名參加。

阮有kā有關這遍台語文夏令會最新ê資料khǹg tī「台文通訊」ê homepage: http://www.taiwanese.org。有關報名ê進度、各分組討論主要ê內容、引言人ê名單,阮會繼續tī後期ê「台文通訊」刊出,也會隨時tī  homepage更新資料。

今年1996年熱天tú好是咱「台文通訊」過五歲ê週年,咱beh將1996年推做「台文運動年」,m̄-nā有主辦頭前所提起ê八月「第二屆北美台語文夏令會」beh tī南加州舉行,咱chē-chē台語文草根運動者也參與tī今年北美各地區夏令會ê籌備工作,儘量促成各夏令會採取台灣文化、台灣語文、台灣人ê心靈重建來做夏令會ê主題,包括全加拿大ê夏令會 (6-28-7/01,tī Ottawa ê Carleton University)、美東夏令會(7/04-7/07 tī University of Delaware)、kap美東南夏令會(7/13-7/15 tī  Chattanooga,Tenn.)。

咱台灣人ê獨立建國出頭天絕對無法度倚靠中華民國體制ê改革來達成。完成台灣獨立理想ê境界ê活路kan-na一條,就是將咱ê母語kap進步ê母語文化傳落去,hō͘咱台灣民族ê根湠入去咱心靈ê肥土,有勇壯健康ê台灣母語文化ê根,時陣若到,自然會開台灣國ê花、結台灣國ê籽。母語是咱台灣人共同ê心靈、感情kap理智上大koh最後ê倚靠,也是咱台灣人抵抗外來政權統治上有力ê武器。請咱所有有台灣主体意識ê台灣人團結起來,tī各地夏令會聚集作伙,互相熟悉,互相學習,互相激勵。若是有beh參加ê兄姊請向列tī報名表下面ê各地聯絡人聯絡。

(本文是「台文通訊」第46期ê社論,May.,1996)

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致