八月釋迦若beh甜

-陳柏壽 牧師-

八月時，想著台灣釋迦ê甜芳，hō͘流浪海外ê台灣人流嘴瀾。釋迦每年春天開始開花，結青果，天氣漸漸熱，果內ê籽也漸漸變烏、變tēng[硬]，果肉變軟生蜜，到八月天就是挽釋迦ê季節。台灣釋迦kap外形平面平面ê南美釋迦(Cherimoya)無仝，伊ê外形親像釋迦佛ê頭殼，一粒一粒凸凸，芳味甜度真高（koân）。

這幾年來台灣ê國情kap台灣釋迦仝款，漸漸進入成熟ê時期。經過三十年ê民主獨立運動，犧牲千千萬人寶貴ê青春kap性命，台灣內在體質一步一步改變，黨禁解除、萬年國代退位、廢戒嚴令、報禁，一直到明年總統直選;外在ê國際情勢也teh改變，日美歐洲對台獨運動新ê認識，配合中國人不斷提昇ê惡霸威脅，飛彈實射演習等等，造成ê氣候就是台灣釋迦成熟ê時侯。

台灣是beh挽一粒甜蜜成熟ê釋迦，或者是beh結一粒無滋無味無好看頭ê釋迦鬼á，決定tī最後ê文化戰。台獨運動pôaⁿ過一粒koh一粒ê山頭，chit-má顯現tī咱目前是最後ê一關文化戰場，che 是最後ê一座大山頭。這個最後ê山頭若無pôaⁿŽ過，台灣釋迦猶原是一粒臭香兼爛肉ê釋迦，是bē食得、烏有ê廢物。

「台灣共和國」真正ê意義m̄是在tī名義稱呼，是在tī伊ê文化意識ê內涵。除了各級政府ê硬体機構以外，mā ài有伊民族文化ê軟體做內涵。文化意識無自立充實ê地區，m̄是一個國家。這世間絕大部分ê國家，不但有硬体ê結構，更加是用伊ê民族文化ê內涵作元素，來形成in ê現代國家。Kan-na有「台灣共和國」ê名，無內在ê文化內涵，台灣猶原不過是一粒無汁無味無路用ê釋迦。Che是一項真嚴重ê代誌，可惜一般人無去注意著。

最近有二項代誌應該tī chia提起hō͘讀者注目：第一項，「台灣語文學會」，今年五月tī台大開研討會，規定會議語言限用中國語kap英語。研討台灣語文問題ê會中，不准用台語發言。主辦單位，「台灣語文學會」ê論點是講台灣話無適合這種「國際性」kap「學術性」ê大會。用另外一句話來講就是in認定台灣語文只是一種用來考古寫論文ê「學術研究」ê資料，是二千萬人日日teh使用ê活跳跳，流著民族ê血kap目屎ê語言。台灣話ê死活敢無比「學術性」khah重要？台語ê「學術」若是為著台語ê推廣，對台灣人敢有啥物價值？

第二項代誌是今年北美ê「台灣公論報」，有幾篇社論開始使用台文書寫。社論代表一份報紙ê立場，公論報社論開始試用台文，展示發行人「台獨聯盟美國本部」有心beh繼續擔任「突破者」ê角色，beh來突破台文tī報紙上猶koh hō͘人當做新婦á ê命運。雖然這項突破得著chē-chē人ê肯定，感覺公論報存在惟一ê價值就是伊代表台灣人ê心聲，用台文來寫這份報紙ê社論有特別象徵性ê意義，hō͘世界各國ê人知影，台獨聯盟beh建立ê台灣國是用台灣文化做主体ê台灣國，是殖民者「中國文化在台灣」ê台灣國。但是台文社論也引起內部反對ê聲音。反對ê人雖然強調台文運動ê重要性，但是猶認為台文tī社論中出現會喪失社論ê「統一性」、「包容性」kap「宣傳性」，所以反對目前幾位主筆用台文寫社論。這種對家己ê語言文化無自信ê症頭是殖民地國家beh獨立上大ê心理障礙，kap「台灣語文學會」規定開會m̄通講台語仝款好笑。

這款處處tī文化戰場上自我設限ê失敗主義以及m̄敢向「台灣國語文化」挑戰ê投降主義，hō͘台灣有釋迦ê外形，但是無釋迦心，無汁、bē甜、無力、失敗、無氣，是文化戰場ê戰俘。Tī台灣kap海外真正會tàng檢驗台灣心最後也是最好ê標準，就是台灣話kap台文ê使用。台語文運動是純情勇敢有力ê mò͘-tà，若pháng起來，會pháng 著人ê心肝，hō͘所有ê台灣人感性kap理性攏pháng會振動。以上提起ê兩項事，是beh提醒大家來認識台灣人ê文化獨立運動需要面對ê惡質ê敵人，往往是咱家己，或者是咱家己無覺醒ê同胞。所以咱需要更加努力去克服、去教育，需要不斷戰鬥。

這幾年來，聰美姊基金會ê同仁第一掛念ê代誌，是台灣社會中，台灣文化ê良善純真ê一面，有真緊teh惡化消滅ê傾向。一個無文化ê胎盤來保護、安慰、支持ê社會，人心會輕浮、暴亂、緊張，社會就bē安定。台灣ê惡化不但表現tī環境、食水、空氣、農作ê污染，更加表現tī道德、秩序、宗教、美感ê破壞頂面。人人生活tī一種「惡性共生」ê狀態：人人攏知影啥物是tio̍h m̄ tio̍h，啥物是無公德有公德，但是人人攏認為別人既然是按呢，我mā「不得不」按呢，若無就無法度生存。這可能會使叫做「賭爛」ê心理，一種真奇怪但是也真典型ê「中國文化在台灣」所培養出來ê「惡性共生」ê現象。台灣人ê文化是teh退化，m̄是teh進化。

對海外台灣人來講，這種現象是一種真大ê感性kap理性ê打擊。海外ê台灣心永遠是kā台灣當作「美麗島」，故鄉永遠是天堂，台灣釋迦永遠是籽硬khok-khok， 氣味又芳又甜；但是現實世界賭爛文化ê惡性共生，叫醒生活tī夢中ê台灣子民：美麗ê故鄉已經變色，面目全非，純樸ê百姓已經陷落tī自我麻醉，粉飾太平ê羅網。Che真正是台灣文化beh斷根上蓋危險ê時代。

停止koh喝四大族群融合ê口號，台灣ê族群kap世界各國仝款，實在chē kah親像釋迦籽。用殖民地ê角度來看，台灣實在kan-na有兩大族群：受壓迫族群teh反抗壓迫族群；本土族群teh反抗外來族群；進步族群teh反抗封建腐敗族群；台灣族群teh反抗中國族群，按呢niâ！

八月釋迦若beh甜，咱除了tī外面ê國際社會努力，聯合太平洋kap其他地區友善ê國家，共同對付中國霸權以外，tī咱ê國家內部，咱tio̍h-ài團結起來，一點一滴用血用目屎來改造灌沃咱ê文化田園，用耐心、勇敢、虔誠、純情，攻破中國文化橫霸ê山頭，起造真正屬tī咱家己ê語言、文化、藝術、意識、宗教、風土，親像八月台灣ê釋迦，結出一粒一粒烏金烏金硬khoh-khok ê釋迦籽，發出充滿台灣文化ê甜蜜芳味。八月是挽台灣釋迦ê好時。

(本文刊載tī「台文通訊」第42期，Sept., 1995)