一條蜘蛛絲，一粒石頭á
-陳柏壽 牧師-
日本明治時代有二位真有名ê文學家，叫做芥川龍之介 (Akutagawa Ryunosuke)，伊tī三十五歲過身以前留hō͘後世一百外篇真súi親像珠玉ê短篇小說，其中有一篇叫做「一條蜘蛛絲」(Ku-mo-no-ito)：古早有一位大賊鼓名叫做犍陀多(kandata)，伊刣（thâi）人放火，無惡不作。有一回，伊tī山裡teh行，看著土腳一隻蜘蛛teh sô，伊ê腳自然就gia̍h起來，準備beh kā jôe hō͘ 死，但是突然間，伊想講：「放伊去啦」，腳kiu轉來，無kā蜘蛛踏死。
犍陀多死了後，因為在生做歹（pháiⁿ），所以入地獄，tī地獄hō͘火燒、剌chha̍k，非常痛苦凄慘。有一日，佛陀tī極樂世界teh散步，對蓮花池ê水中看落去，一直看到地獄中眾生凄慘ê景像，mā看著犍陀多tī hia teh喝苦。佛陀心內想，犍陀多雖然是大惡人，但是伊在生ê時，至少做過一項好代：有一日伊tī山裡，看著一隻蜘蛛，無kā伊踏死。想來想去，佛陀看著蓮花葉頂一隻蜘蛛teh休息，就用手kā伊掠起來，蜘蛛就放一條蜘蛛絲向地獄ê苦海落去。
犍陀多看著這條銀色真súi ê蜘蛛絲落來到伊ê面前，真歡喜就緊緊用手giú leh，一直向頂面peh去。一直peh，一直peh‥‥這支蜘蛛絲雖然看著真脆弱，但是犍陀多直直peh，蜘蛛絲mā bē斷去，peh到koh二步就beh到地面ê時，犍陀多心內想：「真佳哉，我koh一點á就beh脫離地獄ê苦海。」Hit時伊oa̍t頭向下面看，beh看伊已經peh外koân啦，但是一下看落去，bē直a—lah ! 一個一個kap伊仝tī地獄受苦ê男男女女，親像狗蟻按呢，攏khîⁿ tī這條脆弱ê蜘蛛絲ê頂面，tòe tī伊ê kha-chhng後面peh起來，有千千萬萬人，算bē了。
犍陀多看一下，大驚，心想我已經剩（chhun）幾步就到頂面，chiah chē人teh giú，若是斷去，我就前功盡棄了。犍陀多就開嘴向下面講：「喂！恁這陣人啊，這條絲是我ê neh！恁khah緊kā我落去！落去！」但是，犍陀多ê嘴講猶未合ê時，突然間，蜘蛛ê銀絲soah斷去，犍陀多ê身體，親像一粒干樂直直栽落去地獄暗底深坑ê內面。
Tī地獄烏暗ê天空，月光星光攏無，只有剩hit條幼幼ê銀色ê蜘蛛絲吊tī半空中hiàⁿ kông hàiⁿ, hàiⁿ kōng hàiⁿ‥‥。極樂世界蓮花池ê蓮花，並無因為按呢來停步，繼贖開出玉ê白花，白花ê中央，有金ê花心，發出安靜ê清芳。
Tī咱目睭前台灣文化ê情景，tú親像犍陀多ê地獄圖，人人攏親像石頭沉淪落去tī池底，看起來真正無望，有心ê人雖然親像hit隻蜘蛛用心專工放一條蜘蛛銀絲，期待受壓制ê同胞脫出苦海，但是人人攏親像犍陀多，因為受統治者自私自利ê教育，各人kan-na顧家己，無管民族文化運命ê死活。
古早有一位巨人名叫做歌利亞，不但身體大叢，koh全身重武裝，真正是抵天巨霸，手可遮天，戰無不勝ê戰王。有一遍，歌利亞tī山ê hit旁teh kap敵人喝戰：「敢ê人，緊出來！」山這旁ê陣營，面臨這位巨人，人人phih-phih-chhoah，無人敢出面，無想著有一個飼羊ê gín-á，叫做大衛，瘦koh薄板，伊soah勇敢khiā出來。細漢ê大衛khiā tī歌利亞ê面前，戰甲穿tī身軀上soah bē行路，親像tú孵出殼ê雞á kiáⁿ，面對著兇猛ê獅熊。台灣文化語言復興ê運動所面對ê統治者，就是親像大衛面對歌利亞，完全bē比phēng得。但是這個瘦koh薄板ê大衛，去溪邊khioh幾粒細粒石頭á khǹg tī lak-tē-á內。歌利亞chông來ê時，大衛用伊拍鳥用ê鳥phiak á，用一粒圓滑ê細粒石頭á，直接射入去巨人ê頭殼內，一聲kā伊解決掉。
台灣文化語言ê復興運動，雖然面臨ê是烏暗無望ê地獄；面臨ê是斬殺咱文化根ê統治者，但是天頂若是有上帝，或者是佛陀ê保蔭，伊一定準備一條銀ê蜘蛛絲，抑是準備一粒細粒石頭，來普渡眾生，拍倒敵人。「台文通訊」是咱台灣人運命中ê一條看著真脆弱ê救命蜘蛛絲，是咱台灣人hit支鳥phiak á內ê hit粒石頭á。願所有「台文通訊」ê負責同仁，以及千千萬萬ê讀者諸君，大家珍愛疼惜這條銀絲、這粒石頭á，用伊來拍敗敵人。
（本文是「台文通訊」第29期ê社論，April 1994）
No Comments