日頭啊,請你停步!

February 22, 2006
kap 朋友分享

『日頭啊,請你停步!』

經文:約書亞記10:12-14,馬可福音11:12-14

陳柏壽 牧師

金句:『當耶和華將亞摩利人交佇以色列人ê日,約書亞就kā耶和華講,也佇以色列人ê面前講:日頭啊,你tio̍h停佇基遍ê頂面;月啊,你tio̍h停佇亞雅崙ê山谷。日頭就停–teh,月就歇(hioh)–teh。』(約書亞記10:12-13)

 

有一個台灣人,伊干單(kan-taⁿ)學台灣英文。來美國第一禮拜,美國人問伊:How do you do?

I sent my children this morning to school. Then shopping. Then I had lunch.  And I took a nap.伊tō按呢回答。

第二日,拄著(tú-tio̍h)彼ê美國仔,又koh問伊How do you do? 伊toh koh講一遍,我早起chhōa gín-á去學校,去市仔買菜,食飽了,睏中晝。

第三日美國仔拄著伊,koh問伊How do you do? 伊心內有夠煩,tō kā in查某kiáⁿ講,in美國仔thài逐擺拄著人,攏欲問人今仔日 teh chhòng啥?

In查某kiáⁿ kā教講,你bōe曉kā伊問倒轉,講How do you do? 換伊來講hō͘你聽。

咱攏知影How do you do?本來就無啥物意思,親像咱台灣人講:你食飽未?ai-sat-tsu ê話耳定(niā-tiāⁿ)。無實在ê用意,不過親像一個影,過tō消–去。

Koh有一個台灣人來美國,尋無路,佇路邊問一個黑人某某所在欲按怎去,美國仔tō教伊講tùi chia一直去,過紅燈,越正旁,接–落-去越倒旁,去到彼叢樹仔腳,越正旁,碰著 (pōng-tio̍h)剃頭店ê時,越倒旁,按呢tō到位–啦。講到尾仔,kā伊問講,Do you follow me?

這個台灣人chù按呢就戇戇仔khiā佇hia等。等真久,看彼ê黑人攏無欲tín動,伊佇hia mā m̄ 敢tín動。

最後伊擋未tiâu ,tō問彼ê黑人:I follow you? 黑人tō kā講:OK!  I follow you!

這聲食力–啦,soah變作這個黑人欲follow me。Taⁿ我tō m̄知欲chhōa伊去叨位khah 好…

黑人話Follow me?意思是講你知影我teh講啥抑無ê意思。

台灣話若是實在ê物件,攏講『有影』,聽有講『知影』,真正ê代誌,tō講『有影有隻』,無ê代誌講『無影無一隻』。人若家己想出來ê代誌,m̄是真正ê代誌,tō講:『人kā你講一個影,你tō生一個kiáⁿ!』一切攏是用『影』作標準,m̄是用物件作標準。所以咱台灣人,佇這個超現代ê世界,實在是khiā佇思想ê最前端,叫做『超現代主義』者,mā會使講叫做『超現實主義』者(Sur-realism),因為咱台灣人用『觀念』,用『印象』來看代誌。

咱若看印象派ê畫家,親像Van Gogh, in ê畫攏無用直線,攏用點,一點一點,漸漸將物件ê型點–出-來。M̄是『寫實畫』,是『觀念畫』,所以咱叫伊作『印象派』 “Impressionists”。

有時我佇週報印『知影』二字,兄姊一時sa無寮仔門,m̄知是teh講啥 ? 因為咱學ê中國話漢字內面無『知影』這二字。五十年前,阮阿公學漢學仔出身,伊寫批hō͘我ê hagaki tō已經寫真濟『有影』。

實在想–起-來,人ê人生有時親像詩人teh講ê『追風捕影』,tòe著風ê後面teh jiok彼ê摸bē著ê影。人生ê影不時teh tín動,咱去到叨位,影tòe到叨位;咱ê身軀有一日落土死,咱ê影mā無–去-啦。

頂禮拜咱講故鄉ê觀念、父母ê觀念、甚至kiáⁿ兒、事業、友情,到尾mā真濟攏不過一個影,一個頭殼內『意識』kap『觀念』。

我去訪問會友,老obasang緊去後面屜仔內提in查某孫仔ê相片。『牧師–啊,你–看,阮這個孫仔有古錐–無?』我攏講『有,真古錐』。但是目睭前ê這個gín-á,歸身軀烏mà-mà,佇土腳teh爬,手koh teh mē雞膏。

咱人khah重要ê m̄是欲活佇影kap觀念耳定(niā-tiāⁿ),但是彼ê影,bē使放伊去。咱ê理想、咱ê眠夢,攏是咱活teh ê影。人生不過是一個影。

Steve Jobs是Apple Computer ê開拓者,chím-má是億萬大富翁,亦是Apple ê大頭家。6/12去hō͘人請去Stanford大學畢業典禮演講。伊只有講三點。

第一點,伊講伊是私生子,in老母teh作學生ê時tō生伊。teh尋看有人欲分這個gín-á,但是有一個條件,就是對方父母一定tio̍h大學畢業才會使。後來才知欲分我作kiáⁿ ê翁仔某,老母是攏無讀冊,老父高中to無畢業。講到最後,in kā我ê生母保證,一定欲hō͘我讀大學,按呢才成交。

17年後我欲入一間私立ê大學,學費是貴到死無人,kap恁這間Stanford平貴。為著無欲hō͘父母增加生活ê負擔,我決定申請休學。伊講伊chím-má想起來,伊大學休學這項代誌,是伊一生真濟決定ê中間,第一正確ê決定。

伊留佇厝裡,中晝時tō soan去附近ê教會食免錢飯。後來伊走去學字體設計。Che就是伊發明第一台Apple Macintosh,會tàng將英文用各種ê字體,印到真súi ê第一台computer.

佇我休學ê時陣,我teh學字體設計,上帝hō͘我一點一滴ê經驗,khǹg入去我ê心內。等到時間到,上帝對我心內ê物件,hō͘我提出來用。這個一點一滴就是親像雞母teh孵卵,孵久就有雞仔ê型。

第二項代誌就是伊30歲ê時。伊ê公司收入已經有20億,員工有40人。伊去請一個朋友來作伊ê總經理。Apple Computer是伊創設ê,但是這個總經理去kap董事會tàu作伙,將伊趕–出-去。伊soah變作無頭路。辛辛苦苦建立ê事業,一聲變作烏有–去-啦。人生一切攏soah tio̍h tùi頭開始。

伊講伊去hō͘ Apple趕出去彼日,真正心內矇矇,m̄知欲去叨位。但是chím-má想倒轉來,伊若無去hō͘ Apple開除,tō無今仔日ê成績。

伊不得不去設一間新公司,叫做Next。後來這間Next,感謝上帝,mā真成功。後來這間Next koh去hō͘ Apple買轉去,對按呢,伊tō koh轉來Apple工作。

伊講,人生中有時人會hō͘朋友,bô-têng-bô-tî用磚仔對頭殼kā你kòng–落-去。但是m̄-thang喪失信心,繼續作你愛作ê代誌。人生中,人用磚仔kòng你ê頭殼是正常ê代誌,親像主耶穌mā是去hō͘伊上疼ê學生kòng伊ê頭殼,koh kòng到死。

第三項就是伊講:我每一日早起起來,攏kā想講:這是我ê生命ê最後ê一日。我攏kā家己講:今仔日我可能會死。

這種想法,咱台灣人講是一種『破格』ê想法:好代好誌m̄想,全想一koa歹彩頭。

伊講,一年前有一日早起七點半,醫生kā伊講,伊ê胰臟有一粒瘤。伊講胰臟 (pancreas)是甚麼、pancreas佇身軀ê甚麼所在伊mā m̄知。醫生tùi嚨喉chhng一個管,tùi對胃入去腸仔,koh插入去胰臟,提出細胞分析,才知影是惡性ê癌,醫生講活未超過三個月。阮某kap阮kiáⁿ,聽著攏teh流目屎。

趕緊toh開刀。開刀了到taⁿ,感謝上帝,我koh活倒轉來。

伊講世間人無人想愛死,連愛去天堂ê人mā想愛活teh去天堂。但是我chím-má知影,死是咱作人共通ê目的地。這中間無論活幾日,逐日攏真寶貝。Chím-má恁少年,但是一定漸漸kap我仝款,會變老,所以m̄免對別人彼呢失禮,講話m̄免彼呢嚴格。

你若心內準備好好,知影死彼日不管時會到。當彼日到ê時,你心內所有所有ê過去ê失敗、艱難、人生ê期待、希望、負擔、怨嘆、悲傷,一聲攏會無了了啦!

你若是作tio̍h ê代誌,你tō m̄免浪費時間佇hia家己艱苦,艱苦別人對你ê看法,艱苦別人ê聲將你ê心聲淹過。

Chím-á,佇你欲死以前,tio̍h想看覓(māi),你chím-má最重要ê代誌是作甚麼,你是愛變作甚麼款ê人?M̄-thang kap hiah-ê世間ki-ki-kê-kê ê小可(sió-khóa)代誌ká ká作伙,來浪費時間。

伊講:死不過是一個影,一個Intellectual Concept.

Steve Jobs ê演講真簡單,但是引起學術界真大ê共鳴,因為伊teh講ê代誌真實在。咱人ê人生親像是佇日頭下,但是m̄知tâng時,死ê烏雲欲罩過來…

咱活–teh若是kap死結連作伙來活,將死當作人生活ê一部分,當作家己意識ê一部分,時時準備便便,為伊犧牲,為伊獻身,將死當作朋友,就會變作最高人格ê人。

佇死亡面前ê人,是一位最勇敢ê人,伊人生中一切ê脆弱(chhùi-jio̍k)ê部份,攏消失–啦,一切攏m̄驚–啦。佇伊彌留(mî-lâu)ê目睭內面,會tàng看著伊ê靈魂內面永遠活命ê光。

日本人有世界上短ê詩叫做haiku,其中真有名ê詩人叫做巴蕉(Basho),伊講:

chiru sakura

nokoruno sakura mo

chiru sakura

櫻花會落

樹枝頂ê櫻花

Mā是會落ê櫻花

但是若照Steve Jobs ê演講,咱m̄-thang等咱家己ê櫻花落,佇樹枝頂剩(chhun)幾日幾點鐘,mā tio̍h過hō͘真有意義。

櫻花欲落是『自然律』。但是今仔日ê聖經中,約書亞kā上帝祈禱講:『上帝啊,求你hō͘日頭停步,hō͘阮ê子弟,會tàng佇日頭腳戰爭。』

Che是一種反自然ê祈禱,反科學、反定律ê祈禱。

意思mā會使講:上帝啊,你mài行hiah緊,上帝請你hō͘阮khah濟ê時間。M̄-thang hō͘烏雲hiah緊khàm–過-來。

有一日主耶穌去一個真散赤ê莊腳叫做Betany。我bat去hia ,石頭lok-khok,甚麼攏未生,干單佇乾地頂面有幾叢無花果佇hia hàiⁿ-kòng-hàiⁿ hàiⁿ-kòng-hàiⁿ。主耶穌腹肚iau,行到無花果樹hia,看歸叢攏是葉仔,尋無半粒無花果。馬可講因為猶m̄是結果子ê時。馬太講耶穌真生氣,tō罵這叢無花果,這叢樹仔soah lian去。

主耶穌是按怎chiah-ni̍h無理koh無情?

我想che kap tú-chiah teh講叫日頭停步仝款ê道理。

東方ê宗教:日本ê神道、中國ê佛陀、台灣ê一貫道,攏是teh拜一個『自然ê上帝』,『順天ê上帝』,講『生死有命、富貴在天』ê上帝。

但是今仔日ê聖經所teh講ê是完全相反ê信仰:一個『無順天』、『抵抗自然』ê上帝。基督教ê基礎是:上帝是『創造天地』ê上帝。連日頭、月娘攏聽伊ê話,連無花果mā bōe堪(bōe-kham)得去hō͘上帝罵一句。

按呢講–起-來,咱作信上帝ê人,咱ê人生觀應該tio̍h按怎才好?

我ê感想是咱m̄-thang靠自然,顛倒咱tio̍h學約書亞,勇敢去求上帝ê日頭留步hō͘咱,求伊ê萬權能,來破除自然律對咱ê人生ê橫霸。

世間一切攏無自然。科學對自然界ê瞭解非常有限,tâng時欲有tsunami、地動、風颱無人知。世間ê一切瓏無仝,上帝創造ê花,無二蕊是仝款,世間人ê目睭,無二蕊仝款,手紋無二指chńg頭仔仝款。

若是世間人攏講仝款話、穿仝款衫、食仝款飯、坐仝款火車、作仝款代誌,這世間豈m̄是真無味呢?

這世間所想bōe改變ê大自然,其實tiāⁿ-tiāⁿ leh改變,咱家己m̄知niâ 。

我少年時kā gín-á教主日學,kek一個鬼仔面hō͘ gín-á看,gín-á就歡喜kah未顧tì;我若表演我會tàng教母指-cháiⁿ-á giú開,koh kā合–落-去,gín-á就看到嘴開開,一直喝講『老師,koh做一遍,koh做一遍hō͘阮看』。Do it again! Do it again!。佇gín-á ê心肝內,逐項代誌攏真新鮮、真有趣味。

咱年紀愈大,感覺世間ê代誌愈無味:『日頭腳無新鮮ê代誌』,『chím-má有ê代誌,古早攏bat發生過–啦』,『空虛ê空虛,一切攏是空虛!』連聖經內ê詩人mā按呢講。

但是我想咱ê上帝,伊ê心肝永遠少年。逐早起,伊tō kā日頭kap全世界ê人講“Good Morning !” 咱一世人講幾若萬擺ê Good Morning ! Mā bōe倦(siān),che就是gín-á心肝。

逐早起上帝起來,tō kā地球講:你今仔日koh se̍h一liàn ,地球tō koh se̍h一liàn 。逐暗欲到,上帝tō kā月娘講,你今暗koh se̍h一liàn ,月娘tō koh se̍h一liàn 。

無論上帝講幾擺Good Morning ! 無論上帝逐日逐暗交代日頭kap月娘幾擺,上帝ê心肝bōe感覺倦,bōe無聊,因為咱ê上帝有gín-á心肝,逐日攏teh叫Do it again ! 叫日頭:koh做一遍hō͘阮看!

Tùi chia ,咱tio̍h看會出,上帝叫日頭停步,叫無花果lian去,mā m̄是奇怪ê代誌。

宇宙一切攏佇上帝ê話內面。雖然生命不過是一個影,雖然這個影佇天teh飛ê款,伊欲飛偌遠(jōa-hn̄g),伊欲飛去叨位,咱家己mā m̄知。

只有一項咱知,就是咱這個短暫ê影是飛佇上帝ê世界ê內面,世界ê一切,攏是靠上帝ê嘴所講ê話teh tín動。

最近牧師娘佇日本ê電視台看著Romania ê教會,教會內有450年久ê壁畫,攏是畫主耶穌ê聖經內ê故事。Tito ê獨裁政權共產黨時代,無人敢去教會,chím-má咱看著Romania人一下入教會就跪佇土腳,kā主耶穌祈禱,一日來教會作禮拜三擺。Hit種虔誠ê態度,真hō͘人感動。

若是彼間教會,人入來,真安靜,真平安,真清氣,無雜音,無閒仔話,人tō真愛入來作禮拜。

最近我kap會友聊天,mā有講起咱台灣人kap日本人仝款,生活無受過真濟艱苦,所以來信耶穌ê人無濟。平平一篇ê講道,若是受著艱苦過ê中國人聽著,khah濟人心會開,khah會接受上帝。

咱雖然生活佇Seattle, 外口ê生活平平無湧,但是咱也tio̍h覺悟:咱ê生命不過是親像一個影。咱tio̍h懇求上帝:日頭啊!請你繼續照顧我,hō͘我有你ê光,看著頭前ê路。日頭啊!請你繼續chhōa世間善良ê人,hō͘ in為著上帝ê真理、上帝ê疼、上帝ê義,來向前拍拚。日頭啊!請你行khah慢chit-sut-a, mài hō͘烏雲hiah緊tō khàm過來,mài hō͘阮ê人生拄著深坑,行無路。若是有可能,請你hō͘日頭停步。

 

祈禱:

『主啊!阮謙卑來到你ê面前,懇求你作阮人生ê日頭,導阮行人生這條路。主啊!日頭thài會行 hiah呢緊呢!請你hō͘伊行khah慢chit-sut-a, hō͘阮佇拄著風颱、病疼、失業、失志、傷心、艱苦ê時,會tàng有時間來得著你ê照顧kap醫治。阮向你按呢懇求祈禱,是靠阮ê救主耶穌基督ê聖名。A-men。』

 

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致