黃聲宏醫師對咱的啟發

June 1, 2012
kap 朋友分享

黃聲宏醫師對咱的啟發

陳柏壽牧師

拄即對New York主持黃聲宏醫師,就是聰美姊記念基金會主席,的葬式轉來以後,心情非常沈重,怨嘆這世間好人hiah-nī緊就beh回歸天家,怨嘆生命的無常。雖然知影上帝用伊的自由及伊的意志teh統管這世間,但是這我只有怨嘆。

黃醫師平常無愛講話,講話嘛真細聲,雖然因老爸黃理鰲醫師給伊號做「聲宏」。自從二十幾年來識伊以後伊就是一位良師益友,時時指導、鼓勵、安慰我。二十幾年前我為因老爸做無教會主義形式的葬式以後,無想到今仔日佇同這間「衛鄉台灣教會」,咱做伙抑欲送伊轉去,心內非常毋甘。

黃醫師的大姊叫做黃聰美醫師,嫁互日本醫師伊籐邦幸,二人結婚以後sio-chhoā去尼泊爾(NEPAL)的山內為散赤人做日本基督教團海外醫療傳道的事工,做二十外冬,生六個囝。轉來日本以後,聰美姊每個月為台灣獨立聯盟發行的「台灣青年」奉獻三萬圓日票將近二十冬,攏無出伊的名。為著記念伊彼種無私奉獻的偉大的台灣女性的精神,阮設立「聰美姊紀念基金會」,用眾人奉獻的錢來發行「台文通訊」,目前咱的網站(www.chhongbi.org) 欲將過去500幾本唯一存佇世間的「台灣青年」雜誌灌入去網站,欲將chia-ê豐富的台灣人的精神資產,留落去、流傳落去,hō͘-lán經過chiah-ē資料,得著新的啟發,奮起台灣人獨立運動的意志及行動。黃醫師一直是基金會的主席。

起頭主耶穌teh招學生的時(約翰福音1:43-51),看著拿但業khiā佇樹仔腳teh偷看伊,耶穌叫伊出來。伊問耶穌你按怎teh叫我?耶穌講:「你khiā佇無花果樹腳的時,我toh已經看著你啦!」「看啊!這個人就是真正的以色列人!因為伊的心內無詭詐。」耶穌講的「以色列人」毋是講通常的猶太人,猶太人對雅各開始就含有詭詐的成分。耶穌講的「以色列人」是講「Ish-roeh-el」,就是講「目睭看著上帝的人」的意思。所有目睭會當看著上帝的人,攏可以叫做「以色列人」。黃聲宏醫師就是一位真正的以色列人。黃醫師靜靜khiā佇無花果這欉生命樹的下面看耶穌,就互主耶穌認著伊是一位心靈謙卑、清氣、安靜的上帝的囝。黃醫師真正是一位心靈的目睭會當看著上帝的人。不但按呢,耶穌講伊的目睭會看著天開,看著天使佇天梯上起起落落。

咱的目睭豈有法度看著天門開開,看著天使佇天頂地面起起落落?我想有可能,我想咱毋免等到肉體離開這世間就有法度看著上帝的天梯及靈魂世界的天使。人的構造分三部份:頂面的靈,是創世以來直接及上帝牽做伙的部份,就是咱台灣人所講的頭殼三尺有神明仝款意思;第二部份叫做魂,伊包括思想、感情及意志;第三部份就是咱看會著、摸會著的肉體。人拄著死的攻擊以後,伊的靈直接轉去上帝hia,伊的肉體回歸地面的大自然,但是伊的魂並無hiah-nī簡單就結束。

咱人的思想、感情及意志是人存在第一明顯的所在。 伊一世人的心願、愛情、記憶、思想、抱負攏親像一台咱厝內的電腦,咱這台電腦是上帝電腦總部的末端機,咱一生所講過的話、所想過的代誌、所做過的行為,所有幼年的經驗,所有孩童時代看過的草花及草莖,所有的歡喜及目屎,所有的悲哀及熱情及希望,一點一滴,甚至咱家己已經袂記佇的代誌,嘛攏存佇這台末端機內面。上帝的電腦總機就是親像美國國家的電腦總部,是國家整個的頭腦。國家電腦總部若是故障,咱佇銀行chhun偌濟存款,「phah!」一聲攏會消失,國家的重要資訊、軍事機密,「phah!」一聲,攏會失蹤。 但是咱一生的記錄佇上帝的電腦內,永遠袂失蹤,上帝會給咱記到 tiâu-tiâu-tiâu、記到清清楚楚。Chiah-ê資料就是咱靈魂的DNA,khǹg佇上帝「魂」的寶庫內面。Chiah-ê DNA會經過咱肉體的後代傳落去,嘛會經過魂的作用,繼續影響咱地面的社會,繼續佇環境世界中存在,繼續擴散,繼續「執著」佇世間。

黃醫師猶未完成的意志及心願,上重要的部份就是「台灣獨立」。「台灣獨立」是黃醫師真重要的魂的組成因素的一部分。以前這個部份佇伊的頭殼內面時時有掛慮、有衝擊、有鬥爭,chim-má 毋免啦,這部分的魂已經得著解放啦,毋免經過人的肉體的頭腦的束縛啦,已經飛到天頂啦,已經得著自由啦。伊這部分的「魂」,因為無閣受著肉體的阻擋,顛倒變做koh-khah完美,koh-khah直接,koh-khah活動,koh-khah有影響力,有完全的自由。肉體的頭腦將伊的台獨思想反映出來的,不過親像一個「鏡」,不過一個「形而上」的受動的「 觀念」 nia-tiaⁿ。但是這个思想,進入「 魂」的世界以後,會變做一個實存的存在。混沌的思想、抽像的觀念,會變做清楚、實在的体,存在佇上帝的世界內面。人的肉體雖然變老,雖然破病變歹看,但是進入死亡的門以後,伊的靈魂會變真súi。死是互靈魂變做美麗的過程,死是靈魂淨化的過程。每人去到彼個世界,攏會變做真súi的人格,變做真完全、真成熟、真理想的人格的存在。彼種美麗毋是肉體狀態有法度表現的美麗,世間一切的矛盾對立,佇彼所在攏得著統一;但是伊的人格的思想、感情、意志的特質,佇彼所在猶無改變,不過是受純化。

佇上帝的世界內面的「台獨」思想,不但是伊的思想、感情、意志的「魂」的綜合的實存,koh-khah是一種非常淨化非常美麗的魂的目標及動力。這個實存的魂是超越陳腐的語言,不受肉體及物質的拘束,超越現實世界的禮儀、衝突及鬥爭,超越朋友及敵人的分野。這種意識的魂已經昇高到最高的位階,是能動的、絕對自由的、絕對歸依佇上帝的世界的存在。伊已經毋是觀念的幻影,毋是空想。伊是純全的靈魂的一部分。伊毋免閣喉叫,毋免大聲,毋免怨嘆,毋免閣為著「台灣青年」的入網煩惱,毋免閣為著台灣母語的流失心慒,毋免閣再及國民黨的法統、正統、教條ko-ko-tîⁿ。因為伊的靈魂活佇完全純情的世界,活在太陽的光輝的內面。這是我對伊的過身得著的啟發。

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致