重建台灣人ê心靈文化運動

February 22, 1996
kap 朋友分享

重建台灣人ê心靈文化運動

-陳柏壽 牧師-

這一、二年來,台灣島內「反台獨」ê聲音會使講是發展到空前ê猖狂,對台北湠(thòaⁿ)到濁水溪以下ê嘉南平原,經過電台、報紙、電視、競選媒體,轟炸台灣島上每一位住民。選舉ê結果,至少tī表面上來看,十票有六票是投hō͘講「我們都是中國人」ê候選人。台灣選舉愈「民主」,投票支持「中國理念」ê人愈 chē,這種現象hō͘相信台灣民主化ê結果會帶來台灣獨立ê人真歹瞭解。

其實咱若深入去文化底層來分析這個現象,就bē感覺奇怪。中國人tī海峽ê另外一邊煽[siàn]火pûn風、喊喝威脅,koh tú著驚死無L.P. ê國民黨當然是一個原因;但是,上主要ê原因,是這五十年中國國民黨tī台灣用台灣人ê稅金所推行ê「中國主體性」教育。台灣人自國民學校開始,一直到讀大學,kan-taⁿŽ 受中文教育無受台文教育,將近二十年ê青春,攏teh hō͘人洗腦「我們都是中國人」,一直到今á日有關台灣歷史、地理、語文ê課程tī正規ê學校教育攏kan-taⁿ是插花á ê性質niā-niā。莫怪受「中國教育」無社會經驗ê台灣gín-á,一個一個變做「新黨」ê生力軍,變做繼承「中國法統道統」ê特攻隊。連tī海外一向上有台灣意識ê台灣學生社,今年冬令營ê「台灣文化討論小組」mā已經無能力使用母語討論,變做用中國話做主體teh討論「台灣文化」ê「不中不台」討論會,台灣人ê命根敢去hō͘「中國文化在台灣」閹割去啊 ! ?

失落母語、無根、無文化母胎ê「新台灣人」,tī中國主體ê台灣教育体制下,每一年加幾偌十萬。這款不中不台ê新人類繼續增加,台灣民主化ê結局就是中國化。這次ê選舉,新黨tī新一代ê台灣gín-á ê支持之下,一聲擴大三倍席次,這對迷信選舉萬歲ê人是真「自然」ê教訓,新黨若無擴大,才是奇怪。目前ê教育材料、教育制度、考試用人ê制度繼續落去,m̄免過十年,中國文化思想ê候選人ê勢力若無橫貫全台灣ê選舉市場,才是奇怪ê代誌。

今á日ê選舉政見發表會中,用台灣文化做主體ê台獨理念真正聽會入耳ê人,只有二種人。一種是天慧特別深,靈眼特別高,看代誌m̄是看表面,是用頭腦去探討本質ê人,另外一種人是bat出去外國,tam著自由民主人權ê滋味ê人。絕大部分受中國教育培養ê台灣青年,若m̄是真「憨」,就自然一定會多少靠附國民黨kap新黨,希望「中國一定強」。政見發表會中,真正有心teh想台獨ê人,可能bē超過30%,其他70%ê人,無論你台獨理念偌高明,攏無切身ê關係,in甚至用輕視、褻漬[siat-to̍k] ê態度去款待用良心宣傳台獨理念ê候選人。中國用橫霸對付伊ê國民魏京生,親像掠家己雞寮ê雞á起來thâi hō͘人看,這種目睭前活活ê人間悲劇,叫bē醒台灣人ê中國夢。自稱代表台灣人ê民進黨,為著beh繼續tī中華民國体制內分餅khioh雞卵,漸漸失去歷史感kap方向感,tī選舉ê中間為著巴結新人類ê票源,kan-taⁿŽ要緊teh唱歌跳舞,m̄肯誠實講心內話,宣傳台獨建國ê理念。甚至選輸了後針對一kóa疼心ê誠實話,soah見笑轉受氣,走去kap中國派ê新黨lim咖啡「大和解」。

「台文通訊」是分析選舉運動最好ê園地,「通訊」ê同仁khiā tī這個歷史最危急ê時代,kan-taⁿ愛提醒讀者諸君注目一個嚴重ê現實:台灣人ê反抗運動kap建國運動ê整個方向已經面臨空前ê危機。

台灣人m̄-thang siàu想beh倚靠選舉出頭天。體制內ê選舉運動,是kan-taⁿŽ會tàng反映台灣教育体制內ê意識型態、思想走向、人生觀kap世界觀ê大概niâ。選舉會tàng用來診斷台灣社會ê病,但是bē-tàng治台灣文化心靈ê病症。Beh救台灣社會末期嚴重ê病源,tio̍h-ài tùi台灣人ê文化 (包括語言)、意識型態、人生觀、世界觀去改造。

「台文通訊」所主張ê台灣語文運動路線,是一thiap苦藥,咱主張台灣惟一ê活路是經由文化改造、語言ê重建,來促成意識型態、人生觀、世界觀ê更新。這種路線thang講是重建台灣人心靈ê運動。

新ê台灣人ê心靈運動m̄是民進黨跳舞唱歌ê選舉運動,更加m̄是為著權勢ê「大和解」運動,是注重統治「形」「体」ê更換運動。新ê台灣人ê心靈運動是一種拍破國家統治權力結構ê運動,是一種心靈ê內涵,思考、意志、生活方式ê更新運動。

這種新ê心靈運動強調不施不受不妥協ê意志,強調靈魂ê自由,自我ê尊嚴kap自我意識ê培養,徹底建立自由思考ê精神,創造台灣人心靈ê美 ,台灣人ê藝術性,台灣人ê人間性,台灣人ê合理性,kap台灣人ê理想主義。

歷史真正ê意義在tī「創造」,歷史m̄是資料事件ê累積抑是分析,歷史是人間個性內面生活ê不斷創造。所以新ê台灣人ê心靈運動是一種動態ê歷史觀,動態ê文化觀,動態ê民族觀,是一種「台灣概念」ê性命化,m̄是抽象化石ê中國化。咱是teh提倡一種「非中國化」運動,「非政治化」運動,「非政治萬能」運動,來建立新ê台灣人民族性格。

這種艱難ê心靈更新運動,ài靠咱ê覺醒所產生出來ê台灣人無私ê熱情kap純情。只有這種力量才有法度突破複雜詭詐ê層層中國思想ê封鎖,突破層層複雜ê國際情勢,突破台灣國家命運ê蜘網(dilemma),向可能kap不可能ê世界挑戰。用家己ê方向盤駛出去新ê世界ê海洋,飛出去新ê廣闊ê天空,主宰家己ê命運,達到至善ê選擇。

用另外一句話來講就是為著這個台灣人ê心靈運動,咱所絕對需要ê是台灣魂ê殉道精神,新ê敬虔主義,新ê tùi台灣母國ê獻身kap實踐,體會著che是最後決戰ê時代,咱已經無第二條thang選擇ê路。che是台灣魂最後ê審判。

咱這代ê台灣人khiā tī公元二千年ê新世紀kap新千年代(Millennium) ê門口 , 咱ê母國、咱ê土地,培養咱到今á日,但是伊現在正是受苦受難ê生死關頭,咱台灣人ê新ê心靈文化運動,是咱為著維護咱ê老母ê決死戰,請咱警醒,做上好ê自我緞練,來加入這個無形ê戰場。

(本文是「台文通訊」第45期ê社論,Feb., 1996)

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致