意義kap意志真明ê台灣人

June 16, 1994
kap 朋友分享

意義kap意志真明ê台灣人

– 陳柏壽牧師 –

最近為著接洽「台文通訊」ê台灣同工阿仁kap阿惠來參加今年ê美東夏令會遇著ê問題,hō͘我深深感覺台灣文化復興運動有一點需要澄清ê所在。

這世間創世ê道理,代先就是有「意義」kap「意志」存在,然後才有物質,然後才產生語言來表達意義kap意志。Tī這個充滿神秘,真歹理解ê意義kap意志ê世界內面,語言不過是表達一部分真有限ê意義kap意志nā-tiāⁿŽ。

但是咱台灣人眼前ê語文文化運動,若陷落去tī一款機械性ê用字、注音、代表符號ê紛爭,會將原本語言傳達意義kap意志ê大前提,完全忽略。這種淺見ê機械論會誤導台灣語文運動ê方向,bē記得台灣語文運動應該是台灣文化復興運動下面ê一部分。

講khah清楚就是:創世以前,先有「意義」kap「意志」ê存在,台灣是創世ê一部分,台灣文化是台灣ê一部分,語言是台灣文化ê一部分,文字是台灣語言ê一部分;所有chia-ê物件,攏tio̍h服tī最高ê「意義」kap「意志」ê真理ê下面。

Tī創世ê意義kap意志ê大前提之下,用字、注音、代表符號ê互相排斥kap紛爭,是一種真不幸ê阻擋kap抵消ê力量,是扭曲創世ê善美ê意義kap意志ê力量;語言soah變做是用來做自我意識ê擴張ê工具,結局soah產生家己ê主張才是tio̍h、才是好、才是標準(norm),別人ê  m̄-tio̍h、m̄好、無標準 (subnorm) ê真無健康ê想法。

咱台灣語言是真久長ê歷史產物,台灣語言所表達ê「意義」已經非常定型,台灣語言ê內涵kap深度bē輸世間任何語言;另外tī精神kap意識ê境界ê內面,台灣人beh做一個世界一流民族ê「意志」,beh做一個kap中國人完全無仝款ê民族ê意志,mā已經非常定型。Tī這個真勇ê意義kap意志ê基礎ê頂面,咱beh用啥物符號、khiuⁿ-kháu (腔囗) 來表達這項深沉ê台灣意義kap意志,已經m̄是值得咱了精神、時間去互相排斥紛爭ê問題;咱上大ê功課就是tio̍h將台灣文化語言ê創世ê意義kap意志,對最深ê所在kā伊開發出來。

半世紀以來,國民黨中國人矮化台灣文化kap語言ê價值,造成台灣人一個真無健康ê意識,看輕咱天生所有ê地理、天候、民族、文化、語言ê最高ê「意義」kap最勇ê「意志」,甚至迫hō͘ chē-chē 台灣人為著追求物質生活ê便利,使用並接納所有統治者ê文化、語言kap生活ê價值觀。國民黨大錢hō͘台灣人thàn,但是台灣話m̄ hō͘台灣人學,目的是beh來消滅台灣文化,用按呢來斬斷台灣民族ê根,che是上夭壽、壓霸、嚴重迫害人權ê做法。
台灣獨立建國運動最大ê功夫kap工程在tī文化語言ê獨立,絕對m̄是為著tī國會立法院總統府用中國話teh喝東喝西nā-tiāⁿŽ。台灣ê政冶應該歸服tī文化語言ê層次ê下面。另外經濟方面mā是仝款,應該屬tī文化語言ê層次ê下面:台灣人m̄是kan-taŽ為著食飯才beh獨立,是為著beh做台灣人才beh獨立。現代基督教按使徒行傳十七章24-29節來建立ê民族種族論,強調創造論ê民族kap文化ê完美kap尊嚴(Ethno centrism & Cultual Centrism);世間所有ê民族,無論是日本人、猶太人、韓國人、台灣人,無論是黑人、白人、黃種人,in所有存在ê根據只有一項,m̄是ài有飯thang食nā-tiāⁿ,是in ê民族文化ê完美kap尊嚴。民族尊嚴ê表現絕對m̄是tī物質、政治、軍力ê層次,是表現tī in ê信念、文化kap語言ê層次,這個層次才是真正代表一個民族、一個國家存在ê意義kap意志。

台灣文化語言信念有伊真深ê內涵,普通teh爭辯用字、音標ê時,時常忽略這點。譬如講,有人主張將所有ê漢字攏kā in phiaⁿ落去糞圾堆,這款講法就是矮化咱ê文化ê財產。漢字m̄是中國ê專利,台灣話ê漢字是咱台灣字,親像日本人認定漢字就是in日本字仝款。Hia ê已經有tī台灣社會用來記錄台語ê漢字,是咱台灣文化財產ê一部分,若是chia ê漢字好用koh有效率,咱應當kā in接受,用來做表示咱台灣話ê工具ê一部分。

漢羅合併ê「台文体」書寫法,抑是所謂「現代文書法」,mā是仝款ê辯證:文字本身m̄是目的,語言kap文化才是目的。無必要為著符號ê無仝來互相giú後腳,抵消台灣文化運動ê力量。而且這兩種文書法有真chē共通點,最大ê共同點就是「台語思考、台文書寫、台文閱讀」。咱ê眼光若看khah闊、khah遠,看著咱高遠ê共同意義kap意志,就完全無紛爭ê必要了。

母語ê解放kap自由,是做一個人ê精神kap靈界ê最高、最終ê要求。咱台灣人不幸,tī咱家己ê國家,竟然tio̍h-ài用中國話來做「國語」,連號家己國家ê名稱叫 「台灣」mā有種種ê困難,但是天公hō͘台灣人有新ê自覺kap意志beh來保存咱ê母語,beh來chhōe根做台灣人。做台灣人是一個戰鬥ê經驗,是一個chhōe根ê經驗,是一個充滿著意義kap展現意志ê經驗。無論是漢羅合併ê台文体,抑是「現代文書法」,咱攏beh khiā tī這個共同ê意義kap意志ê基礎,手牽手做兄弟,向咱台灣人母語文化最終ê解放kap最高ê自由來前進。

(本文是「台文通訊」第31期ê社論,June 1994)

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致