台灣原本美麗島

February 13, 1995
kap 朋友分享

台灣原本美麗島

-陳柏壽 牧師-

台灣本是美麗島,代代以來並無啥物激烈ê意識型態ê對立。現在所講ê「台灣問題」ê產生,只有一個凶手,就是「中國情結」。

最近這款惡質ê「中國情結」tī中國人ê大眾媒體ê煽動之下愈to̍h愈猛,放聲講啥物十二月ê選舉了後,若是hō͘台灣人選著,中國人一定beh hō͘台灣人「好看一下」,意思就是講中國beh起歹面:有人講是四點鐘會解決台灣,有人講四十分鐘。所有膨風話攏講若台灣人無beh留一kóa面子hō͘中國人,台灣會死。

這個惡質ê暗流經過基督教ê神靈派、佛寺ê妖言派、慈善事業ê濟慈派,講啥物一九九六年就是中國拍台灣ê決戰年,所以tio̍h緊緊出國移民,毛里斯亦好,蓮花島亦好,全世界各所在攏會tàng移,只有差一步無移入去地獄。中國á報紙koh khah作弄,講啥物台灣今年對外移民是舊年ê三倍,智識份子四位已經有一位移出去外國。In恨bē得台灣早日變做一個恐怖ê世界。

這款煽動ê白賊話,小khóa有智識ê人一看就看著中國人ê嚨喉裡a,小khóa有國際觀ê人,一看就知影中國這款國家,免講佔台灣,目前連維持伊國內領土最低限度ê統一mā有困難,何況伊同時猶teh數(siàu)想日本美國西歐資本國家ê援助,所以若beh動兵,台灣未死中國就先死。

雖然按呢,畢竟明眼ê人tī台灣猶是有限,khah chē猶是ta̍k日坐tī電視機頭前ê Obasan,ta̍k日teh讀中國人ê報紙ê Ojisan,chia ê人對大眾媒體ê抵抗力真弱,真容易受毒菌侵入,結果真大多數ê台灣人ê思想型態kap價值觀念受真大ê彎曲變形,良心受遮蓋,力量受抵消,行動受制限。聽宋楚瑜用台語講「我是食台灣米大漢….」ê痟話,mā聽kah目屎流,目屎滴。

更加嚴重ê是代表制衡力量ê在野黨,in mā為著 選票m̄敢主動tī競選ê公開場合宣揚獨立建國ê理念。這款情勢受害最大、最深ê是台灣社會一般ê勞苦大眾。幾十年以來,台灣人獨立出頭天ê心願kap期待,tī受高深教育ê民進黨ê思想家ê「領導」kap「運作」之下,變做一項m̄免koh出聲ê「副題」,變做「選舉」ê犧牲品。

台灣大眾ê民心實在是一面明鏡,這個明鏡簡單清楚一看就明,m̄免啥物歪哥理論,m̄兔啥物玩弄文詞。民進黨tī這個競選ê關鍵時刻,第一迫切、第一重要ê功課,應該就是將台灣「獨立」這個看板搬出來,祀「chhāi」tī頭前才tio̍h,應該利用這個機會清清楚楚教育民眾,台灣獨立是唯一ê活路,台灣獨立是將來台灣ê安全唯一ê基礎。

民眾對這點ê道理心若會通,選票一定投 hō͘敢光明正大講台獨ê人。民進黨對這點閃閃避避龜龜孫孫,不但hō͘台灣大眾失去期待ê方向,更加提供中國á新黨批傷(phí-siùⁿ)民進黨ê材料,講民進黨無lān-pha,愛獨立koh m̄敢講台獨,講民進黨不過是一群歪哥ê政客,只愛權勢,無愛理念。民進黨應當即時回頭是岸,懸崖勒馬。

民進黨若無緊緊回頭,結果只有二個結局 :

第一個結局,萬一若是無講台獨ê人中選,台灣局勢mā是無啥物寄望,台灣變做敵我不分ê世界,不如hō͘掛國民黨旗á ê中選,這二、三年之中hō͘台灣人有明確ê敵人繼續車拚ê機會。萬一若是無講台獨ê人落選,台灣人會愈看民進黨m̄值,因為伊m̄敢講mā bē中選。

第二個結局,台灣ê將來會演變到親像美國仝款,變做二黨貴族ê政治,完全喪失民主ê精神。人人攏知美國á政客無論民主抑是共和,攏是平烏,攏互相teh爭奪社會資源,分配個人權勢利益ê功能而已; 共和黨ê紐約市長為著錢勢會使隔暝去支持民主黨ê紐約州長競選,啥物理念、理想攏會使piàⁿ落去糞垃籠,民主隔暝日會使共和,共和變民主。台灣ê將來mā可能演變做「國民」、「民進」二黨ê「貴族」政治,民á進會使變國民,國民á會使穿民á進ê衫,二個差不多。對台灣人來講,這才是一個真正「悲哀」ê將來。

另外一例來說明民á進黨「諸公」內面中著中國á妖言毒素ê一面叫做「語言工具論」,講啥物語言不過是交通「工具」,無必要認真去對付。一個民進黨員選舉ê時會tàng用父母話去跪票、去拜票、去求票,但是一旦中選以後,tī議會、tī公開ê場合,甚至kap記者會面,舌就捲起來,用一款阿里不達ê統治者ê語言來teh「交通」,這款民進黨ê黨員,對台灣真正ê獨立出頭天,無啥物thang期待ê所在。

判定一位官員有台灣心仰無,上簡單ê方法就是看伊tī公開ê場合是用啥物話teh講話。全世界去到叨位這個判定ê標準攏是按呢。一位tī公開ê場合堅持用伊ê台灣人ê老母話講話ê官員,無論伊是屬啥物黨,伊ê台灣心就會使先認同一半。一位tī公開ê場合,m̄敢用伊台灣人ê老母話發言ê腳siàu ,無論伊ê內容是一流ê súi,無論伊ê形象是如何高尚,伊ê台灣心tio̍h先切一半。伊不過是油舌滑嘴到處騙食ê傀儡(ka-lé)政客而已。

頂禮拜咱tī紐約ê台灣人懷念過身ê王康陸博士,為伊舉行紀念禮拜。會中,大家做伙反省kap檢討台灣人意識型態ê過去,現在kap將來ê問題。過去,日本初代統治台灣總督ê名言是講台灣人好統治,因為台灣人愛錢、愛名、驚死。現在,台灣社會ê現實正告世間人,特別是警告中國人,台灣不但有千千萬萬無愛錢、m̄驚失面子ê男男女女,m̄驚死ê台灣人mā真chē,新ê台灣魂已經成長並khiā出來了。將來,台灣人ê主體性,用新ê台灣人ê價值觀,beh突破中國人利用大眾媒體、學校以及社會機關所傳揚ê種種妖言惑說,暴露中國人玩弄政治ê小動作kap小技巧,義不反顧,向獨立ê路邁進。

(本文刊載tī「台文通訊」第37期,Feb., 1995)

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致