大丈夫對大男人

November 4, 2005
kap 朋友分享

『大丈夫對大男人』

父親節前主日禮拜

哥林多後書10:1-14

陳柏壽 牧師

金句:『恁著警醒,佇真道上khiā hō͘穩,作大丈夫,tio̍h堅強,見若恁所做ê,攏tio̍h憑愛心來做。』 (哥林多前書16:13)

 

講世間是男女平等,實在無影–啦!你–看,頂個月母親節,十日前八日後大家tō chhiāng-chhiāng滾,閣送花、食飯、omiyage。Chím-má父親節到–啦,tiām-tiām-tiām, 無人講半句話。閣khah慘–ê,就是我去SEARS,看著彼ê最大ê割草機kap鋸樹仔ê鋸仔ê廣告,頂面寫講che是欲送父親節最好ê禮物。差一點無將lù便所ê掃帚,提來作父親節ê禮物niā-tiāⁿ。真正透早tio̍h出門,為著顧三頓,做到腳尾冷sng-sng,連到父親節,人嘛欲買這款物件來相送。咱作人ê老父,實在講–起-來,地位真lám ,kap人彼款作老母ê人比–起-來,會使講差天kap地。

講著牧師teh娶日本某,講甚麼娶日本某ê人,大部份攏是帶大男人主義,講甚麼若kap這款人作朋友,本來對待家己ê某不止客氣ê人,忽然間會變作另外一個人,會ke̍k一個派,ke̍k一個大男人ê氣派。

講這款話ê人,就是m̄-bat日本人ê人,對彼種娶日本某ê人ê家庭,完全無瞭解ê人。娶日本某有真濟艱苦無人知ê代誌,其中最大ê一項,就是這點人對咱ê誤解。娶日本某kap娶台灣某,有這項共通ê最大ê課題:就是查甫人欲按怎來作一位大丈夫,m̄是欲作大男人。

戰前ê日本查甫人,就是阮爸爸彼代ê人,不准阮阿母佇街仔路作伙行路。查某人佇街仔路行路tio̍h退二步,tòe佇阮爸爸ê kha-chhng後行,行路ê時閣m̄敢踏著阮爸爸ê影。查某人ê一生,就是tiām-tiām看tòe著先生ê後面,一世人給伊奉待,一世人tòe佇丈夫ê身邊,親像丈夫ê影,但是干單給伊服務,bē使出聲。這叫做大男人主義。

大男人主義就是文化、階級、性別ê產物。社會內面嘛有大女人主義。若是萬事女人優先,女人khah gâu趁錢,甚至用女人作傳宗接代ê根據ê所在,就有大女人主義。一般來講,每一個社會,大男人主義比大女人主義khah嚴重,危險性khah大。今仔日是父親節前禮拜,我愛講一個我kap牧師娘佇Hawaii牧會ê時,親自經驗ê一個kap烏社會暴力團teh 搶一個少女ê恐怖ê故事,hō͘列位兄姊參考。這m̄是偵探小說,但是che是kap烏社會車拚ê真正恐怖ê故事。

有一日我ê會友khà電話kā我報告,講伊有一位同齊顧店ê日本查某囡仔同事,yumiko,去hō͘ in頭家拍kah規面烏青,嘴齒閣hō͘伊拍斷一支。雖然已經真暗,我kap牧師娘隨時趕–去,去伊ê身邊kā伊照顧。轉來了後,牧師娘真艱苦心,叫我明á再作禮拜了後拜託教會ê楊醫師kā伊開一張診斷書,將來可以使用。禮拜下晝,我kap楊醫師就去Waikiki邊仔細間擔仔店集中ê所在,叫做International Market,尋著彼間賣細漢囡仔衫ê店。

Yumiko規面攏烏青,面驚到kiu作一khiû ,phut-phut-chun。伊真驚頭家ê派ka-chōa仔探聽看伊teh kap甚麼人講話。伊講伊hō͘頭家拍了後ê血衫,攏留佇厝內。我嘛有kap伊hip一張相。

yumiko比阮查某囝減3歲。這款年齡ê查某囡仔應該是享受青春年華,充滿著夢、愛情ê romantic ê學生時代。但是目睭前這位少女,四年前對高中畢業以後,老母就死–去,留一個小弟、一個小妹kap一個阿姊。為著顧三頓ê基本生活,人就介紹伊這間kabushiki kaisha,伊心內想講『股份有限公司』應該是安定、有法律管制ê公司,無想到che就是大阪烏社會開ê公司。Che就是yumiko chiang高中畢業以後,一世人ê第一個頭路。

佇大阪開始上班作小店員,一直真認真作,欲hō͘頭家歡喜。二年前頭家kā伊講in Hawaii ê店欠人,yumiko心內幻想 Hawaii是真súi,是人間ê天堂。無想到來到位才知是叫伊來排擔仔。烏社會ê日本頭家開酒吧,開bikini游泳裝ê店。店員一日khiā六點鐘,伊一日khiā十點鐘,閣bōe使坐椅仔。日本ê烏社會訓練ê一寡真無健康ê大男人,真濟日本女性就是這種大男人主義ê犧牲品。yumiko chiang不但一日tio̍h khiā十點鐘,略略仔tō會去hō͘頭家siàn嘴phé。

來到Hawaii以後無有一日會tàng去外口thit-thô,嘛攏無加班費,為著厝內ê小弟小妹,伊就按呢忍–落-來。Tú來到Hawaii大阪ê老母就過身,伊無錢好轉去,就kā頭家借錢買飛機票。轉去送葬以後,passport tō去hō͘頭家tau tiâu leh,薪水嘛常常無欲發。

我ê教會ê秀卿姊kā我講,yumiko佇生理bái ê時,為著欲hō͘頭家歡喜,就偷偷仔用伊家己ê錢去買囡仔衫,有時一日買八、九件,提去送人。秀卿姊感覺真奇怪。這點是咱台灣人bōe瞭解ê所在。

有一日我ê會友阿優chhōa三歲ê囝Shaun去店裡,看著一領紅嬰仔ê牛仔褲,秀卿姊講伊欲買送hō͘ Shaun,但是yumiko m̄知定價是外濟錢,本來yumiko答應先提轉去,以後知影價數才收錢,但是伊後面一位大叢ê日本職員,講bōe使,所以就無買。後來才知影,tùi彼陣以後,yumiko就心心唸唸欲買彼領牛仔褲來送Shaun。伊離開以後阮才發現yumiko kā店買ê囡仔衫內面,嘛有彼領欲送hō͘ Shaun ê彼領牛仔褲。

秀卿姊是咱台灣人,雖然是hō͘人chhiàⁿ,伊khah m̄驚死。In頭家生理好ê時,面色tō khah好,生理bái ê時,就hoah東hoah西。有一擺頭家來,佇yumiko ê面前閣teh大聲細聲歹歹叫,秀卿姊忍bōe tiâu,tō 當面給彼個大男人講:『This is the United States. You are in America, not in Japan!』秀卿姊雖然bē曉講英文,但是伊kā in頭家講這句英文,講了真súi。

Hawaii最低工資是一點鐘6 kho͘,扣稅金了剩$5.50。yumiko kap幾位kap伊仝款運命ê日本少女,去hō͘烏社會拐來in心目中ê天堂,二、三位tòa一間頭家ê apart,略 lio̍h-lio̍hl-á tō去hō͘烏社會ê大男人拍。用拍來háⁿ chiah-ê二十歲ê小子。In無visa,hō͘人打嘛m̄敢報警察。

日本一個無教會主義ê牧師叫做賀川豐彥(Kagawa Toyohiko),伊是一位真有名ê大學教授,但是攏去大阪ê後壁街仔去傳福音,過一世人。後壁街仔ê日本人,攏是散赤人,作小生理。yumiko ê老父佇大阪市ê後壁街teh作烘(hang)爐,散赤人寒天厝內焚(hiâⁿ)柴ê烘爐。yumiko來到Waikiki,每日佇伊ê目睭前ê,攏是一群一群kap伊仝年齡,Tùi日本來青春少年ê少年少女,有講有笑,佇Waikiki ê海邊攏teh唱歌。yumiko一個人khiā佇店裡驚無生理,驚hō͘頭家拍。伊心內攏無期待甚麼,只有一個求生ê本能,懷念佇後壁街teh作烘爐ê too chiang kap伊ê小弟kap小妹,干單欲顧三頓,干單欲kā活–落-去。

我kap牧師娘去kap伊講話ê時,雖然全身攏傷,但是無流一滴目屎,這個少女只有將伊ê目屎吞入去伊ê心內,一直到阮ê車ê輪踏著Honolulu國際機場ê門口,牧師娘kā伊moh leh,kā 伊講:『yumiko chiang erai yo,你是一位勇敢ê女性!緊去!』彼ê瞬間,伊ê目箍才紅–起-來。Che是阮kā伊買飛機票,二日內欲hō͘伊隨時離開Hawaii烏社會ê大男人,欲hō͘伊隨時離開Hawaii。

彼暗,阮佇暗中kap伊約好,欲佇路角ê暗暗ê電火柱仔腳相等。我看著對遠遠hia伊ê店,伊ê小小ê身軀,hàiⁿ一–下hàiⁿ一–下向著阮ê車chông來,瘦閣薄板,親像飛佇空中,giōng-giōng-beh去hō͘風吹–去。

入車了後,面青sùn-sùn。伊講伊佇宿舍內有一包行李,希望會tàng轉去提。彼包行李ê內面,有伊懷念ê媽媽留hō͘伊ê相片,嘛有媽媽欲過身ê時交待hō͘伊ê手指,嘛有彼領去hō͘彼ê大男人打ê時,全身攏是血ê彼領洋裝。伊真愛kā in攏chah轉去日本。

因為驚人看著伊,牧師娘將阮查某kiáⁿ ê衫給伊khàm teh,叫伊ku落去椅仔腳,驚到phi-phi-chhoah,車沿著Waikiki ê海邊,來到Alakawa街伊ê宿舍,來到宿舍ê門口,才發現鎖匙khǹg佇店裡,因為緊張,煞bōe記得chah–出-來。

時間已經真迫–啦,阮討論ê結果,m̄-thang閣轉去店提鎖匙,萬一這個逃亡ê計劃去hō͘ in頭家發現,不但伊轉去日本ê計劃ê破壞,甚至伊kap阮二位ê生命嘛有危險。所以阮決定直接向機場。yumiko嘛講,媽媽你佇天頂,一定會原諒伊,佇這個危險逃命ê時間,將媽媽ê相片kap記念物無法度chah轉去日本;其他所有世界ê物件,伊攏無愛–啦!這世伊干單欲轉去故鄉,欲轉去老母ê所在,欲離開惡魔ê手掌,離開這個可怕ê Hawaii ê這個所在。

伊欲離開車ê時交待阮二項物件:一包是一個信封,信封內面有5張20 kho͘美金,講伊欠彼ê同事ê錢,拜託阮還伊;另外一項是一個紙盒仔,內底是所有公司ê文件kap店ê鎖匙。

日本話有這句:『tobu tori, ato o nigosazu!』意思是講欲飛去ê鳥,嘛tio̍h將舊siū保持到清氣liu-liu,m̄-thang留là-sap。這位受苦ê少女,心猶是真純潔,甚麼代誌攏交待清清楚楚。

阮作伙入去飛機場,牧師娘chhōa yumiko chiang kā伊匿佇便所內,叫伊換穿阮查某囝彼領洋裝,頭殼閣給伊戴一頂拍鳥帽仔,真正變作另外一個人。Teh等飛機ê時,伊ê手猶phi-phi-chun飛機門欲開以前,阮作伙坐佇角仔hia手牽手祈禱,祈禱了後yumiko chiang嘛講:『阿們!』,che是伊這世人第一拜講阿們。伊講,伊一世人攏m̄-bat入去教會,到Osaka ê時伊一定欲去教會作禮拜,信耶穌。佇紅紅ê目箍ê內面,我第一擺看著笑面ê少女。

對彼年以後,每年ê Christmas伊攏會寄一包禮物來阮兜,一直到牧師娘叫伊m̄-thang閣寄來–啦。

我佇日本久長ê歲月,所tú著絕大部分ê家庭攏是夫婦相疼、輕聲細說、有禮有貌ê基督徒家庭。但是kap台灣仝款,往往嘛會tú著真濟帶有臭狗仔hiàn ê大男人主義者。以前我ê部下嘛有一寡這種貨,攏會去hō͘我sia̍h到金金金,走無路。

大男人主義,英文叫做Masochism,Masochism有幾項特點:1)用伊動物性ê力量,專門對付屬佇伊下面ê弱者、妻子、部下,來達成伊心理ê滿足;2)用虐待別人來增加家己ê快樂;3 )用痛苦ê刺激來過日,拍別人ê時,講是為著疼你才來拍你。

Chiah-ê心理,實在m̄是甚麼大男人ê心理,實在是小男人ê心理,是一種自卑、無能、小氣、心虛、心狹、無勇氣ê表現,只有會曉牛寮內ta̍k牛母,出外無半步,入門專頭路ê人。愈無信仰、愈無智識、愈無教育ê男人,愈有這種大男人ê傾向。愈封建ê社會kap文化,封建ê家長制度、父權制度、天皇制度,愈會培養這種大男人ê種類。

基督教嘛真注重男人,要求查甫人佇信仰、家庭、經濟各方面,tio̍h擔起伊作查甫人ê責任,但是基督教m̄是叫伊『大男人』,是叫伊『大丈夫』。甚麼叫做大丈夫?大丈夫kap大男人有甚麼無仝?

大丈夫最清楚ê記號就是彼ê掛佇十字架頂ê上帝。是按怎講基督教ê大丈夫可以用十字架作記號呢?

第一項:基督教ê大丈夫m̄免用拍人來愛人。今仔日世間真濟政客、軍人攏講:為著疼你,來拍你;為著民主,來戰爭;為著基督教ê上帝來拍倒別個宗教ê上帝。古早以來ê日本、中國、美國時常用國家ê名義、用民主ê名義、用上帝ê名義來拍人。Che攏是小人,m̄是丈夫。上帝m̄免咱為伊去thâi人,嘛m̄免為著上帝去kap人辯論。上帝m̄免咱替伊去辯論。

第二項:基督教ê大丈夫是親人朋友ê面前是謙卑;但是佇敵人ê面前勇敢。血氣kap屬靈是一個身體ê二面。查甫人難免有血氣,有時粗魯,無夠文雅,但是一個人『是活佇一個氣』,無人有法度脫離血氣。人無血氣,無法度成人。血氣ê衝動,有時會tàng做真好ê代誌:為正直公義來受氣、來勇敢戰鬥。但是受氣真好、真重要,不過m̄-thang留到日頭落山,過暝日日頭出來ê時,所有ê受氣kā bōe記了了,一切重頭開始,這叫做大丈夫。

有人真gâu傳屬靈ê道理,但是性格真陰沉、陰險,逐項代誌攏積佇心內,kô-kô-tîⁿ舞bōe清。這種人不但無血氣,嘛無屬靈,實在是惡魔附身,bōe超生。Che m̄是大丈夫。

有人開嘴合嘴祈禱,叫伊教主日學,伊講伊來祈禱看māi;叫伊禮拜後來煮飯,伊講伊欲祈禱看māi;叫伊來唱歌,伊講伊欲祈禱看māi。我真驚這種gâu祈禱ê人。有人講慢來ê正義,m̄是正義;慢來ê事奉,m̄是事奉;慢來ê感謝,m̄是感謝。大丈夫欲做上帝ê代誌,喝chhiâng tō chhiâng, hoah liâng tō liâng,一分一秒to m̄-thang延chhiân,Che才是大丈夫。

第三項:大丈夫m̄免隨時to講別人m̄-tio̍h,講家己才tio̍h。大丈夫m̄免kā人講伊講ê叨位一句話『真重要』,因為重要無重要m̄免講ê人去講,是聽ê人家己去作決定。

最近阮去買一台hybrid car,每一擺若是踏brake,伊四個輪仔就自動會發電。所以每一擺牧師娘teh kā我踏brake ê時,實在是teh kā我充電,hō͘我閣khah有力,來建設這個家庭。別人teh kā咱踏brake,會hō͘咱產生反抗,嘛會hō͘咱產生反省。反抗嘛好,反省嘛好,目的是欲hō͘二人閣khah會曉khîⁿ家,閣khah團結,夫婦閣khah結連作伙。有ê家庭非常悽慘,翁仔某連oan-ke to bē oan-ke,規厝內冷ki-ki,攏未發電。Oan-ke是欲用來發電,發電是欲用來建設家庭,hō͘家庭閣khah圓滿。

最後一項:大丈夫tú著困難ê代誌ê時,tú著逆境ê時,tio̍h愛有笑面,bōe使得目頭結結,tio̍h將目屎吞落去腹肚內。將目屎吞入去內底,用笑容顯–出-來,用笑面看透世間萬事,che才是大丈夫。

『親愛ê主,你經過阮ê牧師保羅先生教示阮講:阮tio̍h做大丈夫,做堅強ê人。阮人人khiā佇你ê十字架下面,所tio̍h學習ê就是你ê勇敢、虔誠、謙卑、包容、義理、忠實、犧牲。因為對chiah-ê最高ê品格,阮就看著阮這世間第一大ê大丈夫,就是阮ê主耶穌基督。阮閣khah懇求你hō͘阮會tàng佇艱難困苦ê逆境中間,用笑面來看透一切,用笑面來面臨一切ê困難,甚至有一日阮欲轉去,去見你ê面ê時,m̄是憂頭結面,悲慘哀叫求情,是欲親像一個大丈夫,用笑面來見阮ê上帝,來hō͘你接納阮。主啊!懇求你hō͘阮學習用笑面來看透人生ê一切,作一位大丈夫。祈禱奉主耶穌基督ê聖名。阿們。』

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致