啟 示 錄 第 十 四 、 十 五 章

April 28, 2005
kap 朋友分享

第九

啟示第十四、十五章

柏壽牧師

 

二種魔鬼ê型態、二個怪獸講了–啦,in ê聲影攏漸漸遠去–啦,第七個號角chhōa咱越過啟示神學ê中站,來到chia,老約翰chhōa咱ê靈魂ê目睭,看著一個全新ê景像。

第七個號角一般hō͘人有悲觀慘淡ê印象。主要ê原因可能是對聖保羅ê書信來ê。保羅佇哥林多前書15:52講:『一時久,目一nih,末期號角tân ê時到。末期號角beh tân,死人就beh復活,會朽爛(hiu-nōa)ê變作bōe朽爛ê,咱也beh變化。』大家按呢攏認為第七ê號角就是世界ê終曲,當第七號角tân ê時,世界ê審判官會出現,將世間人分作永死kap永生二旁,同時世界就受廢滅,也就是世界末日。豈(kiám)有影第七ê號角tân ê時就是世界ê末日呢?豈有影審判ê日就是世界ê末日呢?

啟示錄ê聖約翰有hō͘咱真清楚ê答案:世間ê進展絕對m̄是佇第七ê號角就結束。第七號角以後,世間就是進入另外一個新閣大ê循環,進入上帝七個憤怒ê大碗ê循環。世間不斷佇循環中進展。一個循環過了接落去另外新ê循環,永無止息。當然佇每一個循環ê結束有審判。 審判m̄是世界ê結束,是時代ê轉換。一般教條化ê思想認為審判就應該是世間ê結束,m̄是,啟示錄給咱講–ê是永遠無beh消滅ê世界,永遠teh循環ê世界,循環kap循環ê交界有斷站,有停止,有審判,有安息,有更新。所以聖約翰ê世界觀是循環ê世界觀,是永遠無停止ê運動ê世界。

這個活ê啟示錄所beh表示ê『最後ê審判』m̄是世間ê『最後』,第七號角tân以後嘛m̄是世間ê『最後』。第六號角tân ê時,出現ê一個戶碇(hō͘-tēng)(或是門檻(mn̂g-kam)),就是天使長米迦勒所設立ê,佇hia ,人間分作beh 跨過這個戶碇ê人,以及無beh跨過戶碇ê二種人。無 beh越過戶碇ê人就是hiah-ê拚命擒(khîm)tiâu世間ê物質,kap世間分未開ê人。等到第七號角響出,精神世界ê太陽現出曙光(sú-kng),新ê世界beh出現,新ê宇宙ê音樂kap歌聲開始有聽著ê時,這二旁ê世界分閣卡清楚。

佇第十一章ê所在,咱看著二位見證人出現(11:3),這二位見證人嘛是叫做二個燈臺,咱頂面有講過in代表ê就是摩西kap以利亞,in亦就是大天使所起ê門檻ê二個大柱(thiāu)。仝款佇這所在亦出現二個怪獸對無底坑出–來,beh阻擋人來hāⁿ過這個大ê戶碇。抵好(tú-hó)親像約伯記內面約伯所感覺著ê新ê世界仝款,人khiā佇新世界ê戶碇ê門口,tio̍h-ài tùi上帝hia來得著新ê靈魂ê氣力,來對暫時ê物質世界kap永遠ê精神世界二旁,作真好ê選擇,來贏過盤踞戶碇二旁ê惡魔,進入上帝國ê平安。

啟示錄對十二、十三章進入十四、十五章有真大ê轉變,伊ê氣氛kap風格完全無仝,佇chia充滿著上帝神聖ê平安,對chia開始咱看著戶碇ê彼邊ê景色。咱讀這二章ê時tio̍h用欣賞一個真美(súi)ê景色ê心情來讀,亦tio̍h用聽真美ê音樂ê心來讀,m̄-thang用機械化ê神學kap教條來讀。咱佇chia有聽著天使號角ê合奏,每一曲攏彈出每一個時代ê進化kap鍛練ê故事,最後來到第七ê天使ê號角tân ê時,就是魔鬼kap天使長米迦勒佇天堂征戰,結果魔鬼hō͘天使長摔(sia̍k)落來地面。Che是啟示錄交響樂ê第七樂章,啟示著這世間所有舊糞埽(pùn-sò)攏tio̍h掃除清理清氣。

佇第二章第二節ê所在寫講:『我聽見天頂有聲,親像眾水ê聲,kap大雷ê聲音;閣有聽著琴聲,親像彈琴人用琴彈出ê聲。』號角已經佇前七個樂章完成伊ê角色,伊會使歇睏–啦,續–落-去就是琴聲ê開始,雖然號角ê聲佇遙遠ê天邊猶有聽–著,但是已經親像雷公聲漸漸遠–去。這個琴聲雖然佇以前ê樂章bat出現,但是攏去hō͘號角淹過。這個琴聲是宇宙中最幼秀ê聲,真親像人間ê幼秀ê聲:『親像彈琴人用琴彈ê琴聲。』

宇宙最中心最深沈ê點所發出來ê聲是號角發出來ê聲,是幼秀美麗微弱ê琴聲。咱若去海邊拾(khioh)著一粒大螺仔殼,khǹg耳孔邊聽看māi–咧,就會聽著親像宇宙中發出來微小ê琴聲。上帝ê聲,親像太古創世ê聲(Logos),繼續佇這世間teh進行,就是講上帝每一日攏繼續teh創造世間,上帝ê琴聲對太古一直到今仔日,佇大自然ê逐角落,攏teh發聲。『永遠不變宇宙恆古ê聲』,佇啟示錄用ê詞,叫做『琴聲』。所謂『上帝ê話(Logos)』一般人攏想講是固體,m̄是,伊是一個液體,或是氣體,對泰初創世彼刻開始,一直延續到今仔日,一直到恆古ê將來,伊攏繼續teh創世,teh活動。咱tio̍h學習用咱ê心靈ê耳孔去聽咱四周圍ê聲,去聽天頂星辰(chhiⁿ-sîn)ê聲。對泛蓋宇宙四方所發出ê聲音,上帝teh kap咱講話。

上帝佇泰初出聲,上帝是神聖ê歌聲ê本源。咱ê肉體若欲離開這世間,轉去彼旁ê世界,就是上帝tòa ê所在,hit時一定會聽著上帝ê聲音,親像泰初上帝創世ê時,用伊ê聲,命令空虛混沌(hūn-tūn)擾亂ê地面kap黑暗ê海面,叫in有光kap秩序。仝款,上帝佇創造世間ê生物kap人間ê時,嘛hō͘ in有出聲ê能力。後來人間更加努力,發展出in家己ê語言ê文化,來kap上帝講話交通。人ê聲愈來愈濟,愈來愈大聲,上帝ê聲佇這世間就愈來愈微小、愈來愈小聲,只有剩(chhun)佇宇宙中ê琴聲,只有微音。受造物ê聲pôaⁿ過造物者ê聲。

假使一個演講者面對一群真安靜真注意teh聽ê聽眾,伊只有講真小聲就可以,慢慢á講,伊就會tàng安靜來傳達伊ê意思,無任何阻礙,伊會tàng真清楚講出伊ê話。但是若是一群真愛講話,大聲小聲,甚至演講者teh講ê時in嘛teh講,濫摻摻(lām chham-chham),有人甚至講比演講者閣卡大聲,欲kā演講者ê聲淹過。這時演講者為著欲繼續傳達伊ê意思,就會愈講愈大聲,甚至講出來ê話,只有是欲回答聽眾ê話,演講ê內容出佇聽眾,由聽眾來支配,無法度講出原來伊愛講ê話。

對這世間進化ê過程,咱嘛可以看出這個現象。上帝本來用真安靜ê小聲,有法度來平復混沌kap黑暗ê地kap海,但是世間人ê聲愈來愈大聲,上帝只好命令天使長用號角ê聲,來作伊傳達意思ê工具。號角是破裂、雄健、戰鬥ê銅器ê聲。雖然上帝經過號角嘛有法度hō͘世間人聽著伊ê聲,但是泰初上帝真美閣安靜ê琴聲只有退去後臺。雖然是按呢,佇強烈刺激ê號角ê警告ê聲ê後面,猶有上帝安靜又溫和,對蒼生細述ê琴聲。當最後ê第七天使pûn號角ê聲漸漸消失ê時,咱就會聽著琴發出ê聲,人間就親像受迫害、追逐、欺負、經過風火地動ê災難ê先知以利阿,最後會再聽著ê上帝真微小ê聲音。

第十四章開始,就是宇宙ê琴聲開始以前,寫啟示錄ê老約翰『看著羊羔khiā佇錫安山(台語寫做Sûn-soaⁿ「郇山」),kap伊tī–teh ê有十四萬四千人,攏有羊羔ê名kap伊ê父ê名寫佇in ê頭額。』然後琴聲開始。約翰又聽著這『十四萬四千人佇寶座前,亦佇四個活物kap長老ê面前,唱新ê歌。』

 

宇宙ê號角已經經過,閃電已經洗清空中一切污穢(ú-óe)垃圾(lah-sap),目前是空闊無邊ê境界,人間經過世間種種磨練,taⁿ來到天堂ê戶碇。羊羔第二次出現。羊羔第一次出現是來拍開彼本有七個封印ê冊。宇宙進化唯一ê動原,就是這位『羊羔』。用伊ê愛kap犧牲來推動世間歷史ê進展。基督耶穌就是『上帝ê羊羔』。上帝ê羊羔第一次ê犧牲是『道成肉體』降臨世間;第二次犧牲是各各他ê十字架。Chiah-ê攏是宇宙ê事件,m̄是人間ê事件。上帝佇宇宙中降世、死,來挽回沈淪(tîm-lûn)ê人性。神ê上帝用人間ê死來顯明伊ê愛,來提升人性ê價值。

Taⁿ,第七號角ê聲音已經漸漸遠去–啦,人間有機會來khiā佇精神界ê戶碇ê門口,看著新時代ê出現。佇這歷史關鍵ê時刻,耶穌基督再度出現,用羊羔犧牲ê形狀出現。耶穌基督作這位羊羔,欲按怎拯救人間呢?

第一次上帝佇主耶穌身上,親像『上帝ê羊羔』道成肉體來到世間,伊是推動這個宇宙ê輪轉ê力量,伊是開彼本有七個封印ê冊ê力量,che是泰初創世ê力量,che是上帝第一次ê犧牲。上帝第二次ê犧牲發生佇各各他ê山頂,經過十字架ê死,這位chiâⁿ作人ê形狀ê最神聖ê上帝,為著拯救人間脫離罪ê束縛ê深淵,hō͘人類有回昇向上ê希望。Taⁿ,佇第七號角ê聲音tih-beh消失,人類行到精神世界門口ê戶碇,咱看著一個完全新ê空間tih-beh誕生。佇這個宇宙進化關鍵ê時間,上帝再次用犧牲ê『羊羔』ê形狀出現,上帝再次參與人類ê歷史,來拯救人間。

這144,000 ûi-lûi羊羔四圍ê人代表ê就是未來世界ê人間像,全部ê人類ê形象,就是12 X 12 ê全世界ê人間。對主耶穌12位使徒開始,代表ê是世間各種族ê無仝,排列佇天堂ê大廳上帝ê面前,每一族攏有伊無仝ê外貌kap文化ê特色,每一族攏是上帝國ê特使。十二就是全部宇宙空間ê象徵。無論每族群是小或大,無論所講ê是12或是12,000,伊代表ê就是世間全部人類ê集合體,世間所有自由、獨立、完全ê人間ê集合體。無仝獨立ê族群,雖然有in無仝ê特色,但是ûi-lûi佇主耶穌ê身邊,代表一個最基本ê『12』ê觀念,對12產生144,000 ê觀念(12 x 12,000),就是代表世間各邦族ê『精神ê數字』。144,000就是世間所有人間kap族群團結ê代表,代表上帝國中ê真正屬上帝ê教會,教會中ê教會。chiah-ê人佇khiā 佇『自由獨立』kap『各族群互相相尊重』作團結ê基礎,來建立主耶穌ê國度。

咱teh講這144,000人ûi-lûi錫安山,當然m̄是teh 指地面Jerusalem西南邊ê彼粒錫安山,是指佇天頂所起造ê聖城。地面ê聖城只有作天頂ê聖城ê記號,m̄是未來世界真正ê聖城。Jerusalem有二個特出ê山頭:佇東旁有摩利亞山,是三千年來猶太人kap回教徒ê聖地;佇伊ê西旁是更加有特色ê山頭叫做錫安山。東旁摩利亞山是石頭ê高原,是親像月娘ê頂端;西旁ê錫安山,就親像日頭ê頂端。

有以色列歷史以前就有真濟錫安山ê太陽ê故事。佇chia,大祭司麥基洗德,叫做撒冷王,帶餅kap葡萄酒出來迎接亞伯拉罕,同時對亞伯拉罕接收十分之一ê奉獻(創14:17-20)。這位麥基洗德是一位特別ê祭司,無屬這世間所有宗教傳統ê祭司,直接屬上帝ê祭司(希7:3)。伊所提出ê餅kap酒所代表ê就是錫安山頂ê日頭ê營養所產生ê糧食,這二種也就是基督教聖禮典中聖餐ê代表 ,就是日頭ê產物。

佇錫安山ê所在,大衛王為猶太人起造第一間ê聖殿。後來佇這個聖殿頂面,就有起造主耶穌kap學生最後晚餐ê厝。仝這間厝也就是主耶穌復活以後四十日久,伊kap伊ê學生作伙,有親密交陪ê所在。也是佇這間厝ê所在,佇五旬節ê透早,學生受耶穌ê聖靈,勇敢為主傳福音ê開始。

所以會使講:錫安山頂彼間最後晚餐ê厝,已經搬過大衛、所羅門所起ê聖殿ê地位。這世間已經免閣去尋(chhōe)bih佇幕廉後面ê約匱,咱會使直接坐上帝ê桌,kap上帝作伙食飯飲杯。新錫安山代表人間對新世界ê期待,就是大家欲聚集佇精神上ê新ê聖城,就是天城;佇hia咱欲看著主耶穌ê日頭kap溫暖,灌沃(ak)每一個人ê心田。主耶穌為人間犧牲,來奉獻家己,親像每一日,日頭出來,hō͘人有溫暖、光、kap生命仝款。144,000人ê生命,對上帝ê日頭得著營養,用成熟ê心靈,來建立新ê世界。

老約翰描寫講這144,000人是『對世間買–來-ê,作初熟ê果子,歸hō͘上帝kap羊羔』(14:4)。In m̄是對世間逃閃來ê,是經過世間所有ê苦難kap磨練,來潔淨in ê靈魂ê結果。這群『新人類』在啟示錄ê作者ê耳孔聽著ê,是in作伙teh 『唱新ê歌』。In ê歌,親像大水teh流ê合唱。無人聽有in teh唱甚麼,干單in家己知影in唱ê內容(14:3)。In用歌聲來表現in家己,m̄免用號角。號角停止以後,才有法度聽著in ê歌聲。

In ê歌聲,配合宇宙ê琴聲,代表宇宙最深ê內涵,亦是表現人間最深ê內涵。二旁ê內涵,宇宙ê內涵kap人間性ê內涵,合作一體。對宇宙ê琴聲,以及新人ê歌聲,新ê世界來誕生。

這個『新歌』包涵著新ê生命,同時亦teh創造新ê生命。因為伊hō͘一切攏換新–啦。欲hō͘ 一切更新,無甚麼困難,只要人佇伊家己ê思想、感情、kap意志淨化更新,就有法度產生這種新ê歌聲。新ê思想、感情、意志ê綜合體,就是『歌聲」。上帝ê話是一個不斷創新ê力量,伊活佇新創造ê人ê內面。

老約翰同時亦警告咱大家,今仔日tio̍h開始更新咱心靈ê思想、感情、kap意志,m̄-thang等到明日。今仔日若無掖籽(iā-chí),明日就bōe puh芽。所以咱tio̍h開始向著新ê天城,向上攀登,咱來kap hiah-ê未來世界ê新人,共同來唱新歌。

新ê聖城ê一幕tú消失,老約翰隨時看著三位天使出現,一位續接一位,每一位攏傳達嚴格ê信息。

第一位天使飛過天庭ê高處,手提著冊來teh 傳報一個世間最高、最大ê福音,叫做『永遠ê福音』(evangelium aeternum)。這個永遠ê福音,飛佇天空,飛佇各國、各族、各方、各民ê頂面(14:6)。

時代teh變遷,人ê靈感kap智感嘛teh改變,對上帝ê認識亦teh改變,人ê宗教意識亦隨時代teh改變。世間各族ê宗教意識攏teh改變。這個永遠ê福音kap咱目前所teh讀ê手寫ê福音無仝款。伊m̄是受文字、文化、習慣、神學種種因素ê影響,來用手寫出來ê福音。這個福音是超越文字、文化、宗教、神學ê,不必用手寫ê福音。所以這個未來世界最大ê福音,已經欲過換咱目前ê暫時ê福音。

古來基督徒攏認為無一本叫做『聖經』ê『冊』,心內就bōe安心。但是現時世界佇咱ê目前,咱攏看著教會內外ê青年,讀聖經ê愈來愈少,社會上因為文化、文學,宗教、意識ê對立,聖經ê重要性嘛乎人感覺淺薄去–啦。但是未來世界是真有希望ê、充滿著光明ê世界。因為啟示錄ê老約翰ê目睭早就看透這個道理,伊真清楚知影,創造宇宙萬物ê上帝一定是超越世間種種宗教、文化、文字ê隔閡(keh-hek)ê上帝,所以天使所傳ê福音,就是佇一個成熟ê時代,共同成熟ê人間,一定有法度用心靈kap誠實去認識一個真正ê共同ê福音,去尋(chhōe)著一位人類共通ê上帝。

 

有真濟人一定猶有疑問:是按怎這本手寫ê聖經,有一日一定會消無?有一日,若無這本聖經,豈猶有基督教?有。不但是按呢,連其他所有人間存在ê宗教經典,攏會消無。文字hō͘人死,聖靈hō͘人活(哥後3:6)。咱ê上帝是精神世界ê主宰,伊是人類共同ê天父,所以伊無受人間ê文字、文化、宗教束縛。閣卡明白來講,基督教根本m̄是世間ê宗教,基督教所講ê上帝根本m̄是世間諸神明中ê神明。基督教ê上帝佇啟示錄作者ê眼中,已經超越chiah-ê一切。

所以,手寫出來ê福音書ê結束,就是約翰teh講ê永遠ê福音ê開始。用另外一個角度來看,嘛會使講,咱欲了解四本福音書,tio̍h-ài對了解啟示錄開始,用屬靈ê眼光,才有法度真正了解福音書。聖經ê形成時時是倒頭寫,所以有真濟所在,嘛tio̍h倒頭看、倒頭想,才會了解。欲了解啟示錄tio̍h了解甚麼是人,甚麼是人ê本質,人kap上帝ê關係是按怎。對hia開始,才來進入四本福音書才未慢。

所以會使講,啟示錄khiā在福音書ê頂端,khiā佇人性ê頂端,伊所看著ê世界比hiah-ê束縛佇基要派神學內面ê人所看著ê卡闊卡高。基要派ê人物看著啟示錄奇怪ê文字kap說明,往往無愛去了解。其實啟示錄所teh用ê文字簡單,針對ê問題,非常實際,因為伊是teh講咱家己本身ê代誌,teh講咱家己kap上帝ê關係。

第一位天使拚hō͘世間人第一個道理,就是這個『永遠ê福音』。咱若用屬靈ê眼光,kap用人性ê觀點,欲了解這個福音並無困難。未來世界ê人,因為靈性愈進步,對超物質、超感官ê代誌愈敏感,所以欲了解啟示錄愈簡單。我認為主耶穌真正是為著未來世界ê這個永遠ê福音來到這世間,真正耶穌ê福音應該就是這個全人類接受ê福音。

佇耶穌受難以前,人是用肉體去了解耶穌、去尋上帝,人往往受束縛佇耶穌本身ê民族、宗教、文化、文字ê限界,也就是講:人對耶穌ê『歷史性』ê內面去欲尋上帝。但是佇主耶穌復活ê時刻以後,咱若去墓裡欲去尋肉體ê耶穌,一定尋無,天使一定給咱講:『伊已經無佇chia ,已經復活啦!』『咱怎樣佇死人中teh尋活人呢?(路加24:5-6)」主耶穌叫咱:Hō͘死人去埋in ê死人,你只有來tòe我!(馬太8:22)因為咱ê上帝m̄是死人ê上帝,是活人ê上帝(太22:32;可12:27)。 Chiah-ê攏是真強烈ê要求。另外一句話講就是:有一日,咱tio̍h將歷史性(historicity)ê耶穌kā伊『轉(tńg) 臍』掉,因為今仔日就是主耶穌復活、上天、再臨ê世代,咱是活佇耶穌ê復活ê精神性(kerygma)ê福音內面,就是永遠ê福音,m̄是暫時ê、地域ê、民族ê、宗教ê福音。

有信徒認為永遠ê福音,因為無強調傳統福音ê結構、耶穌ê道德教訓、以及傳統教會ê權威,所以心內無容易接受。但是主耶穌是khiā佇永遠ê福音ê中心,主耶穌用另外一個面形出現,就是一個超越傳統ê面形 –一個卡大卡高ê主耶穌。無了解真正ê主耶穌ê人,佇新ê創世紀ê時代,時常bōe-tàng拍開心門來接受新ê永遠ê福音,寧可生活佇in束縛家己ê福音觀念內面,真正可惜。

主耶穌活kap全世界kap全人類作伙,今仔日伊已經teh傳報這個永遠ê福音hō͘世間人。人間因為物質主義蔓蓋心靈,因為hiah-ê靠宗教食飯ê教棍kap政客,因為hiah-ê靠神學來建立in ê教會勢力ê學者kap牧師,因為人ê心靈kap意志貧惰(pîn-tōaⁿ)kap頑固,永遠ê福音ê芽,bōe-tàng自由生長。但是傳永遠ê福音ê大能ê天使已經展翼起飛–啦,活跳跳ê主耶穌ê卡大卡高ê福音,欲深深發芽佇世間人ê心靈ê內面。

傳永遠ê福音ê天使佇chia用嚴格ê話講:上帝施行『 審判』ê時已經到–啦(14:7)。『 審判』這二字時常hō͘人對啟示錄ê福音,有真大ê誤解。一般人就是將審判當作世間末日ê悲慘ê代名詞,若準彼日就是決定永遠ê沈淪受苦kap永遠ê拯救ê決定性ê時刻。

這字希臘文原文意思是『危機』(krisis, krima)。大能ê天使宣佈ê內容是teh講一個大ê危機。醫學上一個病人tú著一個真大ê決定性ê危機,就是講伊ê病若m̄是會好就是會死。所以講這個最大ê危機並m̄是人間最後ê絕境。危機是一個轉機。人類有可能佇這個危險ê危機回心轉意,向上回復健康ê生命。

人類面對這個永遠ê福音ê態度ê時,是m̄是開拆咱ê心肝,來接近這本天書,用開拆ê心靈來看著上帝佇世間進行中,teh實行ê攝理,來感覺著佇『天空』中已經有這個耶穌永遠ê福音ê信息teh飛翔。Che是咱ê危機抑是咱ê轉機。

閣來,第二位天使飛佇天頂,喝講:巴比倫城倒–啦,因為伊hō͘萬民飲邪淫大怒(siâ-im tōa nō͘)ê酒(14:8)。佇光明ê錫安山ê後面,產生一個陰影,叫做巴比倫。未來世界一定分作二ê世界,有二種人:一種人就是佇錫安山頂光明ê所在聚集ê人;另外一種人就是陷落佇黑暗ê深坑巴比倫ê人。

錫安山頂ê人表示in對天頂得著屬靈ê營養,真正看透in四週圍ê物質後面ê精神力量,時時清氣in ê心肝kap肉體,將人ê魂kap上帝ê神結連。巴比倫ê深淵,代表人一直活佇伊ê肉體kap物質ê內面,不但bōe-tàng將物質kap肉體超越去到精神界,甚至看輕、侮辱、污穢精神ê世界,這種人永遠是沈淪bōe超生ê人。

第三位天使飛過天空,傳達另外一個嚴格ê信息:若有人拜獸kap獸ê像,佇in ê頭額或手頂有獸ê印記,這人必飲上帝大怒ê酒…in受痛苦ê煙向上chhèng 高(kôan),直到永永遠遠,日夜不得安寧(14:9-11)。咱絕對m̄通認為以上講ê代誌,只有佇未來世界才會發生ê代誌。m̄是,佇咱今仔日目睭前就是已經teh發生ê事實。有獸kap獸ê印記ê人,m̄是 teh 講hiah-ê(thâi)人放火暴力非法ê人,所有心內只有存物質觀念,心內無有上帝ê人,攏有獸ê記號。因為佇in ê心內,人kap獸kap其他ê動物不過仝款,差無外濟。

真濟人認為人類經過科學ê研究、物質ê發展,人間社會就會愈形人,人會愈文明。M̄-tio̍h。人類愈『進步』,人間ê野性亦愈來愈大、愈高明。人愈來愈親近野獸。人間愈『進步』,人間ê問題愈濟,人愈來愈無時間,人ê技術智識,漸漸將人縛死佇伊ê技術kap智識ê頂面,人愈無活佇人ê世界,愈親像活佇機械ê地獄ê世界ê內面。

人愈gâu利用大自然ê資源,愈bat 『自然律』,愈會曉利用自然來創造物質,並無表示人愈來愈親近自然、愈bat自然法。顛倒反,人因為機器化,煞(soah)將人變作機器化ê動物,人愈親近獸ê境界,佇伊ê頭額頂kap手上,攏有機械ê獸ê印記。人間ê環境,離開會tàng培養人ê靈kap魂ê境界愈遠。今仔日ê世界,人人生活佇緊張kap不安ê中間,其實就是這個『最後ê審判』 ê證明,最後ê危機已經佇咱目前。人欲追求心靈ê平安,tio̍h-ài kap這種野獸ê機械文明奮戰,來達到高(kôan)ê人間,高ê精神ê境界。

接–落-去咱會看著另外一幕偉大ê一景:『我又觀看,見有一片白雲,雲頂坐著一位親像人子,頭tì金ê冠冕(kòan-bián),手the̍h利ê鍥仔(koeh-á)』(14:14)。忽然間咱看著人子真正再臨ê一景。照福音書ê記載,人子再臨真正是坐雲再臨,伊就是用『人子』ê形狀再臨世間。人子代表ê就是一位理想ê完全ê人間。人子ê再臨代表人ê精神境界得著提升、得著拯救。

『羊羔』為著拯救人類 有三次ê犧牲,第一次是上帝創世ê時,『道』親自參與人ê世界;第二次就是佇各各他ê所在,羊羔為人類受死;Taⁿ,就是神聖ê犧牲ê時陣,人ê世界若無對頂面來ê力量來參與,就無得救ê可能。

這次kap二千年前上帝道成肉體降生無仝,這次上帝經過伊ê『魂」以kap伊ê『精神」降臨這世間,上帝用伊ê靈魂來親近人類。『雲』是上帝ê靈魂最好ê象徵。

下面幾節會使講kap傳統ê釋義仝款,就是講基督ê靈魂再臨ê時,頭戴金冠冕(上帝ê思想),手the̍h利ê鍥仔(上帝ê審判)。隨時三位天使對天庭出。這章有真適配ê主題:代先是錫安山ê主題,接–落-去是三位天使對天庭出,接–落-去就是人子坐雲出現ê大主題,接–落-去又是三位天使對天庭出。

第一位天使叫坐雲頂ê人子:『伸出你ê鍥仔來收割;因為收割ê時已經到–啦,地上ê五穀已經熟–啦。』(14:15)坐雲頂ê彼位就hiat鍥仔佇地面,地上ê五穀就收割。第二位ê天使對天庭出,手也the̍h利ê鍥仔。第三位天使出,給(kā)第二位天使叫講:『伸出你利ê鍥仔收割地面歸球ê葡萄,因為葡萄到水–啦。』(14:18)第二位天使就(gia̍h)起伊ê鍥仔,收割地面ê葡萄,hiat落上帝大受氣ê酒糟,就有血對酒糟出,高到tú- tio̍h馬咬韁,遠約略六百里。意思是講騎佇馬頂ê兵士攏tio̍h潦過真深ê血。

基督ê再臨確實有審判世間ê意義,但是kap中古時代以來ê審判官ê角色無相仝款。這位太陽ê人子來到世間,帶hō͘世間ê使命,就是分別甚麼是已經成熟、已經會使收割ê物,甚麼是無路用ê物。天使teh大收割ê物產主要ê是『五穀』kap『葡萄』。地面上ê五穀代表人間ê外在ê成果;葡萄汁代表ê是人間內在ê成績。就是講整個人間創造出來ê文明,攏tio̍h受著考驗:只有上帝ê日頭培養出來ê好物,就是用五穀kap葡萄所代表ê永生ê生命(聖餐),才來收成入倉。

上帝teh驗收chiah-ê人間ê成果ê時,就有血對地面流出。上帝teh驗收人間家己ê作為,就是表示上帝並m̄是審判ê主體,人間才是審判ê主體。

當第七位天使ê號角出聲ê時,二項真清楚ê主題出現:第一主題就是『永遠ê福音』;第二主題就是『主ê再臨』。這二項代誌,攏須要人本身來作最後ê決定kap選擇。佇這時陣,人間世界就真清楚:有人有法度去讀生命冊中ê內容,有人無法度了解彼本冊ê內容。當基督本身再臨人間ê時,有人感覺會著、看會著,但是有人感覺bōe著、看bōe著。咱對待chiah-ê超越五官ê精神世界ê態度,就是欲決定咱家己將來ê命運,無人有法度改變。

14:13開始寫講:『我聽見有聲講:「你tio̍h寫伊:Taⁿ以後,佇主來死ê死人有福氣!」聖神講:「是–啦,hō͘ in息in ê著磨(tio̍h-bôa )來安息,in所做ê工也隨in。」』咱若欲了解這句話ê意思,tio̍h繼續讀下面ê經文:『我閣看,看見有白ê雲,有親像人子ê坐佇雲ê頂面。』

對chia咱知影,佇死去ê人ê世界,卡近基督。佇基督內面死去ê人,受卡大ê祝福,因為再臨ê主,親像晨曦第一道光出現ê時,死人ê世界,就是親像khiā佇高塔頂ê人比佇山谷來ê人,卡早看著日光。因為死人ê世界就是親像天頂ê雲ê世界,in卡接近上帝ê世界。

咱嘛可能對chia推想另外一個事實:主ê再臨也帶hō͘死人ê世界新ê危機,因為hit陣死去ê人亦分作二旁:一旁是in在生ê時陣時時顧念著精神世界ê代誌,時時生活佇基督ê樣式,時時親近基督,in佇死後嘛仝款真親近基督,變作佇『基督內面死去』ê人。這種人就第一個會tàng看著上帝再臨個日光ê第一個光線ê人。第二種人就是在生ê時,完全無欲顧念精神世界ê代誌,in ê靈魂ê內面只有充滿著物質,死後只有會tàng佇黑暗中摸索,in ê燈因為無油,所以心內無光,看bōe著基督ê光。

佇基督內面死ê人,in嘛是未來世界新人類ê一部分,就是聚集佇聖山山頂羊羔四周圍ê hiah-ê人。保羅先生有講:『主閣來ê時,咱chiah-ê猶活teh ê人,bōe會代先hiah-ê teh睏ê人。因為主欲本身對天降臨,有呼叫ê大聲音,kap天使長ê大聲音,閣有上帝ê號角ê聲。佇hit 時,hiah-ê佇基督內面死去ê人欲代先起來,以後咱chiah-ê猶活teh ê人,欲kap in受接納佇雲內,入空中迎接主。』(帖後4:13-17)再臨ê基督ê日頭光代先會射入去死人ê世界內面,然後才滲透入來咱活人ê世界內面。

基督再臨不但表示對佇主內死ê人ê拯救,嘛是對hiah-ê在世ê時,只有生活佇物質內面ê人ê裁決。這種人不斷看輕精神世界ê重要,恥笑信上帝ê人ê態度,佇in死ê瞬間,煞入去一個in一世人teh否定ê世界,這個世界kap in一世人生活ê基盤(物質),是完全無仝款ê世界。

In 是人,有靈魂ê人,不得不tio̍h進入靈魂ê世界,但是in ê靈魂內面,完全無有了解精神世界ê基礎,所以in佇hia teh流浪、bōe安息、teh 受苦。人佇在世心內愈注重、愈在意、愈眷顧物質,佇in結束地上ê生命ê時就進入愈黑暗ê世界。這種人不但佇死後ê世界是按呢,就是in佇在世ê今仔日嘛是按呢,因為in整個ê生命自己受著自己ê欺騙kap束縛,生活佇物質ê幻像內面,bōe-tàng超生。

佇十五章ê所在,第一出現ê就是閣一次ê玻璃海:『我閣看見玻璃以及火相參(saⁿ-chham)ê海。閣看見hiah-ê得勝了獸kap獸ê像以及伊ê名kap數目ê人,攏khiā佇玻璃海頂,手the̍h著上帝ê琴,吟上帝奴僕摩西ê歌kap羊羔ê歌。』(15:2-3)玻璃海頂詩班ê合唱。這次ê合唱m̄是親像以前,配合天頂ê宇宙ê琴聲。這次是佇in每人ê手攏有in家己ê琴,彈出家己ê聲。

啟示錄有三次ê琴聲,第一次是創世ê起初,羊羔開宇宙ê封印,歷史進化ê開始,『伊the̍h彼卷ê時,就四個活物kap二十四ê長老攏phak 佇羊羔ê面前,逐個有琴kap té滿香ê金爐…in teh吟新ê歌。』(5:8-9)佇玻璃海ê世界就是未來世界,一切攏變作透明化ê世界,寶座前ê玻璃海親像水晶,寶座中kap寶座周圍有四個活物,前後遍體攏滿滿是目睭(4:6),佇這時陣這所在上帝hō͘琴出聲。

第二次上帝hō͘琴出聲在號角ê聲安靜以後,上帝ê大自然神聖ê琴聲才漸漸出現。佇hia,144,000新ê人符合上帝ê琴聲唱出新ê歌聲。新人類配合上帝ê琴唱新歌(14:3)。

這次第三擺,人間用伊家己ê樂器,唱in家己ê歌。樂器ê聲kap人間家己ê聲攏是對人本身出來,kap泰初創世ê時代,對上帝自己出來仝款。

啟示錄ê作者將這時玻璃海頂面ê歌聲形容作『摩西ê歌』。當初摩西chhōa伊ê百姓平安經過驚人ê紅海,in ê敵人攏淹死佇紅海ê波浪內面,摩西就唱出舊約聖經中第一個感謝ê詩歌。摩西唱這條新歌以前,就是有二分ê神,一旁就是chhōa以色列過紅海ê神;另外一旁就是hō͘敵人死亡ê神。chím-má佇玻璃海頂嘛是有二分ê神teh作工:有法度唱新歌ê人,就是有法度經過紅海ê風湧ê人;無法度作伙唱新歌ê人,就是去hō͘風湧吞食去–啦。聖經後面teh形容chiah-ê人就是講:in所有ê彈琴、作樂、pûn蕭、pûn號頭等等聲音,決斷無閣佇in中間,in攏親像動物按呢,啞口bōe講話(18:22)。

聖約翰寫ê啟示錄ê結構內面最深沈ê所在在佇這個玻璃海,伊出現二次。第一次伊看著ê玻璃海真純真、透明、晶靈,這個新天新地ê地球,完全無受著任何物質ê污染,完全無物質ê凝縮ê成分(4:6)。Chím-má第二擺,老約翰ê目睭放眼看遠,伊看著地球ê不斷進化更新ê部分,就是講伊所看著ê新ê地球,kap前ê玻璃海仝款真純淨真美(súi),但是kap前ê玻璃海無仝ê所在:佇海頂有摻雜著『火』(15:2)。新創世時代ê世界ê情景,並m̄是一生不變,一切固定不動ê世界,伊是充滿『熱』kap『愛』ê世界。這個熱kap愛是人類對以前舊ê世界學習著ê最大ê功課。新世界ê形成是由人間ê熱心kap愛心建立ê世界。人間ê愛心kap熱心,佇chia用火來作記號。

經過新人類用in手中ê樂器,對in心內唱出新ê歌,才hō͘玻璃海出現。人間是創造新世界ê力量。人ê熱切ê心肝,親像火teh tõh ê愛心,會將未來ê世界透明化。

對開七個封印開始,人間一步一步進步,人間無法度繼續隱藏in ê內心kap in ê本性。未來世界ê人間,若m̄是變作獸ê 形狀,就是變作基督ê形狀。未來世界ê一切一切,無任何事物會tàng am-khàm,世間萬事攏無黑暗ê陰影,甚至內心至深ê所在ê思想,嘛攏看到清清楚楚,無有偽裝ê所在。前前後後攏是光明ê目睭。佇彼個時陣彼個所在,所有ê物質攏有伊ê『精神』存在,世間無閣有任何污穢垃圾黑暗無清無白無明ê所在。七個號角了接–落-去ê琴聲,是對人ê靈魂ê最深ê所在發出來ê心聲。

人本來有主權來管理這世界,但是人惡用in手中ê管理權,用in家己ê私心、欺騙,來主宰一切。主要是因為人無法度看透別人ê am-khàm ê思想。但是人間經過舊世界ê磨練以後,學習著一個真正確ê道路:人佇伊ê靈性上愈追求、愈進步,人愈會tàng探討發現伊超感官ê世界,就會將世間人ê虛假、偽善、詭詐(kúi-chà)、惡毒、白賊、欺騙、假好漸漸去除。

未來世界ê人類,一定會分作一種只有獸ê記號ê人,另外一種就是手thçh琴嘴吟新歌ê人,這種人是未來世界ê新人。咱時時tio̍h儆醒,佇咱靈魂ê深ê所在,鍛練上帝賞賜咱ê琴,用咱ê耳孔來鍛練。咱ê靈魂ê耳孔若有法度聽著天使ê聲,咱ê靈魂就會變作一個真súi ê琴,來hō͘天使配音,咱ê講話行踏就更新,別人看著咱就親像聽著咱teh唱新ê歌仝款。咱m̄-thang去hō͘這世間攪吵ê號角ê聲淹過去,tio̍h充實咱家己靈魂內面上帝賞賜咱至美ê琴聲。

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致