細 拉 ê 人 生

August 23, 2004
kap 朋友分享

『細拉ê人生』

陳柏壽 牧師

 

十月下旬佇東京,New York, Virginia各地是黃葉開到真súi (美麗)ê季節。彼年ê這時陣,我有chhōa衛鄉教會會友去upstate New York挽(bán)葡萄,逐粒攏親像黃金及鑽石,逐粒攏甜but-but,親像蜂蜜hiah-nih甜。大家oân-nā食,oân-nā挽,食一斤,挽半斤。這是秋天ê懷念。

Evergreen ê Washington State因為松樹siuⁿ濟,卡無互人感覺著秋ê色彩。但是溫度起寒(kôaⁿ),開始落雨,就互人感覺著秋ê來臨。親像咱ê人生,欲進入第三ê季節,會感覺畏寒(ùi-kôaⁿ),感覺咱家己親像樹仔頂ê黃葉仔,雖然是súi,但是欲落(la̍k)落來土腳嘛真緊ê時。

彼日王教授去San Francisco看in查某kiáⁿ,欲過海關ê時,物件攏排排出來互人檢查,hit時伊家己假gâu,問講伊tio̍h剝皮帶來互伊檢查無,海關ê人講好。過關了,伊ê皮帶留佇hia,無hâ,因為腹肚大粒,無皮帶嘛無感覺,就坐飛龍機轉來Seattle,轉來到厝才發現食力–啦,無皮帶。

愈想愈m̄甘願,心內干那m̄甘彼條皮帶。最後,想孔(khang)想縫(phāng)想機會閣去San Francisco,去到位,過冥日透早,伊就租一隻車駛去San Francisco飛機場ê海關,尋(chhōe)無停車位,只好停入去停車公司,問真久才問著領物件ê所在。最後佇彼幾若百條ê皮帶中間,伊去認著伊彼條舊皮帶。

納(la̍p)停車費20 kho͘。欲轉去in查某kiáⁿ ê高速公路頂去互警察開一張超速ê罰單180 kho͘,為著彼條舊皮帶,伊開(khai)200 kho͘ ,閣tio̍h租車錢、汽油錢,閣用足足一日ê時間。

頂幾日伊佇Bellevue ê Bon Mache看著皮帶teh俗賣,煞(soah)去互伊看著一條及伊chím-má teh hâ ê彼條舊皮帶完全仝款ê新piak-piak ê皮帶,一條5 kho͘。伊心內真m̄甘願,kā伊買–起-來。Chím-má算–起-來,總共伊開(khai)差不多三百外kho͘,去買二條完全仝款ê皮帶,khǹg佇厝內。

Chiah-ê代誌ê一切攏是出佇siòng開始ê時,伊『m̄甘願』ê心理。

有時我teh想,人生真濟m̄甘願ê代誌,但是愈m̄甘願,愈了錢。一年到尾算算起–來,常常無賺(thàn)倒去了。十年攏kā伊算算–起-來,嘛無一定有賺(thàn) 。五十年、七十年攏總kā伊算算–起-來,嘛無影賺外濟,hiàng時青春少年活跳跳,一日到暗笑瞇瞇,m̄知天地幾斤重,日頭攏bōe落山。Chím-má行到黃昏ê海邊,嘴鬚頭毛白,心臟病、高血壓兼糖尿病。真正是倒了卡濟ê人生。你按呢一年通天,無閒(bô-êng)chhì-chhà,你究竟是為著啥物teh無閒,你何必艱苦chē-kòa,來行(kiâⁿ) 人生這chōa路–呢?

咱ê人生不但是一chōa無賺(thàn)ê人生,咱一世人閣是tio̍h時時屈服佇權威ê下面ê人生。彼日洪牧師講道有講著一位信主ê新婦仔(Sin-pū-á)去互乾家(ta-ke)苦毒。洪牧師講這個乾家一直欲kā這個新婦『壓落底!』意思是講你愈欲反抗,我愈kā你壓迫,拍一擺、二擺、三擺、五擺、一百擺、一千擺,拍到互你完全m̄敢抵抗,拍到互你連想to m̄敢想欲抵抗”Don’t even think of it!”。互主人『壓落底』ê奴隸,最後伊ê心靈及意志攏完全屈服,一世人乖乖作奴隸。

不但是古早,就是今仔日,不但是別人,就是連咱家己,嘛是仝款,咱時常佇心靈及意志ê內面,去互人kā咱『壓落底』:人講你無婿(súi),kā你講三擺、五擺、十擺,漸漸你家己會想講你真正比別人卡無緣投;抵著(tú-tio̍h)講卡大聲ê人,咱toh講話m̄敢大聲,抵著khiā佇台仔頂ê人,台仔頂ê人講–ê就是『真理』,台仔腳ê人就無一定有真理;抵著有錢、有勢、有力、有武器、有地位、卡勇壯、卡緣投ê人,咱只有退去後面,親像彼個新婦仔去互人『壓落底』,只有家己關佇房間內teh流目屎。

每一時代ê『真理』攏無仝款,chím-má ê人khiā佇台仔頂teh解說聖經及五百年前ê人teh解說聖經有真濟無仝,及二千年前ê初代教會,閣卡無仝。仝這本聖經,古早講查某人bōe使佇教會講話,chím-má 講查某人若無佇教會講話,才無合聖經;古早講政府官員是上帝封立來管理咱–ê,chím-má講政府官員攏tio̍h聽咱ê話;六十年代teh拍越南ê時代,及七十年代teh看越南戰爭,評價toh無仝款;2004年真濟教會teh支持Iraq戰爭,我相信經過幾年仔後,世間對這個戰爭一定有無仝款ê看法。美國好,就是好佇無仝ê價值觀念時時teh改變,無仝款ê思想攏會共存。今仔日ê真理,明仔載無一定是真理。雖然按呢講,人koh時常只有屈服佇『食飯』ê權威、『思想』ê權威、封建『男女』關係乾家、新婦『家庭』ê權威、『種族』、『名聲』、『宗族』、『地位』、『錢財』ê權威之下,常常會去互人『壓落底』,漸漸m̄敢出聲。

詩人大衛去互伊家己ê子(kiáⁿ)jio̍k到無位好去,佇敵人ê面前行到絕境ê時,伊kā上帝祈禱,祈禱未–落-去-啦!詩篇內加彼二字『細拉』,就是這個意思。細拉就是叫琴手輕輕仔giú,『細聲』,音樂譜寫作p, pp (piano),寫到ppp就giōng-beh『無聲』–啦,就是giōng-beh『斷氣』去啊–啦,就是一個休止符號『stop』去–啦,就是『空白』啊–啦,就是『絕路』啊–啦。『上帝啊,我已經無位好去啊–啦,你佇叨位?』這個『細拉』ê時刻,就是祈禱中無聲卡贏有聲ê時。

咱若看一幅圖,畫到cha̍t-phóng-phóng,畫到tîⁿ–tîⁿ-tîⁿ,互人感覺giōng-beh bōe喘氣。若是一幅圖,主角以外有真濟空間,真濟空白,就主角愈清楚。所以彼ê『空間』所代表ê意思真大,bōe輸圖主角。

創世以前世界ê空間是混沌(hūn-tūn)無明,是無清氣ê空間。但是上帝創造世間,就是將混沌無明ê空間,變作真透明ê空間,有天、有海,有空氣、有石頭,有人、有花草。上帝ê靈運行佇宇宙ê空間ê內面。

這個空間m̄是佛家teh講ê『四大皆空』,m̄是 “nothingness”, 是實實在在、真真正正、充滿ê物件”Everything and all things in the empty space.”。Chím-má咱佇主日學開始讀–ê就是這個真實在、真清氣、真透明ê,親像玻璃海ê『啟示錄』ê空間,歡迎兄姐多多參加。

咱ê上帝知影咱作一個人ê脆弱,作一個人ê宿命,知影咱不得不屈服佇種種ê權威ê下面,來求生存,所以伊kā咱開一條生路:就是伊家己來降生作人,生作及咱仝款,生作受種種權威及勢力壓迫ê人ê運命。狐狸有孔(khang),飛鳥有巢(siū),主耶穌佇這世間,無家己khǹg枕頭ê所在,最後煞(soah)死佇十字架頂。作一個人,上帝會使講是過著一個真悲慘ê人生。

用另外一句話來講,就是上帝及咱仝款,嘛teh經過一個『細拉』ê人生。伊佇天頂作上帝好好,無形無蹤,無始無終,親像猶太人ê耶和華上帝,按呢豈m̄是真好呢?

就是上帝深深知影咱細拉ê人生,深深知影咱受著權勢ê壓迫,知影受著信賴ê親人朋友出賣ê滋味,知影食飯、社會、政治ê黑暗,知影欲死欲斷氣ê時『死亡』ê恐怖。這款ê上帝才是咱ê上帝,因為伊活作真正一個人。伊kā咱開一條路互咱行,就是互咱知影:『細拉』ê人生,才是真正ê人生。

人若teh 誇口伊外有錢、外有勢頭,咱m̄免及伊仝款用露骨ê方法來誇口咱ê錢財咱ê勢頭;人若teh誇口in囝按怎gâu讀冊,讀啥物有名ê大學,咱m̄免誇口咱囝嘛是按呢;有人卡gâu,無用家己ê嘴誇口,用幼秀ê方法,暗暗仔互人看出伊ê gâu及伊ê勢力,咱m̄免用幼秀ê方法來顯出咱ê gâu及咱ê力量;有人閣卡gâu,會曉講家己ê歹話來般出講出家己另外彼邊ê優點,這種人是最高明(頂禮拜咱讀腓利比人書ê咱這本真ló ê翻譯本,互司會唸作『看別人比咱卡高明』,實在是真粗魯閣真世俗ê翻譯),咱嘛m̄免用chiah-nih艱苦ê方法來表明咱家己。

Chiah-ê攏m̄是咱最高ê人生ê態度。咱最高ê人生ê態度,就是bōe記得家己,tiām-tiām仔將『細拉』吞–落-去,知影人生不過是『細拉』,知影世間ê代誌不過是『細拉』。知影駛車ê時,人若欲換lane,咱tio̍h先讓人換lane(這次去San Francisco感覺hiah-ê人駛車無欲讓人換lane,及New York ê人仝款,互我感覺Seattle ê人加真可愛)。讓人一步,海闊天空。

世間有一位真好ê牧師叫做保羅,伊人生行仔行,行到欲去大馬色ê路中,去抵著伊ê人生中上大ê『細拉』,就是去互上帝ê光射–著,bōe食bōe飲(lim)。對hit所在,保羅閣khiā–起-來,土粉pōaⁿ-pōaⁿ-leh,向前行新ê路,就是『細拉』ê路。所以伊teh kā咱教上帝ê代誌,用真簡單、真親切ê文字來教咱,伊teh講上帝,親像teh講人間ê朋友按呢。伊講:人最堅強ê時,m̄值得上帝ê軟弱;上帝最愚戇ê時,總是比人最聰明ê時閣卡聰明 (哥前1:25)。豈有影上帝會有軟弱ê時?豈有影上帝嘛有愚戇ê時嗎?

M̄是。保羅ê意思就是beh傳一位『無喧嘩、無出聲、無互街仔路聽見伊ê聲』ê上帝(賽42:2)。保羅傳主耶穌ê信仰ê中心,就是完全bē記得家己,完全無誇口家己,只有會記得家己不過是一個軟弱ê存在,我是一位軟弱ê人,我無啥物thang誇口,我會tàng誇口–ê,極加是我ê軟弱。但是就是因為我的軟弱,上帝佇主耶穌內面ê大能,就會庇蔭佇我,互上帝ê能力佇我ê身上得著完全,就是互我ê軟弱,變作勇健。

祈禱: 『主啊!你bat來這世間,行過細拉坎坷(khám-khiat)ê人生。所以你知影,阮chím-má佇這世間teh行ê路,就是一條細拉ê路。主啊!願你牽阮ê手,來行這條路,互阮經過最艱難、困苦、孤單、絕望ê時,嘛會tàng m̄免驚,繼續向前行。』

附言:阮查某囝Kyobi三不五時toh寫批來kā我講道。伊最近寫互我ê講道篇,我印出來互大家。希望咱作伙來kā伊讀看覓(māi)。

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致